ପୁଣି ଦେଶର ନମ୍ବର-୧ ଧନୀ ହେଲେ ଗୌତମ ଆଦାନୀ
ନୂଆଦିଲ୍ଲୀ: ଫୋର୍ବସ୍ର ଭାରତର ୧୦୦ ଜଣ ଧନୀ ବ୍ୟକ୍ତିଙ୍କ ତାଲିକାରେ ପୁନର୍ବାର ଶୀର୍ଷ ସ୍ଥାନ ଅଧିକାର କରିଛନ୍ତି ଗୌତମ ଆଦାନୀ। ଗତ ତିନି ବର୍ଷ ଧରି ଦ୍ୱିତୀୟ ସ୍ଥାନରେ ରହିବା ପରେ ସେ ଚଳିତ ବର୍ଷ ଜୋରଦାର ପ୍ରତ୍ୟାବର୍ତ୍ତନ କରିଛନ୍ତି। ସଦ୍ୟପ୍ରକାଶିତ ‘ଫୋର୍ବସ୍ ଇଣ୍ଡିଆ ରିଚ୍ ଲିଷ୍ଟ ୨୦୨୬’ ଅନୁଯାୟୀ, ମାତ୍ର ଗୋଟିଏ ବର୍ଷ ମଧ୍ୟରେ ତାଙ୍କ ସମ୍ପତ୍ତି ୨୦.୭ ବିଲିୟନ୍ ଡଲାର (ପ୍ରାୟ ୧.୭୩ ଲକ୍ଷ କୋଟି ଟଙ୍କା) ବୃଦ୍ଧି ପାଇଛି। ଏହାସହ ଆଦାନୀ ପରିବାରର ମୋଟ ସମ୍ପତ୍ତି ୧୧୨.୭ ବିଲିୟନ୍ ଡଲାରରେ ପହଞ୍ଚିଛି। ଆଜି ପ୍ରକାଶିତ ଫୋର୍ବସ୍ ତାଲିକା ଅନୁଯାୟୀ, ଦେଶର ଶ୍ରେଷ୍ଠ ୧୦୦ ଜଣ ଧନୀ ବ୍ୟକ୍ତିଙ୍କ ମିଳିତ ସମ୍ପତ୍ତି ପୂର୍ବପରି ପ୍ରାୟ ୧ ଟ୍ରିଲିୟନ୍ ଡଲାରରେ ଅପରିବର୍ତ୍ତିତ ରହିଛି। ଭାରତୀୟ ଟଙ୍କାର ମୂଲ୍ୟ ୮.୫% ଏବଂ ସେୟାର ବଜାର ୯.୫% ହ୍ରାସ ପାଇବା ଭଳି ପ୍ରତିକୂଳ ଆର୍ଥିକ ପରିସ୍ଥିତି ସତ୍ତ୍ୱେ ଏହି ଲକ୍ଷ୍ୟ ଅତୁଟ ରହିପାରିଛି। ମୁକେଶ ଅମ୍ବାନୀଙ୍କ ରିଲାଏନ୍ସ ଏବଂ ଶିବ ନାଡାର, ଅଜିମ୍ ପ୍ରେମଜୀଙ୍କ ଭଳି ଆଇଟି ଜଗତର ପ୍ରମୁଖ ଶିଳ୍ପପତିଙ୍କ ସେୟାର ମୂଲ୍ୟ ହ୍ରାସ ପାଇଥିଲା। ମାତ୍ର ଅନ୍ୟପଟେ ଗୌତମ ଆଦାନୀଙ୍କ ସମ୍ପତ୍ତି ୨୦.୭ ବିଲିୟନ୍ ଡଲାର ବୃଦ୍ଧି ପାଇବା ସହ ଲକ୍ଷ୍ମୀ ମିତ୍ତଲଙ୍କ ସମ୍ପତ୍ତି ୭୪% ବୃଦ୍ଧି ପାଇଥିବାରୁ ଏହି ମନ୍ଦାବସ୍ଥାର କ୍ଷତି ସମ୍ପୂର୍ଣ୍ଣ ଭାବେ ଭରଣା ହୋଇପାରିଛି।
