ଦିଲ୍ଲୀ ଦୁର୍ଘଟଣା ପରେ ସରକାର ତତ୍ପର: ୧୫ ଦିନ ମଧ୍ୟରେ ଚିହ୍ନଟ ହେବେ ଅସୁରକ୍ଷିତ କୋଠା

ଭୁବନେଶ୍ୱର: ରାଜ୍ୟରେ ଜନସାଧାରଣଙ୍କ ସୁରକ୍ଷାକୁ ସର୍ବାଧିକ ପ୍ରାଥମିକତା ଦେଇ ବିପଦପୂର୍ଣ୍ଣ ଓ ଅସୁରକ୍ଷିତ କୋଠାଗୁଡ଼ିକ ବିରୋଧରେ ରାଜ୍ୟ ସରକାର କଡ଼ା ପଦକ୍ଷେପ ଗ୍ରହଣ କରିଛନ୍ତି। ଦିଲ୍ଲୀର ଏକ ପେଇଂ ଗେଷ୍ଟ (PG) ଆବାସ ଭୁଶୁଡ଼ିବା ଦୁର୍ଘଟଣା ପରେ ରାଜଧାନୀ ଭୁବନେଶ୍ୱର ସମେତ ରାଜ୍ୟର ବିଭିନ୍ନ ସହରାଞ୍ଚଳରେ ଥିବା ଜୀର୍ଣ୍ଣଶୀର୍ଣ୍ଣ କୋଠାଗୁଡ଼ିକୁ ଚିହ୍ନଟ କରି ଭାଙ୍ଗିବା ପାଇଁ ବ୍ୟାପକ ଅଭିଯାନ ଆରମ୍ଭ ହୋଇଛି। ଏଥିପାଇଁ ସାରା ରାଜ୍ୟରେ ୧୫ ଦିନିଆ ସମୟସୀମା ମଧ୍ୟରେ ବିସ୍ତୃତ ଯାଞ୍ଚ ଶେଷ କରିବାକୁ ନିର୍ଦ୍ଦେଶ ଦିଆଯାଇଛି। ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରୀ ଡକ୍ଟର କୃଷ୍ଣ ଚନ୍ଦ୍ର ମହାପାତ୍ର ଜନଜୀବନ ପ୍ରତି ବିପଦ ସୃଷ୍ଟି କରୁଥିବା ସମସ୍ତ କୋଠା ବିରୋଧରେ ତୁରନ୍ତ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସମ୍ପୃକ୍ତ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ଯାଞ୍ଚ ପ୍ରକ୍ରିୟାକୁ ସୁଚାରୁରୂପେ ପରିଚାଳନା କରିବା ପାଇଁ ସରକାରଙ୍କ ପକ୍ଷରୁ ଏକ ସ୍ୱତନ୍ତ୍ର ତଦନ୍ତ କମିଟି ଗଠନ କରାଯାଇଛି। ଏହି କମିଟି ଆଗାମୀ ୧୫ ଦିନ ମଧ୍ୟରେ ସମସ୍ତ ସନ୍ଦେହଜନକ ଓ ବିପଦପୂର୍ଣ୍ଣ କୋଠାର ଅନୁଧ୍ୟାନ କରି ବିସ୍ତୃତ ରିପୋର୍ଟ ପ୍ରଦାନ କରିବ। ମନ୍ତ୍ରୀ ଡକ୍ଟର ମହାପାତ୍ର ସ୍ପଷ୍ଟ କରିଛନ୍ତି ଯେ, ପୂର୍ବରୁ ଅସୁରକ୍ଷିତ ଭାବେ ଚିହ୍ନଟ ହୋଇଥିବା ସରକାରୀ କୋଠାଗୁଡ଼ିକର ସମୀକ୍ଷା ଶେଷ ହୋଇଛି ଏବଂ ସେଗୁଡ଼ିକୁ ଭାଙ୍ଗିବା ପାଇଁ ନୋଟିସ ଜାରି କରାଯାଇଛି। ଏହି ଅଭିଯାନ କେବଳ ସରକାରୀ ନୁହେଁ, ବରଂ ବେସରକାରୀ ମାଲିକାନାରେ ଥିବା ଜୀର୍ଣ୍ଣଶୀର୍ଣ୍ଣ କୋଠାଗୁଡ଼ିକ ଉପରେ ମଧ୍ୟ କାର୍ଯ୍ୟକାରୀ ହେବ। ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ଅଧୀନରେ ଥିବା ଅସୁରକ୍ଷିତ କୋଠାଗୁଡ଼ିକୁ ସିଧାସଳଖ ଭାଙ୍ଗି ନୂତନ ନିର୍ମାଣ କରାଯିବ।