ସାତକୋଶିଆ ବନଖଣ୍ଡର ବରିଷ୍ଠ ସହାୟକ ଅଜୟ ନାଏକ ଗିରଫ

ଭୁବନେଶ୍ବର: ଅନୁଗୋଳ ସହରରୁ କାରରେ ନିଜ ବାସଭବନକୁ ଫେରୁଥିବା ବେଳେ ଗତକାଲି ରାତିରେ ଓଡ଼ିଶା ଭିଜିଲାନ୍ସର ଏକ ସ୍ୱତନ୍ତ୍ର ଦଳ ହାତରେ ଧରାପଡ଼ିଛନ୍ତି ସାତକୋଶିଆ ବନ୍ୟପ୍ରାଣୀ ବନଖଣ୍ଡ କାର୍ଯ୍ୟାଳୟର ବରିଷ୍ଠ ସହାୟକ ଅଜୟ କୁମାର ନାଏକ। ଦୀର୍ଘ ଛଅ ବର୍ଷ ଧରି ସରକାରୀ ତହବିଲରୁ ୧ କୋଟି ୨୩ ଲକ୍ଷ ୫୨ ହଜାର ୫୪୭ ଟଙ୍କା ଆତ୍ମସାତ୍ କରିଥିବା ସଙ୍ଗୀନ ଅଭିଯୋଗରେ ତାଙ୍କୁ ଗିରଫ କରାଯାଇଛି। ଗତ ଅକ୍ଟୋବର ମାସରେ ଏହି ବଡ଼ ଧରଣର ଆର୍ଥିକ ଅନିୟମିତତା ସାମ୍ନାକୁ ଆସିବା ପରଠାରୁ ଅଭିଯୁକ୍ତ ଠିକଣା ବଦଳାଇ ଫେରାର ହୋଇଯାଇଥିଲେ ଏବଂ ଭିଜିଲାନ୍ସ ବିଭାଗ ତାଙ୍କ ଗତିବିଧି ଉପରେ କଡ଼ା ନଜର ରଖିଥିଲା। ବନଖଣ୍ଡ ଅଧିକାରୀଙ୍କ କାର୍ଯ୍ୟାଳୟ ଅଧୀନସ୍ଥ ପ୍ରତିଷ୍ଠାନ ବିଭାଗରେ ବରିଷ୍ଠ ସହାୟକ ଭାବେ କାର୍ଯ୍ୟରତ ଅଜୟ କିଭଳି ସୂଚାରୁ ରୂପେ ସରକାରୀ ଅର୍ଥକୁ ନିଜ ଓ ଅନ୍ୟମାନଙ୍କ ଖାତାକୁ ସ୍ଥାନାନ୍ତର କରୁଥିଲେ, ତାହା ଏବେ ତଦନ୍ତ ପରିସରରେ ରହିଛି। ଭିଜିଲାନ୍ସର ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ ୨୦୧୯ ମସିହା ଜାନୁଆରୀ ୧ରୁ ୨୦୨୫ ମସିହା ଜୁନ୍ ୩୦ ପର୍ଯ୍ୟନ୍ତ ଦୀର୍ଘ ସମୟ ଧରି ଏହି ଅର୍ଥ ହେରଫେର ଚାଲିଥିଲା। ଏଚଆରଏମ୍‌ଏସ (HRMS) ପୋର୍ଟାଲରେ ଅନଲାଇନ୍ ରେକର୍ଡ ବଦଳାଇବା ସହ ଅବସରପ୍ରାପ୍ତ ଓ ମୃତ କର୍ମଚାରୀଙ୍କ ନାମରେ ଜାଲ୍ ବିଲ୍ ପ୍ରସ୍ତୁତ କରାଯାଉଥିଲା। ବିଶେଷ କରି ଅବସରପ୍ରାପ୍ତ ଓ ମୃତ କର୍ମଚାରୀଙ୍କ ଅବ୍ୟବହୃତ ଛୁଟି ବାବଦ ଦରମା ଏବଂ ଅନ୍ୟାନ୍ୟ ବକେୟା ପ୍ରାପ୍ୟ ନାମରେ ଏହି ମିଛ ବିଲ୍‌ଗୁଡ଼ିକୁ ଅନୁମୋଦନ ପାଇଁ ପଠାଯାଉଥିଲା। ଏହି ଅର୍ଥ ପ୍ରକୃତ ହିତାଧିକାରୀ କିମ୍ବା ସେମାନଙ୍କ ପରିବାର ପାଖରେ ନ ପହଞ୍ଚି ସିଧାସଳଖ ସରକାରୀ ଟ୍ରେଜେରୀ ମାଧ୍ୟମରେ ବ୍ୟାଙ୍କ ହସ୍ତାନ୍ତର ଜରିଆରେ ଅଭିଯୁକ୍ତ ଅଜୟ କୁମାର ନାଏକଙ୍କ ନିଜ ବ୍ୟାଙ୍କ ଖାତାକୁ ଆସୁଥିଲା। ଏହାଛଡ଼ା ତାଙ୍କ ଦୁଇଜଣ ସହଯୋଗୀଙ୍କ ବ୍ୟାଙ୍କ ଖାତାକୁ ମଧ୍ୟ ଏହି ସରକାରୀ ଅର୍ଥ ଯାଉଥିବା ତଦନ୍ତରେ ସ୍ପଷ୍ଟ ପ୍ରମାଣ ମିଳିଛି।

Related Articles

Leave a Reply

Your email address will not be published. Required fields are marked *

Back to top button