ପ୍ରଖ୍ୟାତ ଅର୍ଥନୀତିଜ୍ଞ ଅଭିଜିତ ସେନ୍ଙ୍କ ପରଲୋକ
ନୂଆଦିଲ୍ଲୀ: ବିଶିଷ୍ଟ ଅର୍ଥନୀତିଜ୍ଞ ତଥା ଯୋଜନା କମିଶନ୍ର ପୂର୍ବତନ ସଦସ୍ୟ ଅଭିଜିତ ସେନଙ୍କର ସୋମବାର ରାତିରେ ହୃଦଘାତରେ ପରଲୋକ ହୋଇଯାଇଛି । ତାଙ୍କୁ ୭୨ ବର୍ଷ ବୟସ ହୋଇଥିଲା । ଦିଲ୍ଲୀର ସେଣ୍ଟ୍ ଷ୍ଟିଫେନ୍ସ କଲେଜରୁ ପଦାର୍ଥ ବିଜ୍ଞାନରେ ସ୍ନାତକ ଏବଂ ଇଂଲଣ୍ଡର କେମ୍ବ୍ରିଜ ବିଶ୍ୱବିଦ୍ୟାଳୟରୁ ଅର୍ଥନୀତିରେ ପିଏଚ୍.ଡି ଡିଗ୍ରୀ ହାସଲ କରିଥିଲେ । ଅଭିଜିତ କିଛିବର୍ଷ ଜେଏନ୍ୟୁରେ ଅର୍ଥନୀତି ପ୍ରଫେସରଭାବେ କାର୍ଯ୍ୟ ମଧ୍ୟ କରିଥିଲେ । ତେବେ ମନମୋହନ ସିଂହଙ୍କ ପ୍ରଧାନମନ୍ତ୍ରିତ୍ୱ କାଳରେ ସେ ୨୦୦୪ରୁ ୨୦୧୪ ପର୍ଯ୍ୟନ୍ତ ଯୋଜନା କମିଶନ ସଦସ୍ୟଭାବେ କାର୍ଯ୍ୟ କରିଥିଲେ । ଗ୍ରାମୀଣ ଅର୍ଥନୀତି ଉପରେ ତାଙ୍କର ଯଥେଷ୍ଟ ପାରଦର୍ଶିତା ରହିଥିଲା । ଦେଶବିଦେଶର ବିଭିନ୍ନ ପତ୍ର ପତ୍ରିକା, ଜର୍ଣ୍ଣାଲରେ ତାଙ୍କର ଏକାଧିକ ଉପାଦେୟ ପ୍ରବନ୍ଧ ପ୍ରକାଶିତ ହୋଇସାରିଛି ।
