ଅଦାନୀ ବିଶ୍ୱର ୩ୟ ଧନଶାଳୀ ବ୍ୟକ୍ତି
ନୂଆଦିଲ୍ଲୀ: ଭାରତର ବିଶିଷ୍ଟ ଶିଳ୍ପପତି ତଥା ଅଦାନୀ ଗ୍ରୁପ୍ ଅଧ୍ୟକ୍ଷ ଗୌତମ ଅଦାନୀ ବିଶ୍ୱର ୩ୟ ଧନଶାଳୀ ବ୍ୟକ୍ତିଭାବେ ମାନ୍ୟତାଲାଭ କରିଛନ୍ତି । ଏଥିସହିତ ପ୍ରଥମ ଥର ଏସିଆର କୌଣସି ଶିଳ୍ପପତି ଶ୍ରେଷ୍ଠ ତିନି ତାଲିକାରେ ସାମିଲ ହୋଇପାରିଛନ୍ତି । ପୂର୍ବରୁ ଚୀନ୍ର ଜ୍ୟାକ୍ ମା ଓ ଭାରତର ମୁକେଶ ଅମ୍ବାନୀ ଧନଶାଳୀ ତାଲିକାରେ ଥିଲେ ସୁଦ୍ଧା ଶ୍ରେଷ୍ଠ ୩ରେ ପହଞ୍ଚି ପାରିନଥିଲେ । ଅଦାନୀଙ୍କ ମୋଟ ସମ୍ପତ୍ତିର ପରିମାଣ ୧୩୭.୪ ବିଲିୟନ ଡଲାର ବୋଲି ଆକଳନ କରାଯାଇଛି । ଭାରତୀୟ ମୁଦ୍ରାରେ ଏହା ପ୍ରାୟ ୧୧ ଲକ୍ଷ କୋଟି ଟଙ୍କା ହେବ । ବର୍ତ୍ତମାନ ଅଦାନୀଙ୍କ ଉପରେ କେବଳ ଆମେରିକାର ଏଲୋନ ମସ୍କ୍ ଓ ଜେଫ୍ ବୋଜେସ୍ ରହିଛନ୍ତି । ଅଦାନୀଙ୍କ କମ୍ପାନୀ ବର୍ତ୍ତମାନ କୋଇଲଠାରୁ ଆରମ୍ଭ କରି ସିମେଣ୍ଟ, ମିଡିଆ, ଆଲୁମିନିୟମ ସେକ୍ଟରରେ ପୁଞ୍ଜି ନିବେଶ କରୁଛି । ଭାରତରେ ଘରୋଇ ଉଦ୍ୟୋଗରେ ପରିଚାଳିତ ଅଧିକାଂଶ ବନ୍ଦର ଓ ଏୟାରପୋର୍ଟର ମାଲିକାନା ସ୍ୱତ୍ୱ ଅଦାନୀ ଗ୍ରୁପ୍ ନିକଟରେ ରହିଛି । ନିକଟରେ ଭାରତ ସରକାରଙ୍କ ପକ୍ଷରୁ ୫ଜି ଇଣ୍ଟରନେଟ୍ ସେବା ଯୋଗାଇବା ପାଇଁ ନିଲାମ ପ୍ରକ୍ରିୟା ଅନୁଷ୍ଠିତ ହୋଇଥିବାବେଳେ ରିଲାଏନ୍ସ ଜିଓ, ଏୟାରଟେଲ୍ ଓ ଭଡାଫୋନ୍ ସମେତ ଅଦାନୀ ଗ୍ରୁପ୍କୁ ମଧ୍ୟ ସୁଯୋଗ ମିଳିଛି ।
