ଇଞ୍ଜିନିୟର ଶ୍ୱେତା ଆତ୍ମହତ୍ୟା ମାମଲା: କୋର୍ଟରେ ଆତ୍ମସମର୍ପଣ କରିପାରନ୍ତି ସୌମ୍ୟ
ଭୁବନେଶ୍ୱର: ଇଞ୍ଜିନିୟର ଶ୍ୱେତା ଉତ୍କଳ ଭାରତୀ ଆତ୍ମହତ୍ୟା ମାମଲାରେ ପୁରୁଷ ବନ୍ଧୁ ସୌମ୍ୟଙ୍କ ଅଡୁଆ ବଢିବାରେ ଲାଗିଛି । ପୁଲିସ ତଦନ୍ତ ଯେତେ ଆଗକୁ ବଢାଉଛିି ସେତେ ଗୋଟିଏ ପରେ ଗୋଟିଏ ନୂଆ ତଥ୍ୟ ପଦାକୁ ଆସୁଛି । ଭଲ ପାଇବା ଆଳରେ ସୌମ୍ୟଜିତ୍ ଟଙ୍କା ଲୁଟୁଥିବା ସ୍ପଷ୍ଟ ପ୍ରମାଣ ହୋଇଛି । କାରଣ ଶ୍ୱେତା ଭଲ ଚାକିରି କରି ମୋଟା ରକମର ଦରମା ପାଉଥିଲେ । ମାସକୁ ଶ୍ୱେତା ୪୦ରୁ ୫୦ ହଜାର ଟଙ୍କା ଦରମା ପାଇବା ସହ ସୁଖର ଜୀବନ ବଞ୍ଚୁଥିଲେ । କିନ୍ତୁ ଶ୍ୱେତା କାହିଁକି ୨ଲକ୍ଷ ୩୦ ହଜାର ଟଙ୍କାର ବ୍ୟାଙ୍କ୍ ଲୋନ୍ କରିଥିଲେ? ଏ ସମ୍ପର୍କରେ ପରିବାର ଲୋକଙ୍କୁ ମଧ୍ୟ ସେ ଜଣାଇନଥିଲେ । ପୁଲିସ ବ୍ୟାଙ୍କ୍ରେ ପଚରାଉଚରା କରିବା ପରେ ଏଭଳି ଲୋନ୍ ନେବା ଘଟଣା ପଦାକୁ ଆସିଛି । ଶ୍ୱେତା ଲୋନ୍ ନେବା ସମୟରେ ମଧ୍ୟ ପ୍ରେମିକ ସୌମ୍ୟଜିତ୍ ଉପସ୍ଥିତ ରହିଥିବା ପୁଲିସ ସିସିଟିଭି ଫୁଟେଜ ଯାଞ୍ଚ ବେଳେ ଜାଣିବାକୁ ପାଇଛି । ଏତେ ଅୟସ ଆରାମରେ ବଞ୍ଚୁଥିବା ଜଣେ ଜଣେ ଯୁବତୀଙ୍କର ଲୋନ୍ କରିବାର କ’ଣ ଆବଶ୍ୟକତା ପଡ଼ିଲା ବୋଲି ପରିବାର ଲୋକେ ପ୍ରଶ୍ନ କରିଛନ୍ତି । ଶ୍ୱେତା କରିଥିବା ଲୋନ୍ ଟଙ୍କା କେଉଁଠି ବିନିଯୋଗ କରିଛନ୍ତି, ସେନେଇ ମଧ୍ୟ ପୁଲିସ ଖୋଳତାଡ଼ କରୁଛି । ଶ୍ୱେତାଙ୍କୁ ଲୋନ୍ କରିବା ପାଇଁ ସୌମ୍ୟଜିତ୍ ଚାପ ପକାଇଥିବା ପୁଲିସ ସନ୍ଦେହ କରୁଛି । ଏପରିକି ଏହି ଟଙ୍କାକୁ ମଧ୍ୟ ସୌମ୍ୟଜିତ୍ ନେଇଥିବା ପରିବାର ଲୋକ ଅଭିଯୋଗ କରିଛନ୍ତି । ପୁଲିସ ସବୁଦିଗକୁ ନେଇ ଖୋଳତାଡ଼ କରିବ ବୋଲି ଜଣାପଡ଼ିଛି । ଅନ୍ୟପଟରେ ପୁଲିସ ସୌମ୍ୟ ଏବଂ ସେମାନଙ୍କ ପରିବାର ଲୋକଙ୍କୁ ପଚରାଉଚରା କରିବାକୁ ଚେଷ୍ଟା କରୁଛି । ଏପରିକି ଚନ୍ଦ୍ରଶେଖରପୁର ଥାନାର ତଦନ୍ତ ଅଧିକାରୀ ଦୁଇଥର ତାଙ୍କ ଘରକୁ ଯାଇଥିଲେ ମଧ୍ୟ ସେମାନଙ୍କର ପତ୍ତା ମିଳୁନି । ପୁଲିସ ନଜରରେ ସୌମ୍ୟ ରହିଥିବା ବେଳେ ପରିବାର ଲୋକ ତଦନ୍ତରେ ସହଯୋଗ କରୁଥିବା ପୁଲିସର ବରିଷ୍ଠ ଅଧିକାରୀମାନେ କହିଛନ୍ତି । ତେବେ ବାସ୍ତବ ଚିତ୍ର କିଛି ଭିନ୍ନ ଦେଖିବାକୁ ମିଳିଛି । ସୌମ୍ୟଜିତ୍ ଏବଂ ତାଙ୍କ ପରିବାର ଲୋକେ ଫୋନ୍ ବନ୍ଦ କରି ଘରେ ତାଲା ପକାଇ ସେଠାରୁ ଚାଲିଯାଇଛନ୍ତି । ତେଣୁ ପୁଲିସ ସୌମ୍ୟଜିତ୍ଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ଛାନ୍ଭିନ୍ କରୁଛି ।
ସୌମ୍ୟଜିତ୍ଙ୍କ ବିରୋଧରେ ପୁଲିସ ୩୦୬ରେ ଏକ ମାମଲା କରିଛି । ତେଣୁ ଏହି ମାମଲାରେ ସୌମ୍ୟଜିତ୍ ଆଗୁଆ ଜାମିନ୍ ପାଇଁ ହାଇକୋର୍ଟରେ ଆବେଦନ କରିଛନ୍ତି । କିନ୍ତୁ ୩୦୬ ମାମଲାରେ ହାଇକୋର୍ଟ ଜାମିନ୍ ଦେବେନାହିଁ । ଫଳରେ ଏସ୍ଡିଜେଏମ୍ କୋର୍ଟରେ ଅଭିଯୁକ୍ତଙ୍କୁ ଆତ୍ମସମର୍ପଣ କରିବାକୁ ନିର୍ଦ୍ଦେଶ ଦେଇପାରନ୍ତି । ଅଭିଯୁକ୍ତ କୋର୍ଟରେ ଆତ୍ମସମର୍ପଣ କରିବା ପରେ ଜାମିନ୍ ମିଳିପାରେ । ତେଣୁ ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ଅନୁସାରେ ସୌମ୍ୟଜିତ୍ ଦୁଇ ଦିନ ଭିତରେ ତଳ କୋର୍ଟରେ ଆତ୍ମସମର୍ପଣ କରିପାରନ୍ତି । ଅନ୍ୟପଟରେ ମଧ୍ୟ ଶ୍ୱେତାଙ୍କ ପରିବାର ମଧ୍ୟସୌମ୍ୟଙ୍କ ଜାମିନ୍ ଆବେଦନକୁ ଖାରଜ କରିବା ପାଇଁ କୋର୍ଟରେ ଆବେଦନ କରିବେ ବୋଲି କହିଛନ୍ତି ।
