ଫିନଲାଣ୍ଡ ସୀମାରେ ଡ୍ରୋନ୍‌ ଆକ୍ରମଣଗ୍ରସ୍ତ ରୁଷୀୟ ଜାହାଜ; ଅସ୍ଥାୟୀ କଟକଣା ଜାରି

ହେଲସିଙ୍କି: ବାଲ୍ଟିକ ସାଗରରେ ଏକ ରୁଷୀୟ ମାଲବାହୀ ଜାହାଜ ଡ୍ରୋନ୍ ଆକ୍ରମଣର ଶିକାର ହୋଇ ଜଳିବା ପରେ ଭାସି ଆସି ଫିନଲାଣ୍ଡ ସୀମା ଜଳରାଶିରେ ପହଞ୍ଚିଛି। ଏହି ଘଟଣାକୁ ନେଇ ଫିନଲାଣ୍ଡ ପକ୍ଷରୁ ଅସ୍ଥାୟୀ ଆକାଶ ଓ ସାମୁଦ୍ରିକ କଟକଣା ଜାରି କରାଯାଇଥିବା ବେଳେ ଆକ୍ରମଣ ପଛରେ ୟୁକ୍ରେନର ସମ୍ପୃକ୍ତି ଥାଇପାରେ ବୋଲି ଅନୁମାନ କରାଯାଉଛି। ଫିନଲାଣ୍ଡ ପ୍ରତିରକ୍ଷା ବାହିନୀ ସୂଚନା ମୁତାବକ, ‘ସ୍ପାର୍ଟା-୨’ ନାମକ ଏହି ଜାହାଜଟି ରୁଷର କାଲିନିଙ୍ଗ୍ରାଡ୍ ଅଭିମୁଖେ ଯାଉଥିବା ବେଳେ ଗୋଗଲ୍ୟାଣ୍ଡ ଦ୍ୱୀପର ପଶ୍ଚିମ ଆନ୍ତର୍ଜାତିକ ଜଳରାଶିରେ କ୍ଷତିଗ୍ରସ୍ତ ହୋଇଥିଲା। ରୁଷୀୟ ଅଧିକାରୀମାନଙ୍କ ପୂର୍ବ ବୟାନ ମଧ୍ୟ ଏହାକୁ ସମର୍ଥନ କରୁଛି। ଫିନଲାଣ୍ଡ ସଶସ୍ତ୍ର ବାହିନୀର ମୁଖପାତ୍ର ଆକି-ମୌରି ହୁହ୍‌ତିନେନ୍ କହିଛନ୍ତି ଯେ ଏହି ଆକ୍ରମଣ ପଛରେ ୟୁକ୍ରେନର ହାତ ରହିଥିବା ସମ୍ଭାବନା ଅଛି। ଅନ୍ୟପକ୍ଷରେ, ସାମୁଦ୍ରିକ ଯାତାୟାତ କିମ୍ବା ସାଧାରଣ ଲୋକଙ୍କ ପ୍ରତି କୌଣସି ବିପଦ ନଥିବା ଫିନଲାଣ୍ଡ ସୀମା ରକ୍ଷା ବାହିନୀ ସ୍ପଷ୍ଟ କରିଛି। ଘଟଣାସ୍ଥଳରେ ଉଦ୍ଧାରକାରୀ ଦଳ ମୁତୟନ ହୋଇଥିବା ବେଳେ ପଡ଼ୋଶୀ ରାଷ୍ଟ୍ରମାନଙ୍କ ସହ ସମନ୍ୱୟ ରକ୍ଷା କରି କାର୍ଯ୍ୟାନୁଷ୍ଠାନ ନିଆଯାଉଛି। ଫିନଲାଣ୍ଡ ଉପସାଗରର ତଟରକ୍ଷୀ ବାହିନୀର କମାଣ୍ଡର ମିକ୍କୋ ସିମୋଲା କହିଛନ୍ତି ଯେ ଜାହାଜଟି ଲଙ୍ଗର ପକାଇ ଅଟକି ରହିଛି ଏବଂ କର୍ମଚାରୀମାନଙ୍କୁ ସୁରକ୍ଷିତ ସ୍ଥାନକୁ ନିଆଯାଉଛି। ସାଧାରଣ ନାଗରିକଙ୍କ ସୁରକ୍ଷା ଏବଂ ଆବଶ୍ୟକ ସ୍ଥଳେ ଡ୍ରୋନ୍‌କୁ ପ୍ରତିହତ କରିବା ଲାଗି ଫିନଲାଣ୍ଡ ଉପସାଗରର ପୂର୍ବାଞ୍ଚଳରେ ଅସ୍ଥାୟୀ ବିମାନ ଓ ସାମୁଦ୍ରିକ କଟକଣା ଲାଗୁ କରାଯାଇଥିବା ହେଲସିଙ୍କି ପ୍ରଶାସନ ପକ୍ଷରୁ ସୂଚନା ଦିଆଯାଇଛି।

Related Articles

Leave a Reply

Your email address will not be published. Required fields are marked *

Back to top button