ଟିମ୍ ଇଣ୍ଡିଆକୁ ବଡ଼ ଝଟ୍କା: ଆଫଗାନିସ୍ତାନ ଦିନିକିଆ ସିରିଜ୍ରୁ ବାଦ୍ ପଡ଼ିଲେ ବିରାଟ କୋହଲି
ନୂଆଦିଲ୍ଲୀ: ଆସନ୍ତା ଜୁନ୍ ୧୩ ତାରିଖରୁ ଆଫଗାନିସ୍ତାନ ବିପକ୍ଷରେ ଭାରତ ୩ଟି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ଖେଳିବାକୁ ଥିବାବେଳେ ଏହା ପୂର୍ବରୁ ଟିମ୍ ଇଣ୍ଡିଆକୁ ଏକ ବଡ଼ ଝଟ୍କା ଲାଗିଛି। ଦଳର ତାରକା ବ୍ୟାଟ୍ସମ୍ୟାନ୍ ବିରାଟ କୋହଲି ଏହି ଦିନିକିଆ ସିରିଜ୍ରୁ ବାଦ୍ ପଡ଼ିଛନ୍ତି। ‘ପିଟିଆଇ’ (PTI)ର ଏକ ସୂତ୍ର ଅନୁଯାୟୀ, କୋହଲି ହାମଷ୍ଟ୍ରିଙ୍ଗ୍ (ମାଂସପେଶୀ ଜନିତ) ଆଘାତର ଶିକାର ହୋଇଛନ୍ତି, ଯେଉଁଥିପାଇଁ ସେ ଏହି ସିରିଜ୍ ଖେଳିପାରିବେ ନାହିଁ। ଆଇପିଏଲ୍ ୨୦୨୬ ର ଫାଇନାଲ୍ ମ୍ୟାଚ୍ରେ ବିରାଟ ଶେଷ ପର୍ଯ୍ୟନ୍ତ ବ୍ୟାଟିଂ କରିଥିଲେ। ସେତେବେଳେ ସେ ସମ୍ପୂର୍ଣ୍ଣ ସୁସ୍ଥ ଥିବା ଜଣାପଡ଼ୁଥିଲେ। ଏଭଳି ପରିସ୍ଥିତିରେ ତାଙ୍କୁ କେତେବେଳେ ଏବଂ କେମିତି ଏହି ଆଘାତ ଲାଗିଲା, ସେ ନେଇ ପ୍ରଶ୍ନ ଉଠୁଛି। ଆଇପିଏଲ୍ ସରିବା ପରେ ବିରାଟ ବୃନ୍ଦାବନ ଯାଇ ପ୍ରେମାନନ୍ଦ ମହାରାଜଙ୍କ ଦର୍ଶନ କରିଥିଲେ ଏବଂ ପରେ ଦିଲ୍ଲୀରୁ ମୁମ୍ବାଇ ଯାତ୍ରା କରିଥିଲେ। ବିସିସିଆଇ (BCCI) ସୂତ୍ରକୁ ଉଦ୍ଧୃତ କରି ପିଟିଆଇ ରିପୋର୍ଟ କରିଛି ଯେ, ଆଘାତ ଜନିତ ସମସ୍ୟା ଯୋଗୁଁ ବିରାଟ ଏହି ଦିନିକିଆ ସିରିଜ୍ରୁ ଦୂରେଇ ରହିବେ। ସିରିଜ୍ ପାଇଁ ପୂର୍ବରୁ ହିଁ ଭାରତୀୟ ଦଳ ଘୋଷଣା ସରିଥିବା ବେଳେ ଏବେ ବିସିସିଆଇକୁ ବିରାଟଙ୍କ ବିକଳ୍ପ ଖେଳାଳି ଖୋଜିବାକୁ ପଡ଼ିବ। ତେବେ ଏହି ପ୍ରସଙ୍ଗରେ ବିସିସିଆଇ ପକ୍ଷରୁ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ବୟାନ ବା ସୂଚନା ଜାରି କରାଯାଇ ନାହିଁ।
