‘ବିଜେପି ହୀନ ରାଜନୀତି କରୁଛି’

ଭୁବନେଶ୍ୱର: ପ୍ରଧାନମନ୍ତ୍ରୀ ଆବାସ ଆବଣ୍ଟନରେ ରାଜ୍ୟ ସରକାର ସବୁବେଳେ ସ୍ୱଚ୍ଛତା ରଖୁଛନ୍ତି । କିଛି ବି ଚଞ୍ଚକତା ହେଉନାହିଁ । ଯେତେବେଳେ ଯାହାଙ୍କ ବିରୋଧରେ ଯେଉଁ ଅନିୟମିତତାର ଅଭିଯୋଗ ଆସିଛି ତୁରନ୍ତ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି । ବିଜେପିର ଅଭିଯୋଗ ଭିତ୍ତିହୀନ । ବିଜେପି ପ୍ରଧାନମନ୍ତ୍ରୀ ଆବାସକୁ ନେଇ ହୀନ ରାଜନୀତି କରୁଛି ବୋଲି ବରିଷ୍ଠ ବିଜେଡି ନେତା ତଥା ପଞ୍ଚାୟତିରାଜ ମନ୍ତ୍ରୀ ପ୍ରଦୀପ କୁମାର ଅମାତ୍ କହିଛନ୍ତି । ସୋମବାର ପ୍ରଧାନମନ୍ତ୍ରୀ ଆବାସ ଯୋଜନାରେ ଯୋଗ୍ୟ ହିତାଧିକାରୀ ଘର ନପାଇବାକୁ ନେଇ ବିଜେପିର ଆନ୍ଦୋଳନ ଧମକ ପରେ ଶ୍ରୀ ଅମାତ ଏହା କହିଛନ୍ତି । ସେ କହିଛନ୍ତି ଯେ, ବିଜେପି ବାରମ୍ବାର ପ୍ରଧାନମନ୍ତ୍ରୀ ଆବାସ ଆବଣ୍ଟନରେ ଅନିୟମିତତା କଥା କହି ଲୋକଙ୍କୁ ପ୍ରଭାବିତ କରିବାକୁ ଚେଷ୍ଟା କରୁଛି । ରାଜ୍ୟ ପ୍ରତି ସମ୍ବେଦନଶୀଳତା ନଥିବାରୁ ବିଜେପି ନେତାମାନେ ମନଇଚ୍ଛା ଏପରି ମନ୍ତବ୍ୟ ଦେଇ ଚାଲିଛନ୍ତି । ଏହି ଦଳର ନେତାମାନେ ଆନ୍ଦୋଳନ କରିବାକୁ ଏବେ ଚେତାବନୀ ଦେଇଛନ୍ତି । ଏଥିପାଇଁ କେହି ମନା କରୁନାହିଁ । ହେଲେ ମିଛର ଆଶ୍ରୟ ନେଇ ରାଜ୍ୟ ସରକାରଙ୍କୁ ବଦ୍‌ନାମ୍ ପାଇଁ ଚେଷ୍ଟା କରିବା ଠିକ୍ ନୁହେଁ ବୋଲି ସେ କହିଛନ୍ତି ।