ନଭେମ୍ବର ୧୪ ଯାଏଁ ସାଉଦି ଆରବକୁ ଏୟାର ଇଣ୍ଡିଆ ବିମାନ ଚଳାଚଳ ବାତିଲ

ନୂଆଦିଲ୍ଲୀ: ପଶ୍ଚିମ ଏସିଆରେ କ୍ରମାଗତ ଭାବେ ବୃଦ୍ଧି ପାଉଥିବା ଭୂ-ରାଜନୈତିକ ଉତ୍ତେଜନା ଓ ଯୁଦ୍ଧ ପରିସ୍ଥିତି ଏବେ ବିମାନ ଚଳାଚଳ ଉପରେ ଗଭୀର ପ୍ରଭାବ ପକାଇଛି। ଯାତ୍ରୀ ଏବଂ ବିମାନର ସୁରକ୍ଷାକୁ ସର୍ବାଧିକ ପ୍ରାଥମିକତା ଦେଇ ଏୟାର ଇଣ୍ଡିଆ ଏବଂ ଏୟାର ଇଣ୍ଡିଆ ଏକ୍ସପ୍ରେସ୍ ପକ୍ଷରୁ ସାଉଦି ଆରବକୁ ସଂଯୋଗ କରୁଥିବା ଉଡ଼ାଣଗୁଡ଼ିକର ବାତିଲ ଅବଧିକୁ ଆହୁରି ବୃଦ୍ଧି କରାଯାଇଛି। ଘୋଷଣା ଅନୁଯାୟୀ, ଆଗାମୀ ନଭେମ୍ବର ୧୪, ୨୦୨୬ ପର୍ଯ୍ୟନ୍ତ ଜେଦ୍ଦା, ରିୟାଦ ଏବଂ ଦମ୍ମାମକୁ ଯିବା ଓ ସେଠାରୁ ଭାରତକୁ ଫେରିବାକୁ ଥିବା ସମସ୍ତ ବିମାନ ଚଳାଚଳ ସ୍ଥଗିତ ରହିବ। ଏହି କାରଣରୁ ସାଉଦି ଆରବକୁ ଯାତ୍ରା କରିବାକୁ ଥିବା ହଜାର ହଜାର ଯାତ୍ରୀ ବିଭିନ୍ନ ଅସୁବିଧାର ସମ୍ମୁଖୀନ ହୋଇପାରନ୍ତି। ତେବେ ଯାତ୍ରୀମାନଙ୍କୁ ସୁବିଧା ପ୍ରଦାନ କରିବା ପାଇଁ ଏୟାରଲାଇନ୍ସ କର୍ତ୍ତୃପକ୍ଷଙ୍କ ପକ୍ଷରୁ ଟିକେଟ୍ ଟଙ୍କା ଫେରସ୍ତ (ରିଫଣ୍ଡ) ଏବଂ ବିନା ମୂଲ୍ୟରେ ଯାତ୍ରା ତାରିଖ ପରିବର୍ତ୍ତନ କରିବାର ବ୍ୟବସ୍ଥା ଘୋଷଣା କରାଯାଇଛି। ସାମ୍ପ୍ରତିକ ସ୍ଥିତିକୁ ଦୃଷ୍ଟିରେ ରଖି ଏହି କଠିନ ନିଷ୍ପତ୍ତି ନିଆଯାଇଥିବା ବିମାନ କମ୍ପାନୀ ପକ୍ଷରୁ ସ୍ପଷ୍ଟ କରାଯାଇଛି। ପଶ୍ଚିମ ଏସିଆରେ ଅସ୍ଥିରତା ବଢ଼ିବା ସହ ସାଉଦି ଆରବର ବିମାନବନ୍ଦର ଏବଂ ପ୍ରମୁଖ ଭିତ୍ତିଭୂମି ଉପରେ ଆକ୍ରମଣ ଆଶଙ୍କା ରହିଥିବାରୁ ଏଭଳି ପଦକ୍ଷେପ ନିଆଯାଇଛି। ପୂର୍ବରୁ ରିୟାଦ ଓ ଦମ୍ମାମକୁ ନଭେମ୍ବର ୭ ପର୍ଯ୍ୟନ୍ତ ଏବଂ ଜେଦ୍ଦାକୁ ଅକ୍ଟୋବର ୩୧ ପର୍ଯ୍ୟନ୍ତ ଉଡ଼ାଣ ବାତିଲ ହୋଇଥିଲା। କିନ୍ତୁ ପରିସ୍ଥିତିରେ କୌଣସି ସୁଧାର ନ ଆସିବାରୁ ଏହି ଅବଧିକୁ ଆଗାମୀ ନଭେମ୍ବର ୧୪ ଯାଏଁ ବଢ଼ାଇ ଦିଆଯାଇଛି। କେବଳ ଏୟାର ଇଣ୍ଡିଆ ନୁହେଁ, ବରଂ ଇଣ୍ଡିଗୋ ଏବଂ ଆକାସା ଏୟାର ଭଳି ଅନ୍ୟାନ୍ୟ ବିମାନ ସଂସ୍ଥା ମଧ୍ୟ ସାଉଦି ଆରବକୁ ସେମାନଙ୍କର କିଛି ନିର୍ଦ୍ଦିଷ୍ଟ ଉଡ଼ାଣ ବାତିଲ କରିଛନ୍ତି।