ଟ୍ରମ୍ପଙ୍କ ଆଗରେ ଗର୍ଜିଲେ ଥରୁର

ନୂଆଦିଲ୍ଲୀ: କଂଗ୍ରେସ ଏମପି ଶଶି ଥରୁରଙ୍କ ନେତୃତ୍ୱରେ ଏକ ସର୍ବଦଳୀୟ ପ୍ରତିନିଧି ଦଳ ଆମେରିକା ସମେତ ପାଞ୍ଚଟି ଦେଶରେ ଭାରତର ଆତଙ୍କବାଦ ବିରୋଧୀ ନୀତି ଏବଂ ଦୃଢ଼ ଆଭିମୁଖ୍ୟକୁ ବିଶ୍ୱ ସମୁଦାୟ ଆଗରେ ଉପସ୍ଥାପନ କରିବା ପାଇଁ ଗସ୍ତ କରୁଛନ୍ତି। ଏହି ପ୍ରତିନିଧି ଦଳ ଗୁୟାନା, ପାନାମା, କଲମ୍ବିଆ, ବ୍ରାଜିଲ ଏବଂ ଆମେରିକା ପରିଦର୍ଶନ କରି ଆତଙ୍କବାଦ ବିରୁଦ୍ଧରେ ଭାରତର ଅନୁଭବ ଏବଂ ନୀତିକୁ ସ୍ପଷ୍ଟ କରିବେ। ଶଶି ଥରୁର ଏକ ଭିଡିଓ ବାର୍ତ୍ତାରେ କହିଛନ୍ତି, “ଆମେ ପାଞ୍ଚଟି ଦେଶକୁ ଯାଉଛୁ ଏକ ସର୍ବଦଳୀୟ ପ୍ରତିନିଧି ଦଳର ନେତୃତ୍ୱ ନେଇ, ଯେଉଁଠାରେ ଆମେ ଦେଶ ପାଇଁ କହିବୁ, ଆମେ ଯେଉଁ ଭୟଙ୍କର ସଙ୍କଟର ସମ୍ମୁଖୀନ ହୋଇଛୁ, ଯେଉଁଠାରେ ଆମ ଦେଶ ଆତଙ୍କବାଦୀମାନଙ୍କ ଦ୍ୱାରା ନିର୍ମମ ଭାବେ ଆକ୍ରମଣର ଶିକାର ହୋଇଛି, ତାହା ବିଷୟରେ ଆଲୋଚନା କରିବୁ।” ସେ ଆହୁରି କହିଛନ୍ତି, “ଆମେ ଆଶା କରୁଛୁ ଯେ ଏହି ଆତଙ୍କବାଦୀ ଆକ୍ରମଣର ପରିଚାଳନା କରୁଥିବା ଏବଂ ଏହାକୁ ଅର୍ଥ, ପ୍ରଶିକ୍ଷଣ, ପ୍ରସ୍ତୁତି ଏବଂ ନିର୍ଦ୍ଦେଶ ଦେଉଥିବା ଲୋକମାନେ ଏଥିରୁ ଶିକ୍ଷା ନେଇଥିବେ। ଆମେ ବିଶ୍ୱକୁ ଏହା ମଧ୍ୟ ଜଣାଇବାକୁ ଚାହୁଁଛୁ ଯେ ଯଦି ଏପରି ଘଟଣା ପୁନରାବୃତ୍ତି ହୁଏ, ଆମେ ଚୁପ ରହିବୁ ନାହିଁ।”