ସରିଲା ସପ୍ତଦଶ ବିଧାନସଭାର ଅଧିବେଶନ
ଭୁବନେଶ୍ୱର:ସପ୍ତଦଶ ବିଧାନସଭାର ୩ୟ ଅଧିବେଶନକୁ ଗୁରୁବାର ଭୋର୍ ସମୟରେ ବାଚସ୍ପତି ସୁରମା ପାଢ଼ୀ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ଘୋଷଣା କରିଛନ୍ତି। ବୁଧବାର ଅପରାହ୍ନରେ ଗୃହ ଆରମ୍ଭହେବା ମାତ୍ରେ ଓଡ଼ିଶା ବିଶ୍ୱବିଦ୍ୟାଳୟ ସଂଶୋଧନ ବିଲ୍ ଏବଂ ଓଡ଼ିଶା ରାଜ୍ୟ ରାଜପଥ ପ୍ରାଧିକରଣ, ୨୦୨୫ ବିଲ୍ ଆଗତ କରାଯାଇଥିଲା। ଏହି ୨ ବିଲ୍ ଉପରେ ଆଲୋଚନା ପ୍ରାୟ ସାଢେ ୧୫ ଘଣ୍ଟା ଧରି ଚାଲିଥିଲା। ଗୃହ ବନ୍ଦ ହେଲା ବେଳକୁ ସକାଳ ୭ଟା ବାଜି ୬ ମିନିଟ୍ ହୋଇଥିଲା। ଓଡ଼ିଶା ବିଶ୍ୱବିଦ୍ୟାଳୟ ସଂଶୋଧନ ବିଲ୍ ଉପରେ କେବଳ ସାଢେ ୧୨ ଘଣ୍ଟା ଆଲୋଚନା ହୋଇଥିଲା। ଏହି ବିଲ୍ ଆଲୋଚନା ସମୟରେ ବିରୋଧୀ-ଶାସକ କେହି କାହାକୁ ଛାଡ଼ିବା ସ୍ଥିତିରେ ନ ଥିଲେ। ବିଧାନସଭା ସଦସ୍ୟ ଏବଂ କର୍ମଚାରୀମାନଙ୍କ ଲାଗି ଖାଇବାର ବ୍ୟବସ୍ଥା ମଧ୍ୟ ରହିଥିଲା। ସଦସ୍ୟମାନେ ମଧ୍ୟ ପୂରା ସମୟ ଗୃହ ଭିତରେ ଉପସ୍ଥିତ ଥିଲେ। ଏହାପରେ ପୂର୍ତ୍ତମନ୍ତ୍ରୀ ପୃଥ୍ବୀରାଜ ହରିଚନ୍ଦନ ଆଣିଥିବା ଓଡ଼ିଶା ରାଜ୍ୟ ରାଜପଥ ପ୍ରାଧିକରଣ ବିଲ୍ ଆଲୋଚନା ସରି ଏହା ପାରିତହେବା ବେଳକୁ ସକାଳ ୭ଟା ବାଜି ୬ ମିନିଟ୍ ହୋଇଯାଇଥିଲା। ଏହି ଅବସରରେ ଶାସକ ଏବଂ ବିରୋଧୀଙ୍କ ମଧ୍ୟରେ ଓଡ଼ିଶା ବିଶ୍ୱବିଦ୍ୟାଳୟ ସଂଶୋଧନ ବିଲ୍ ଉପରେ ଘମାଘୋଟ ବିତର୍କ ଚାଲିଥିବା ଦେଖିବାକୁ ମିଳିଥିଲା। ତେବେ ଏହି ବିଲ୍ର ସାଢ଼େ ୧୨ ଘଣ୍ଟା ଆଲୋଚନା ମଧ୍ୟରୁ ବିଜେଡି ସଦସ୍ୟ ଏକୁଟିଆ ୩ଘଣ୍ଟା ୧୦ ମିନିଟ୍ ନିଜ ମତ ରଖିଥିଲେ। ବିରୋଧୀ ବିଶ୍ୱବିଦ୍ୟାଳୟ ସଂଶୋଧନ ବିଲ୍ ପାସ୍ ନ କରାଇବା ଉପରେ ଜିଦ୍ ରଖୁଥିବା ବେଳେ ଶାସକ ସଦସ୍ୟ କିନ୍ତୁ ଏହାର ସପକ୍ଷରେ ଯୁକ୍ତି ବାଢ଼ିଥିଲେ। ଏଭଳି ପରିସ୍ଥିତିରେ ଗୃହରେ ଦୁଇଟି ଯାକ ବିଲ୍ ପାସ୍ହେବା ସଙ୍ଗେ ସଙ୍ଗେ ଗୃହ କାର୍ଯ୍ୟ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ ରଖିବାକୁ ସରକାରୀ ଦଳ ମୁଖ୍ୟ ସଚେତକ ସରୋଜ କୁମାର ପ୍ରଧାନଙ୍କ ସମେତ ୨ ଜଣ ଶାସକ ଦଳ ସଦସ୍ୟ ଆଣିଥିବା ମୋଶନକୁ ବାଚସ୍ପତି ଅନୁମୋଦନ କରିଥିଲେ। ଅପରାହ୍ନରୁ ରାତି ପାହି ସକାଳ ହେବା ଯାଏଁ ବିଲ୍ ଉପରେ ଆଲୋଚନା ହେବା ଦୀର୍ଘବର୍ଷ ଭିତରେ ଦେଖିବାକୁ ମିଳି ନ ଥିଲା। ଗତ ୨୨ ବର୍ଷ ତଳେ ଏଭଳି ଦୀର୍ଘ ସମୟ ଧରି ସକାଳ ପର୍ଯ୍ୟନ୍ତ ବିଲ୍କୁ ନେଇ ଚର୍ଚ୍ଚା ହେବାର ଦୃଶ୍ୟ ଦେଖିବାକୁ ମିଳିଥିଲା। ଏହାକୁ ନେଇ ସବୁଆଡ଼େ ଏବେ ଚର୍ଚ୍ଚା ମଧ୍ୟ ହେଉଛି। ଏହା ପୂର୍ବରୁ ୨୦୦୩ ନଭେମ୍ବର ୧୦ ତାରିଖରେ ଓଡ଼ିଶା ଅର୍ବାନ ପୋଲିସ ବିଲ୍ ଉପରେ ଗୃହରେ ହୋଇଥିବା ଆଲୋଚନା ଏହାର ଦିନକ ପରେ ୧୧ ତାରିଖ ସକାଳ ୮ଟା ସମୟରେ ଶେଷ ହୋଇଥିଲା। ଏହା ବିଧାନସଭା ଅଧିକାରୀଙ୍କ ସୂତ୍ରରୁ ଜଣାପଡିଛି। ଏହାପରେ ବୁଧବାର କରାଯାଇଥିବା ଆଲୋଚନା ମଧ୍ୟ ଦୀର୍ଘ ସମୟ ଧରି ହେବା ଘଟଣା ପରେ ଅନେକ ବିଧାୟକ ଏହା ସପକ୍ଷରେ ମତ ରଖିଛନ୍ତି। ସେପଟେ ଗୃହ କାର୍ଯ୍ୟ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ କରାଯାଇଛି। ବିଧାନସଭା ଅଧିବେଶନ ଫେବୃଆରୀ ୧୩ରୁ ଆରମ୍ଭହୋଇ ୨ ଏପ୍ରିଲ ପର୍ଯ୍ୟନ୍ତ ଚାଲିଥିଲା।
