ଗଙ୍ଗା ନଦୀରେ ଓଲଟିଲା ଡଙ୍ଗା, ୩ ମୃତଦେହ ଉଦ୍ଧାର, ଅନେକ ନିଖୋଜ

ନୂଆଦିଲ୍ଲୀ: ବିହାର କଟିହାର ଜିଲ୍ଲାରେ ବଡ଼ ଅଘଟଣ । କଟିହାରର ଅମଦାବାଦରେ ଗଙ୍ଗା ନଦୀରେ ଡଙ୍ଗା ଓଲଟିବା ଯୋଗୁଁ ୩ ଜଣଙ୍କ ଜୀବନ ଚାଲିଯାଇଛି । ଅନେକ ବୁଡିଥିବା ଆଶଙ୍କା କରାଯାଉଛି । ଡଙ୍ଗାରେ ୧୭ ଜଣ ଥିବା ଖବର ମିଳିଛି । ଖବର ମୁତାବକ, ଡଙ୍ଗାରେ ଥିବା ସମସ୍ତ ଲୋକ ଦକ୍ଷିଣ କରିମୁଲ୍ଲାପୁରର ମେଘୁ ଘାଟରୁ ଡଙ୍ଗାରେ ଗଦାଇ ଦିୟାରା ଯାଉଥିଲେ । ଡଙ୍ଗାରେ ୧୭ରୁ ଅଧିକ ଜଣ ଯାତ୍ରୀ ଥିଲେ । ଘଟଣା ବିଷୟରେ ଖବର ପାଇଁ ଏସଡିଆରଏଫ ଏବଂ ପୋଲିସ ଘଟଣା ସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛି । ଡଙ୍ଗାଟି ବୁଡିଯିବା ପରେ ଏଥିରୁ ୪ ଜଣ ପହଁରି ଆସିଥିବା ବେଳେ ୩ ଜଣ ମୃତଦେହ ପୋଲିସ ଜବତ କରିଛି । ନିଖୋଜ ଥିବା ଅନ୍ୟମାନଙ୍କ ଖୋଜା ଚାଲିଛି । ମୃତକଙ୍କ ପରିଚୟ ମିଳିଛି । ଅନ୍ୟ ବାକି ଲୋକଙ୍କୁ ଖୋଜିବା ପାଇଁ ଏସଡିଆରଏଫ ଟିମ୍ ରେସକ୍ୟୁ ଅପରେସନ ଚାଲିଛି । ତେବେ ଏଠାରେ ଗଙ୍ଗା ନଦୀ ଜୋରରେ ପ୍ରବାହିତ ହେଉଥିବାରୁ ଉଦ୍ଧାର କାର୍ଯ୍ୟରେ ବାଧା ସୃଷ୍ଟି ହେଉଛି । ପୋଲିସ ଏବଂ ଏନଡିଆରଏଫ ଟିମ ସ୍ଥାନୀୟ ଗ୍ରାମବାସୀଙ୍କ ସହାୟତାରେ ନିଖୋଜଙ୍କୁ ଖୋଜୁଛି । ଡଙ୍ଗାରେ ଲୋକମାନେ ନଦୀର ଆରପଟେ ଥିବା ଜମିରେ ଚାଷକାମ ଦେଖିବାକୁ ଯାଉଥିଲେ । କିନ୍ତୁ ନଦୀର ପ୍ରଖର ସ୍ରୋତରେ ଡଙ୍ଗାଟି ଓଲଟି ପଡିଥିଲା । ଘଟଣା ପରେ ନିଖୋଜ ପରିବାରଙ୍କ ମଧ୍ୟରେ ଶୋକର ଛାୟା ଖେଳିଯାଇଛି । ଉଦ୍ଧାର ହୋଇଥିବା ଲୋକଙ୍କୁ ସ୍ଥାନୀୟ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି । ସୂଚନାଯୋଗ୍ୟ, ମୁମ୍ବାଇ ଗେଟୱେ ଅଫ ଇଣ୍ଡିଆରୁ ଏଲିଫାଣ୍ଟା ଯାଉଥିବା ଡଙ୍ଗା ଓଲଟିଥିଲା । ଡଙ୍ଗାରେ ୧୦୧ ରୁ ଉର୍ଦ୍ଧ୍ଵ ଯାତ୍ରୀ ଥିଲେ । ୪୦ ଜଣ ନିଖୋଜ ରହିଥିବା ବେଳେ ୩୬ ଜଣଙ୍କୁ ଉଦ୍ଧାର କରାଯାଇଥିବା ଜଣାଯାଇଛି । ଦୁର୍ଘଟଣାରେ ୩ ନୌ କର୍ମଚାରୀଙ୍କ ସମେତ ୧୩ ଜୀବନ ଚାଲିଯାଇଥିବା ସୂଚନା ମିଳିଛି । ନୌ କର୍ମଚାରୀଙ୍କ ବୋଟ ଇଂଜିନର ସ୍ପିଡ଼ ପରୀକ୍ଷା କରୁଥିବା ବେଳେ ବୋଟ ସହ ଦୁର୍ଘଟଣା ଘଟିଥିଲା ।