ଏସିଆ କପ୍ ଦଳରେ ସାମିଲ ହେଲେନି ଶ୍ରେୟସ ଆୟର

ନୂଆଦିଲ୍ଲୀ: ଭାରତୀୟ କ୍ରିକେଟ୍ ଦଳର ପୂର୍ବତନ ସହାୟକ ପ୍ରଶିକ୍ଷକ ଅଭିଷେକ ନାୟାର ବୁଝିପାରୁ ନାହାଁନ୍ତି ଯେ, ଶ୍ରେୟସ ଆୟରଙ୍କୁ ଏସିଆ କପ୍ ଦଳରୁ କାହିଁକି ବାଦ ଦିଆଯାଇଛି। ବିସିସିଆଇ ମଙ୍ଗଳବାର ଏହି ଟୁର୍ଣ୍ଣାମେଣ୍ଟ ପାଇଁ ଏକ ୧୫ ଜଣିଆ ଦଳ ଘୋଷଣା କରିଛି। ଅଭିଷେକ ନାୟାର ‘ଜିଓହଟଷ୍ଟାର’ରେ କହିଛନ୍ତି ଯେ, ” ଶ୍ରେୟସ ଆୟରଙ୍କୁ ୨୦ ଜଣିଆ ଦଳରେ ସାମିଲ ନକରିବାର କାରଣ କ’ଣ ହୋଇପାରେ, ମୁଁ ତାହା ମୁଁ ବୁଝିପାରୁନାହିଁ। ମୁଁ ଚୂଡ଼ାନ୍ତ ୧୫ ଜଣଙ୍କ ବିଷୟରେ କହୁନାହିଁ, ବରଂ ୨୦ ଜଣଙ୍କ ବିଷୟରେ କହୁଛି, ଯାହା ସ୍ପଷ୍ଟ ଭାବରେ ବାର୍ତ୍ତା ଦେଉଛି ଯେ, ଶ୍ରେୟସ ଆୟର ଚୟନକାରୀଙ୍କ ଯୋଜନାରେ ନାହାନ୍ତି, ଅତି କମରେ ଟି୨୦ ଫର୍ମାଟ ଦୃଷ୍ଟିକୋଣରୁ ନୁହେଁ।” ଚୟନକାରୀମାନେ ଟେଷ୍ଟ ଦଳର ଅଧିନାୟକ ଶୁଭମନ ଗିଲଙ୍କୁ ଏସିଆ କପ୍ ଦଳରେ ସାମିଲ କରିଛନ୍ତି। ଶୁଭମନ ଗିଲ୍ ଜୁଲାଇ ୨୦୨୪ ପରଠାରୁ ଟି୨୦ ମ୍ୟାଚ୍ ଖେଳି ନାହାଁନ୍ତି। ଏପରି ପରିସ୍ଥିତିରେ ଗିଲଙ୍କ ଚୟନ ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା। ଶ୍ରେୟସ ଆୟର ଆଇପିଏଲ-୨୦୨୫ ରେ ଚମତ୍କାର ପ୍ରଦର୍ଶନ କରିଥିଲେ। ସେ ସିଜିନର ୧୭ ଟି ମ୍ୟାଚରେ ୫୦.୩୩ ହାରରେ ୬୦୪ ରନ କରିଥିଲେ। ଏହି ସମୟ ମଧ୍ୟରେ ତାଙ୍କ ବ୍ୟାଟରୁ ଛଅଟି ଅର୍ଦ୍ଧଶତକ ବାହାରିଥିଲା। ତାଙ୍କ ଅଧିନାୟକତ୍ୱରେ ପଞ୍ଜାବ କିଙ୍ଗ୍ସ IPL ୨୦୨୫ ର ଫାଇନାଲରେ ପହଞ୍ଚିଥିଲା। ତଥାପି ଆଇପିଏଲ-୨୦୨୫ ରେ ଶୁଭମନ ଗିଲଙ୍କ ପ୍ରଦର୍ଶନ ମଧ୍ୟ ଉତ୍କୃଷ୍ଟ ଥିଲା। ସେ ୧୫ ଟି ମ୍ୟାଚରେ ୧୫୫.୮୮ ହାରରେ ୬୫୦ ରନ କରିଥିଲେ, ଯେଉଁଥିରେ ଛଅଟି ଅର୍ଦ୍ଧଶତକ ମଧ୍ୟ ସାମିଲ ଥିଲା। ଶୁଭମନ ଗିଲ ଭାରତ ପାଇଁ ୨୧ ଟି ଟି-୨୦ ମ୍ୟାଚ ଖେଳିଛନ୍ତି, ୩୦.୪୨ ହାରରେ ୫୭୮ ରନ କରିଛନ୍ତି। ତିନୋଟି ଫର୍ମାଟରେ ଶତକ ମାରିଥିବା ମନୋନୀତ ଭାରତୀୟ ଖେଳାଳିଙ୍କ ମଧ୍ୟରେ ଗିଲ ଅନ୍ୟତମ। ଗିଲଙ୍କ ଅଧିନାୟକତ୍ୱରେ ଭାରତ ଇଂଲଣ୍ଡ ଗସ୍ତରେ ପାଞ୍ଚ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜକୁ ୨-୨ ରେ ବରାବର କରିଥିଲା। ତାଙ୍କୁ ଏସିଆ କପ୍ ପାଇଁ ଭାରତୀୟ ଦଳର ଉପ-ଅଧିନାୟକ ଭାବରେ ମନୋନୀତ କରାଯାଇଛି।