ଅମିତ ଶାହାଙ୍କ ନକଲି ଭିଡିଓ ମାମଲା: ୧୬ ନେତା ଙ୍କୁ ସମନ

ନୂଆଦିଲ୍ଲୀ: କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ନକଲି ଭିଡିଓ ସହ ଜଡିତ ମାମଲାରେ ଦିଲ୍ଲୀ ପୋଲିସ ତେଲେଙ୍ଗାନା ମୁଖ୍ୟମନ୍ତ୍ରୀ ରେଭନ୍ତ ରେଡ୍ଡୀଙ୍କ ସମେତ ସାତୋଟି ରାଜ୍ୟର ୧୬ ଜଣ ନେତାଙ୍କୁ ନୋଟିସ କରିଛି। ମାମଲାର ତଦନ୍ତ ପାଇଁ ପୋଲିସ ରାଜସ୍ଥାନ, ଝାଡଖଣ୍ଡ, ନାଗାଲାଣ୍ଡ, ଉତ୍ତରପ୍ରଦେଶ, ହରିୟାଣା ଏବଂ ମଧ୍ୟପ୍ରଦେଶକୁ ଯାଇଛି। ସୂଚନାନୁସାରେ, ଉତ୍ତରପ୍ରଦେଶର ସମାଜବାଦୀ ପାର୍ଟି (ଏସପି) ର ଲୋକସଭା ପ୍ରାର୍ଥୀ, ରାଜସ୍ଥାନ ଏବଂ ନାଗାଲାଣ୍ଡର ଦୁଇ କଂଗ୍ରେସ ନେତାଙ୍କୁ ମଧ୍ୟ ମୋବାଇଲ୍ ଫୋନ୍ ସହ ପୋଲିସ ନିକଟରେ ହାଜର ହେବାକୁ କୁହାଯାଇଛି। ଉଲ୍ଲେଖଥାଉ କି, ସୋମବାର ଦିନ ରେଭନ୍ତ ରେଡ୍ଡୀ ସହିତ ତେଲେଙ୍ଗାନା ପ୍ରଦେଶ କଂଗ୍ରେସ କମିଟି (ଟିଆରପିସି) ସଦସ୍ୟ ଶିବ କୁମାର ଅମ୍ବାଲା, ଅସମା ତସଲିମ, ସତୀଶ ମନେ ଏବଂ ନବୀନ ପଟେମଙ୍କୁ ମେ ୧ ତାରିଖରେ ପୋଲିସ ନିକଟରେ ହାଜର ହେବାକୁ କୁହାଯାଇଛି। ରବିବାର ଦିନ ବିଜେପି ଏବଂ ଗୃହ ମନ୍ତ୍ରଣାଳୟ (ଏମଏଚଏ) ଙ୍କ ଅଭିଯୋଗ ପାଇବା ପରେ ଦିଲ୍ଲୀ ପୋଲିସ ଏକ ମାମଲା ରୁଜୁ କରିଛି। ଏହା ପରେ ଦିଲ୍ଲୀ ପୋଲିସ୍ ସ୍ପେଶାଲ୍ ସେଲ୍ ସାଇବର ୱିଙ୍ଗର IFSO ୟୁନିଟ୍ ମଧ୍ୟ ଏକ ଏଫ୍ଆଇଆର୍ ପଞ୍ଜିକରଣ କରିଥିଲା। FIR ର କପି ଅନୁଯାୟୀ ଗୃହ ମନ୍ତ୍ରଣାଳୟ ଅଭିଯୋଗରେ କହିଛି ଯେ ଫେସବୁକ୍ ଏବଂ ଟ୍ୱିଟରରେ କିଛି ନକଲି ଭିଡିଓ ପ୍ରଚାର କରାଯାଉଥିବା ଜଣାପଡିଛି। ଗୃହ ମନ୍ତ୍ରଣାଳୟ କୁହାଯାଇଥିଲା ଯେ, “ଭିଡିଓରେ ଟ୍ୟାମ୍ପରିଂ କରାଯାଇଛି। ଏଥିରେ ବିଭ୍ରାନ୍ତିକର ସୂଚନା ସମ୍ପ୍ରଦାୟ ମଧ୍ୟରେ ଅସଙ୍ଗତି ସୃଷ୍ଟି କରିବା ଉଦ୍ଦେଶ୍ୟରେ ବିସ୍ତାର ହେଉଛି। ଏହା ଶାନ୍ତି ଏବଂ ଶୃଙ୍ଖଳା ଉପରେ ପ୍ରଭାବ ପକାଇବାର ସମ୍ଭାବନା ରହିଛି।” ମନ୍ତ୍ରଣାଳୟ ଆହୁରି ଅନୁରୋଧ କରିଛି ଯେ, ଦୟାକରି ଆଇନର ବ୍ୟବସ୍ଥା ଅନୁଯାୟୀ ଆବଶ୍ୟକ ପଦକ୍ଷେପ ଗ୍ରହଣ କରନ୍ତୁ। ଉଲ୍ଲେଖ ଯୋଗ୍ୟ ଯେ, ସୋସିଆଲ ମିଡିଆରେ ଏକ ଭିଡିଓ ସାମ୍ନାକୁ ଆସିଥିଲା। ଯେଉଁଥିରେ ଗୃହମନ୍ତ୍ରୀ ଅମିତ ଶାହାଙ୍କୁ ଅନୁସୂଚିତ ଜାତି (ଏସସି), ଅନୁସୂଚିତ ଜନଜାତି (ଏସଟି) ଏବଂ ଅନ୍ୟାନ୍ୟ ପଛୁଆ ବର୍ଗ (ଓବିସି) ପାଇଁ ସଂରକ୍ଷଣ ବ୍ୟବସ୍ଥା ବାତିଲ କରିବାକୁ କୁହାଯାଇଥିବା ଦର୍ଶାଯାଇଛି।