ଟି -୨୦ କ୍ରିକେଟରେ ଇତିହାସ ରଚିଲା ଭାରତ, ଦ୍ୱିତୀୟ ଥର ପାଇଁ ୧୦ ୱିକେଟ୍ ରେ ଜିତିଲା ଟିମ ଇଣ୍ଡିଆ
ନୂଆଦିଲ୍ଲୀ: ଚତୁର୍ଥ ଟି -୨୦ ମ୍ୟାଚରେ ଭାରତ ଜିମ୍ବାୱେକୁ ୧୦ ୱିକେଟରେ ପରାସ୍ତ କରିଛି। ଏହା ସହ ଭାରତ ପାଞ୍ଚ ମ୍ୟାଚ୍ ବିଶିଷ୍ଟ ସିରିଜରେ ଅପରାଜିତ ୩-୧ରେ ଆଗୁଆ ରହିଛି। ଜିମ୍ବାୱେର ବୋଲରମାନେ ଟିମ୍ ଇଣ୍ଡିଆର ଓପନିଂ ଭାଗିଦାରୀକୁ ଭାଙ୍ଗି ପାରି ନଥିଲେ। ଗୋଟିଏ ପଟେ ଯଶସ୍ଵୀ ଜୟସ୍ଵାଲ ୫୩ ବଲରେ ୯୩ ରନ୍ ର ଚମତ୍କାର ଇନିଂସ ଖେଳିଥିବା ବେଳେ ଅନ୍ୟ ପଟେ ଅଧିନାୟକ ଶୁବମାନ ଗିଲ ମଧ୍ୟ ୩୯ ବଲରେ ୫୮ ରନର ଗୁରୁତ୍ୱପୂର୍ଣ୍ଣ ଅବଦାନ ଦେଇଛନ୍ତି। ପ୍ରଥମେ ବ୍ୟାଟିଂ କରି ଜିମ୍ବାୱେ ୧୫୨ ରନ୍ ସ୍କୋର କରିଥିଲା ଏବଂ ୨୮ ଟି ବଲ ପୂର୍ବରୁ ଭାରତ ଲକ୍ଷ୍ୟ ହାସଲ କରିଥିଲା। ଟିମ୍ ଇଣ୍ଡିଆ ପାଇଁ ଜିମ୍ବାୱେ ୧୫୩ ରନ୍ ଲକ୍ଷ୍ୟ ଧାର୍ଯ୍ୟ କରିଥିଲା। ଆୟୋଜକ ଦଳ ପାଇଁ ସିକନ୍ଦର ରଜା ସର୍ବାଧିକ ୪୬ ରନ୍ ସ୍କୋର କରିଥିଲେ। ଗତ ମ୍ୟାଚରେ ଜିମ୍ବାୱେ ଦଳ ପାଇଁ ଏକ ବଡ଼ ଇନିଂସ ଖେଳିଥିବା ଡିଅନ୍ ମାୟର୍ସ ଏଥର ମାତ୍ର ୧୨ ରନ୍ ସ୍କୋର କରିପାରିଥିଲେ। ଏହାର ଜବାବରେ ଯଶସ୍ଵୀ ଜୟସ୍ଵାଲ ଏବଂ ଶୁବମାନ ଗିଲ ଟାର୍ଗେଟକୁ ପିଛା କରି ପ୍ରଥମ ୧୦ ଓଭରରେ ଦଳର ସ୍କୋରକୁ ୧୦୬ ରନକୁ ନେଇଥିଲେ। ଏଠାରୁ ଦଳକୁ ଆଉ ୬୦ ବଲରେ ମାତ୍ର ୪୭ ରନ୍ ଆବଶ୍ୟକ ଥିଲା।
