ଚିଲିକାକୁ ୨୪ ବର୍ଷ ପରେ ଫେରିଲା ମନ୍ତ୍ରୀପଦ, ଦେବେନ୍ଦ୍ର ମାନସିଂହଙ୍କ ପରେ ପୃଥୀରାଜ ହରିଚନ୍ଦନ

ଭୁବନେଶ୍ବର: ଦୀର୍ଘ ୨୪ ବର୍ଷ ଅପେକ୍ଷା ପରେ ଚିଲିକା ନିର୍ବାଚନ ମଣ୍ଡଳୀକୁ ମିଳିଛି ମନ୍ତ୍ରୀପଦ। ଗତକାଲି କ୍ୟାବିନେଟ ମନ୍ତ୍ରୀ ଭାବେ ଶପଥ ନେଇଛନ୍ତି ଚିଲିକାର ନବ ନିର୍ବାଚିତ ବିଧାୟକ ପୃଥୀରାଜ ହରିଚନ୍ଦନ। ସେ ପ୍ରଥମ ଥର ପାଇଁ ବିଜୟ ଲାଭ କରିଛନ୍ତି।  ସେ ପ୍ରଥମ ଥର  ବିଧାୟକ ହେବା ସହିତ କ୍ୟାବିନେଟ ମନ୍ତ୍ରୀ ମଧ୍ୟ ହୋଇପାରିଛନ୍ତି। ଏହି ନିର୍ବାଚନ ମଣ୍ଡଳୀରେ ୧୯୯୫ ମସିହାରେ ଜିିତିଥିବା କଂଗ୍ରେସ ପ୍ରାର୍ଥୀ ଦେବେନ୍ଦ୍ର ମାନସିଂହ ଶେଷ ମନ୍ତ୍ରୀ ଥିଲେ। ସେତେବେଳେ ସେ ଜିତିବା ପରେ ମୁଖ୍ୟ ସଚେତକ ଭାବେ ତାଙ୍କୁ ଦାୟିତ୍ବ ଦିଆଯାଇଥିଲା। ଏହାପରେ ୧୯୯୯ ମସିହାରେ ମନ୍ତ୍ରୀମଣ୍ଡଳ ଅଦଳବଦଳ ବେଳେ ଶିଳ୍ପମନ୍ତ୍ରୀ ଭାବେ ତାଙ୍କୁ ନିଯୁକ୍ତି ଦିଆଯାଇଥିଲା। ପୁଣି ୨୦୦୦ ମସିହାରେ ସେ ବିଜ୍ଞାନ ଓ ପ୍ରଯୁକ୍ତି ବିଦ୍ୟା ବିଭାଗର ମନ୍ତ୍ରୀ ହୋଇଥିଲେ। ତା ପରେ ଏହି ନିର୍ବାଚନ ମଣ୍ଡଳୀରୁ ଆଉ କେହି ମନ୍ତ୍ରୀ ହୋଇପାରି ନାହାଁନ୍ତି। ଦେବେନ୍ଦ୍ର ମାନସିଂହଙ୍କ ପରେ ପୃଥୀରାଜଙ୍କ ଦାଦା ବିଭୂତି ଭୂଷଣ ହରିଚନ୍ଦନ ଚିଲିକାରୁ ବିଧାୟକ ହେଲେ। ସେ ତିନି ଥର ଚିଲିକାରୁ ବିଧାୟକ ହୋଇଥିଲେ ମଧ୍ୟ କେବେ ବି ମନ୍ତ୍ରୀ ହୋଇପାରି ନ ଥିଲେ। ତେବେ ଏହି ନିର୍ବାଚନ ମଣ୍ଡଳୀର ସବୁଠାରୁ ଲୋକପ୍ରିୟ ମନ୍ତ୍ରୀ ଥିଲେ ପୃଥୀରାଜଙ୍କ ବାପା ବିଶ୍ବଭୂଷଣ ହରିଚନ୍ଦନ। ସେ ଦୁଇଥର ଚିଲିକାରୁ ବିଧାୟକ ହୋଇ ମନ୍ତ୍ରୀ ଥିଲେ। ତାଙ୍କର ରାଜ୍ୟ ମନ୍ତ୍ରୀ ମଣ୍ଡଳରେ ବେଶ ଦବଦବା ମଧ୍ୟ ରହିଥିଲା। ସେ ସେତେବେଳେ ଏକାଥରେ ୭ଟି ବିଭାଗର ମନ୍ତ୍ରୀ ହୋଇ ବେଶ ଚର୍ଚ୍ଚାକୁ ଆସିଥିଲେ। ଏହାପରେ ସେ ୧୯୯୬ ଏବଂ ୨୦୦୦ ମସିହାରେ ସେ ଭୁବନେଶ୍ବର ବିଧାନସଭା ଆସନରୁ ବିଧାୟକ ହୋଇ ନବୀନ ସରକାରରେ ମନ୍ତ୍ରୀ ଥିଲେ। ବର୍ତ୍ତମାନ ବିଶ୍ବଭୂଷଣ ହରିଚନ୍ଦନ ଛତିଶଗଡର ରାଜ୍ୟପାଳ ଅଛନ୍ତି। ବାପା ବିଶ୍ବଭୂଷଣଙ୍କ ପରି ପୃଥୀରାଜ ମଧ୍ୟ ମନ୍ତ୍ରୀମଣ୍ଡଳରେ ନିଜର ପତିୟାରା ଦେଖାଇପାରିବେ ବୋଲି ଚିଲିକାବାସୀ ଆଶା ରଖିଛନ୍ତି।