ନୂଆଦିଲ୍ଲୀ ଆସନରୁ ନାମାଙ୍କନ ଦାଖଲ କଲେ ଅରବିନ୍ଦ କେଜ୍ରିୱାଲ

ନୂଆଦିଲ୍ଲୀ: ଆଜି ନାମାଙ୍କନ ଭରିଛନ୍ତି ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ତଥା ଏଏପି ସଂଯୋଜକ ଅରବିନ୍ଦ କେଜ୍ରିୱାଲ । ସେ ନୂଆଦିଲ୍ଲୀ ଆସନରୁ ନିଜର ନାମାଙ୍କନପତ୍ର ଦାଖଲ କରିଛନ୍ତି । ଏହି ସମୟରେ ତାଙ୍କ ସହିତ ଥିଲେ ପତ୍ନୀ ସୁନୀତା କେଜ୍ରିୱାଲ ଏବଂ ଅନେକ ମହିଳା ସମର୍ଥକ । ଆମ୍ ଆଦମୀ ପାର୍ଟିର ସୋସିଆଲ୍ ମିଡିଆ ହ୍ୟାଣ୍ଡେଲରୁ ଏକ ପୋଷ୍ଟରେ କୁହାଯାଇଛି, ‘ଦିଲ୍ଲୀର ମା’, ଭଉଣୀମାନଙ୍କ ସହ ଅରବିନ୍ଦ କେଜ୍ରିୱାଲ ନୂଆଦିଲ୍ଲୀ ବିଧାନସଭା ଆସନରୁ ନାମାଙ୍କନପତ୍ର ଦାଖଲ କରିଛନ୍ତି । ଆମେ ମା’, ଭଉଣୀମାନଙ୍କୁ ନେଇ ପୂର୍ବରୁ ମଧ୍ୟ କାର୍ଯ୍ୟ କରିଛୁ ଏବଂ ଆଗକୁ ମଧ୍ୟ ଜାରି ରଖିବୁ’ । ଅରବିନ୍ଦ କେଜ୍ରିୱାଲ ପତ୍ନୀ ସୁନୀତା ଏବଂ ମହିଳା ସମର୍ଥକଙ୍କ ସହ ନାମାଙ୍କନ ଭରିବା ପୂର୍ବରୁ ଏକ ପଦଯାତ୍ରା କରିଥିଲେ । ଏହାସହ କନଟ୍ ପ୍ଲେସର ହନୁମାନ ମନ୍ଦିର ଓ ବାଲ୍ମୀକି ମନ୍ଦିରରେ ମଧ୍ୟ ପୂଜାର୍ଚ୍ଚନା କରିଥିଲେ । ଏଏପି ନେତା ମନୀଷ ସିସୋଦିଆ ବି ଆଜି ଜଙ୍ଗପୁରାରୁ ନାମାଙ୍କନ ଦାଖଲ କରିବେ । ଆପର ସୌରଭ ଭରଦ୍ୱାଜ ଗ୍ରେଟର କୈଲାଶ ଏବଂ ଗୋପାଳ ରାୟ ବାବରପୁରରୁ ନାମାଙ୍କନ ଭରିବେ । ଏହାପୂର୍ବରୁ ଅରବିନ୍ଦ କେଜ୍ରିୱାଲ ସୋସିଆଲ ମିଡିଆ ପୋଷ୍ଟରେ କହିଥିଲେ ଯେ ‘ଆଜି ମୁଁ ନିଜର ନାମାଙ୍କନ ଭରିବାକୁ ଯାଉଛି । ପୂରା ଦିଲ୍ଲୀରୁ ମୋର ଅନେକ ମା’ ଓ ଉଭଣୀ ମୋତେ ଆଶୀର୍ବାଦ ଦେବା ପାଇଁ ମୋ ସହିତ ଯିବେ । ନାମାଙ୍କନ ପୂର୍ବରୁ ପ୍ରଭୁଙ୍କ ଆଶୀର୍ବାଦ ନେବା ପାଇଁ ବାଲ୍ମୀକି ମନ୍ଦିର ଓ ହନୁମାନ ମନ୍ଦିର ଯିବି’ । ଅରବିନ୍ଦ କେଜ୍ରିୱାଲ ନୂଆଦିଲ୍ଲୀ ଆସନରୁ ବିଜେପିର ପ୍ରବେଶ ବର୍ମା ଏବଂ କଂଗ୍ରେସର ସନ୍ଦୀପ ଦୀକ୍ଷିତଙ୍କ ବିରୋଧରେ ନିର୍ବାଚନ ଲଢ଼ିବେ । ଦିଲ୍ଲୀରେ ତ୍ରିମୁଖୀ ଲଢ଼େଇ ହେବ । ଫେବୃୟାରୀ ୫ରେ ହେବ ଦିଲ୍ଲୀ ବିଧାନସଭା ନିର୍ବାଚନ । ୮ରେ ଆସିବ ନିର୍ବାଚନ ଫଳାଫଳ । ଏଥର ଦିଲ୍ଲୀର ସରକାର ବାଛିବେ ୧.୫୫ କୋଟି ଭୋଟର ।