ଏସିଡ୍ ପିଇ ଆତ୍ମହତ୍ୟାକଲେ ଶାଶୂ

ଭୁବନେଶ୍ବର: ଶ୍ୱଶୁର ଘର ସାମ୍ନାରେ ନ୍ୟାୟ ପାଇବା ନିମନ୍ତେ ବୋହୂ ଧାରଣା ଦେଇଥିଲେ । ଏଭଳି ଘଟଣାପରେ ଲୋକଲଜ୍ଜା ସହିନପାରି ଏସିଡ୍ ପିଇ ଶାଶୂ ସୁଷମା ପଣ୍ଡା (୬୦) ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ଘରେ ସୁଷମା ଓ ତାଙ୍କ ସ୍ୱାମୀ ଥିବାବେଳେ ଆଜି ଭୋର ସମୟରେ ସୁଷମା ଶୌଚାଳୟକୁ ଯାଇ ଏସିଡ୍ ପିଇଦେଇଥିଲେ । ପରିବାର ଏହା ଜାଣି ସୁଷମାକୁ ପ୍ରଥମେ ଛତ୍ରପୁର ମେଡିକାଲ ପରେ ଅବସ୍ଥା ସଙ୍କଟାପନ୍ନ ହେବାରୁ ବ୍ରହ୍ମପୁର ମେଡିକାଲକୁ ଚିକିତ୍ସା ପାଇଁ ନେଇଥିଲେ । ଆଜି ସକାଳେ ଏମ୍‌କେସିଜିରେ ଚିକିତ୍ସାଧୀନ ଅବସ୍ଥାରେ ତାଙ୍କ ମୁତ୍ୟୁ ହୋଇଥିଲା । ସୂଚନାଯୋଗ୍ୟ ଯେ ଗଞ୍ଜାମ ଗ୍ରାମର ମଧ୍ୟଖଣ୍ଡ ସାହିରେ ନରାୟଣ ପଣ୍ଡାଙ୍କ ପୁଅ ସୁଜିତ ପଣ୍ଡା ଅଗ୍ନିଶମ ବିଭାଗରେ କାର୍ଯ୍ୟକରୁଛନ୍ତି । ସେ ୨୦୨୧ ମସିହା ୧୮ ତାରିଖରେ ପୁରୁଷୋତ୍ତମପୁର ଥାନା ଅନ୍ତର୍ଗତ ରଣଝାଲି ଗ୍ରାମରେ ଗୋପାଳ ପଣ୍ଡାଙ୍କ ଝିଅ ତନ୍ମୟୀ ପଣ୍ଡାଙ୍କୁ ବିବାହ କରିଥିଲେ । ବିବାହର କିଛିଦିନ ପରେ ଅଧିକ ଯୌତୁକ ପାଇଁ ବୋହୂ ତନ୍ମୟୀଙ୍କୁ ଶ୍ୱଶୁର ଘର ଲୋକମାନେ ମାନସିକ ଓ ଯୌତୁକ ନିର୍ଯାତନା ଦେଇଥିବା ଗଞ୍ଜାମ ଥାନାରେ ଅଭିଯୋଗ ହୋଇଥିଲା । ନିଜର ଯୌତୁକ ସାମଗ୍ରୀ ଫେରାଇ ନଥିବାରୁ ବୋହୂ ତନ୍ମୟୀ ଗତକାଲି ରାତ୍ରି ଠାରୁ ଶ୍ୱଶୁର ଘରେ ଆଗରେ ନ୍ୟାୟ ପାଇଁ ଧାରଣାରେ ବସି ରହିଥିଲେ । ଲୋକଲଜ୍ଜା ସହିନପାରି ଶାଶୂ ସୁଷମା ରବିବାର ସକାଳେ ଶୌଚାଳୟରେ ଥିବା ଏସିଡ୍ ପିଇଦେଇଥିଲେ । ଆଜି ଚିକିତ୍ସାଧୀନ ଅବସ୍ଥାରେ ତାଙ୍କର ଏମ୍‌କେସିଜିରେ ମୃତ୍ୟୁ ହୋଇଥିଲା । ଖବର ପାଇ ଏସ୍‌ଡିପିଓ ଗୌତମ କିଷାନ ଓ ଗଞ୍ଜାମ ଆଇଆଇସି ସୁଦୀପ୍ତ କୁମାର ସାହୁ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ମେଡିକାଲ ଫାଣ୍ଡି ପୁଲିସ ସୁଷମାଙ୍କ ମୃତଦେହ ଜବତକରି ଶବ ବ୍ୟବଚ୍ଛେଦ ନିମନ୍ତେ ପଠାଇଥିଲା । ବ୍ୟବଚ୍ଛେଦ ପରେ ପୁଲିସ ତାଙ୍କ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରିଛି । ଏହି ଘଟଣାରେ ପୁଲିସ ଏକ ଅପମୃତ୍ୟୁ ମାମଲା ରୁଜୁ କରିଛି । ଶାଶୂଙ୍କ ମୃତ୍ୟୁ ପରେ ଧାରଣା ଦେଇଥିବା ବୋହୂ ଫେରାର ହୋଇଯାଇଛନ୍ତି ।