ସାମ୍ନାକୁ ଆସିଲା କିମ୍ ଜୋଙ୍ଗ୍ଙ୍କ ଆଉ ଏକ ନରସଂହାରର ନଗ୍ନଚିତ୍ର: ୩୦ ସ୍କୁଲ ଛୁଆଙ୍କୁ ଗୁଳିକରି ହତ୍ୟା କଲା ସେନା
ପୋଙ୍ଗୟାଙ୍ଗ୍: ଉତ୍ତରକୋରିଆର ଏକଛତ୍ରବାଦୀ ଶାସକ କିମ୍ ଜୋଙ୍ଗ୍ ଉନ୍ଙ୍କ ଆଉ ଏକ ନରସଂହାରର ନଗ୍ନଚିତ୍ର ସାମ୍ନାକୁ ଆସିଛି । ରିପୋର୍ଟ ଅନୁସାରେ ଉନ୍ଙ୍କ ନିର୍ଦ୍ଦେଶରେ ଉତ୍ତରକୋରିଆ ସେନା ପ୍ରାୟ ୩୦ଜଣ ସ୍କୁଲପଢ଼ା ପିଲାଙ୍କୁ ସର୍ବସାଧାରଣରେ ଠିଆକରି ଗୁଳି କରି ହତ୍ୟା କରିଛି । ପିଲାମାନେ ଦକ୍ଷିଣ କୋରିଆର ଏକ ଡ୍ରାମା ଦେଖିବା ଭଳି ସାମାନ୍ୟ ଭୁଲ୍ କରିଥିଲେ, ଯେଉଁଥିପାଇଁ ସେମାନଙ୍କୁ କିମ୍ ଜୋଙ୍ଗ୍ ଉନ୍ ହତ୍ୟାକରିବାକୁ ନିର୍ଦ୍ଦେଶ ଦେଇଥିଲେ । ଦକ୍ଷିଣ କୋରିଆ ନ୍ୟୁଜ୍ ଏଜେନ୍ସି ଆଉଟଲେଟ୍ ଚୋସୁନ୍ ଟିଭି ଏବଂ କୋରିଆ ଜୋଙ୍ଗ୍ ଆଙ୍ଗ୍ ଡେଲି ଅନୁଯାୟୀ ଗତ ସପ୍ତାହରେ ୩୦ ମାଧ୍ୟମିକ ବିଦ୍ୟାଳୟର ପିଲାଙ୍କୁ ସର୍ବସାଧାରଣରେ ହତ୍ୟା କରାଯାଇଛି । ଏସବୁ କିମ୍ ଜୋଙ୍ଗ୍ ଉନ୍ଙ୍କ ନିର୍ଦ୍ଦେଶରେ ହିଁ କରାଯାଇଛି । ସବୁଠୁ ବଡ଼ କଥା ହେଉଛି କିମ୍ ଜୋଙ୍ଗ୍ ଏପ୍ରକାର ହତ୍ୟା ନିର୍ଦ୍ଦେଶ ଦେବା ଏବଂ ତାଙ୍କ ସେନା ୩୦ ଛାତ୍ରଛାତ୍ରୀଙ୍କୁ ଗୁଳିକରି ହତ୍ୟା କରିବା ଘଟଣା ଉତ୍ତରକୋରିଆ ଗଣମାଧ୍ୟମରେ ମଧ୍ୟ ପ୍ରକାଶିତ କରାଯାଇନାହିଁ । ଅନ୍ୟପକ୍ଷେ ଦକ୍ଷିଣ କୋରିଆର ଅଧିକାରୀମାନେ ଏହି ରିପୋର୍ଟ ଉପରେ କୌଣସି ମନ୍ତବ୍ୟ ଦେଇନଥିଲେ ମଧ୍ୟ ଦକ୍ଷିଣ କୋରିଆ ମନ୍ତ୍ରଣାଳୟର ଜଣେ ଅଧିକାରୀ ସ୍ଥାନୀୟ ସାମ୍ବାଦିକମାନଙ୍କୁ ଏସମ୍ପର୍କରେ ସୂଚନା ଦେବା ପରେ ଏସମ୍ପର୍କରେ ସୂଚନା ବାହାରକୁ ଆସିପାରିଛି । ତେବେ ଉତ୍ତରକୋରିଆ ଶାସକଙ୍କ ଏପ୍ରକାର ଅମାନବୀୟ ଆଚରଣ ଓ ନିଷ୍ଠୁରତା ସମ୍ପର୍କରେ ଜାଣିବା ପରେ ସମଗ୍ର ବିଶ୍ୱରେ ଉତ୍ତରକୋରିଆ ଏବଂ ଶାସକ କିମ୍ଙ୍କୁ ଛି ଛାକର କରାଯାଉଛି । ସୂଚନାଯୋଗ୍ୟ, ଉତ୍ତରକୋରିଆରେ ପ୍ରଥମ ଥର ପାଇଁ ଏଭଳି ମୃତ୍ୟୁ ଦଣ୍ଡ ଦିଆଯାଇନାହିଁ । ଉତ୍ତରକୋରିଆ ଏହାର ନାଗରିକମାନଙ୍କୁ ଦକ୍ଷିଣ କୋରିଆ, ଆମେରିକା ଏବଂ ଜାପାନର ଗଣମାଧ୍ୟମ, ଫିଲ୍ମ କିମ୍ବା ଅନ୍ୟ କୌଣସି ଚିତ୍ତବିନୋଦନ ଭିଡିଓ ଦେଖିବା ଓ ଶୁଣିବା ଉପରେ କଟକଣା ଲାଗୁକରିଛି । ଏଥିରେ ଖିଲାପି ହେଲେ ମୃତ୍ୟୁଦଣ୍ଡ ନିଶ୍ଚିତ କରାଯାଇଛି । ସୂଚନାଯୋଗ୍ୟ, ଜାତିସଂଘର ମହାସଚିବଙ୍କ ଦ୍ୱାରା ୨୦୨୨ ମସିହାରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, କାଙ୍ଗୱୋନ୍ ପ୍ରଦେଶରେ ଜଣେ ବ୍ୟକ୍ତି ଦକ୍ଷିଣ କୋରିଆରୁ ଆସିଥିବା ଡିଜିଟାଲ୍ ସାମଗ୍ରୀ ବିକ୍ରୟ କରୁଥିବା ଦେଖାଯିବା ପରେ ତାଙ୍କୁ ଗୁଳି କରି ହତ୍ୟା କରାଯାଇଥିଲା । ୨୦୨୪ର ପ୍ରାରମ୍ଭରେ ଏକ ଭିଡିଓ ରିଲିଜ୍ ହୋଇଥିଲା ଯେଉଁଥିରେ ୨ ନାବାଳକଙ୍କୁ କେ-ପପ୍ ଭିଡିଓ ଦେଖିବା ଯୋଗୁ ୧୨ ବର୍ଷ କଠିନ ଜେଲ୍ ଦଣ୍ଡାଦେଶ କରାଯାଇଥିଲା । ପ୍ରକାଶ, ଉତ୍ତର କୋରିଆ ଏବଂ ଦକ୍ଷିଣ କୋରିଆ ମଧ୍ୟରେ ଘୋର ଶତ୍ରୁତା ରହିଛି ଏବଂ ଯୁଦ୍ଧ ପରି ପରିସ୍ଥିତି ସବୁବେଳେ ଜାରି ରହିଛି ।
