ଗୋହତ୍ୟା, ଶିଶୁ ନିର୍ଯାତନା ମାମଲାରେ ଶୀଘ୍ର ଦଣ୍ଡ ବିଧାନ ପାଇଁ ଉତ୍ତର ପ୍ରଦେଶର ନୂତନ ପଦକ୍ଷେପ

ଲକ୍ଷ୍ନୌ: ଗୋରୁ ହତ୍ୟା, ଧର୍ମାନ୍ତରଣ, ଦୁଷ୍କର୍ମ ଏବଂ ହତ୍ୟା, ପୋକ୍ସୋ ଅଧିନିୟମ ଅଧୀନରେ ପଞ୍ଜିକୃତ ହୋଇଥିବା ମାମଲାରେ ଶୀଘ୍ର ଦୋଷୀ ସାବ୍ୟସ୍ତ ହେବା ପାଇଁ ଉତ୍ତରପ୍ରଦେଶ ପୋଲିସ ଏକ ପଦକ୍ଷେପ ଆରମ୍ଭ କରିଛି। “ଅପରେସନ୍ କନଭିକେସନ୍” ଅଧୀନରେ ପୋଲିସ ଅପରାଧୀଙ୍କୁ ତୁରନ୍ତ ଗିରଫ କରିବା, ସେମାନଙ୍କ ବିରୁଦ୍ଧରେ ଦୃଢ ପ୍ରମାଣ ସଂଗ୍ରହ, ଗୁଣାତ୍ମକ ଅନୁସନ୍ଧାନ ଏବଂ କୋର୍ଟରେ ମାମଲାଗୁଡ଼ିକର ପ୍ରଭାବଶାଳୀ ପ୍ରତିନିଧିତ୍ୱ ନିଶ୍ଚିତ କରିବ ଯାହା ଦ୍ଵାରା ସେମାନେ ଖୁବ୍ କମ୍ ସମୟ ମଧ୍ୟରେ ଦଣ୍ଡିତ ହେବେ ବୋଲି ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି। ଏକ ସରକାରୀ ବିବୃତ୍ତିରେ ଉତ୍ତରପ୍ରଦେଶ ପୋଲିସ କହିଛି ଯେ, ଯୌନ ଅପରାଧରୁ ଶିଶୁ ସୁରକ୍ଷା (POCSO) ଅଧିନିୟମ ଅନୁଯାୟୀ ପଞ୍ଜୀକୃତ ମାମଲା ବ୍ୟତୀତ ପ୍ରତ୍ୟେକ କମିଶନର୍ / ଜିଲ୍ଲାକୁ “ଅପରେସନ୍ କନଭିକେସନ୍” ଅଧୀନରେ ପ୍ରତ୍ୟେକ ବର୍ଗରେ ୨୦ ଟି ମାମଲା ଚିହ୍ନଟ କରିବାକୁ ପଡିବ। ଉତ୍ତର ପ୍ରଦେଶ ପୋଲିସ୍ ଏହାର ବିବୃତ୍ତିରେ କହିଛି ଯେ, ଚିହ୍ନଟ ହୋଇଥିବା ଅପରାଧ ସହ ଜଡିତ ଅଭିଯୋଗର ଉତ୍କୃଷ୍ଟ ତଥା ସମୟ ସୀମା ଅନୁସନ୍ଧାନ କରିବା ପରେ ଚାର୍ଜସିଟ୍ କୋର୍ଟକୁ ପଠାଯିବ। ହିନ୍ଦୀରେ ଏକ ଟୁଇଟ୍‌ରେ କୁହାଯାଇଛି ଯେ, ଉତ୍ତରପ୍ରଦେଶର ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ଅପରାଧ ବିରୋଧରେ ଶୂନ୍ୟ ସହନଶୀଳତା ନୀତିକୁ ଦୃଷ୍ଟିରେ ରଖି ଅପରାଧୀଙ୍କୁ ଦଣ୍ଡ ଦେବା ପାଇଁ ମିଶନ ମୋଡରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଏକ ନୂତନ କାର୍ଯ୍ୟ ଯୋଜନା ପ୍ରସ୍ତୁତ କରାଯାଇଛି। ଏହାର ନାମ ‘ଅପରେସନ୍ କନଭିକେସନ୍’ ରଖାଯାଇଛି। “ଏଥିରେ କୁହାଯାଇଛି ଯେ, ଚିହ୍ନଟ ହୋଇଥିବା ମାମଲାଗୁଡ଼ିକର ପ୍ରଭାବଶାଳୀ ବିଚାରକୁ ଦୃଷ୍ଟିରେ ରଖି ପୋଲିସ ମୁଖ୍ୟାଳୟ ସ୍ତରରେ ସାପ୍ତାହିକ ସମୀକ୍ଷା ପାଇଁ ଏକ ୱେବ୍ ପୋର୍ଟାଲ୍ ବିକଶିତ ହେବ। ଯାହା ମାଧ୍ୟମରେ ନିଆଯାଇଥିବା କାର୍ଯ୍ୟ ନିୟମିତ ଭାବରେ ଅପଡେଟ୍ ହେବ।”