‘ଭାରତର ସପ୍ତ ମୁକ୍ତିସ୍ଥଳ’ ତାଲିକାରେ ସ୍ଥାନ ପାଇଲା ଶ୍ରୀଜଗନ୍ନାଥ ଧାମ ପୁରୀ
ଭୁବନେଶ୍ୱର: ଶ୍ରୀଜଗନ୍ନାଥ ଧାମ ପୁରୀ ପାଇଁ ଖୁସି ଖବର । କେନ୍ଦ୍ର ପର୍ୟ୍ୟଟନ ମନ୍ତ୍ରାଳୟ ପକ୍ଷରୁ ସାମୂହିକ ଭାବେ ପ୍ରଚାରପ୍ରସାର କରାଯାଉଥିବା ‘ଭାରତର ସପ୍ତ ମୁକ୍ତିସ୍ଥଳ’ରେ ଶ୍ରୀଜଗନ୍ନାଥଙ୍କ ଧାମ ଶ୍ରୀକ୍ଷେତ୍ର ପୁରୀ ସ୍ଥାନ ପାଇଛି । ଏଣିକି ପୁରୀ ସମ୍ପର୍କରେ ଘରୋଇ ଓ ବିଶ୍ୱ ବଜାରରେ ପ୍ରଚାର ପ୍ରସାର କରାଯିବ । ଏଥିସହ ପ୍ରସାଦ ଓ ସ୍ୱଦେଶ ଦର୍ଶନ ଯୋଜନାରେ ପର୍ୟ୍ୟଟନ ଭିତ୍ତିଭୂମିର ବିକାଶ ହେବ । ଜଗନ୍ନାଥ ଧାମ ପୁରୀ ସହ ଅଯୋଧ୍ୟା, ମଥୁରା, ହରିଦ୍ବାର, ବାରଣାସୀ, ଉଜ୍ଜୈନ ଓ ଦ୍ବାରକା ଏହି ସପ୍ତ ମୁକ୍ତିସ୍ଥଳରେ ରହିଛି। କେନ୍ଦ୍ର ମନ୍ତ୍ରାଳୟ ପକ୍ଷରୁ ଦେଶର ବିଭିନ୍ନ ପର୍ୟ୍ୟଟନ ସ୍ଥାନ, ତୀର୍ଥସ୍ଥଳ ଓ ଉତ୍ପାଦଗୁଡ଼ିକୁ ନେଇ ଛାପା, ବୈଦ୍ୟୁତିକ ଓ ଡିଜିଟାଲ୍ ଗଣମାଧ୍ୟମ ମାଧ୍ୟମରେ ପ୍ରଚାରପ୍ରସାର ଅଭିଯାନ ଚାଲିଛି। ଏଥିସହ ମନ୍ତ୍ରାଳୟର ଅଫିସିଆଲ୍ ୱେବସାଇଟ୍ ସହ ସୋସିଆଲ୍ ମିଡିଆ ହାଣ୍ଡେଲ୍ ମଧ୍ୟମରେ ବି ଏହାର ପ୍ରଚାର କରାଯାଇଥାଏ । ବିଭିନ୍ନ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳ ଦ୍ବାରା ଚିହ୍ନିତ ତୀର୍ଥ ସ୍ଥାନ ଓ ଐତିହ୍ୟ ସ୍ଥଳଗୁଡ଼ିକର ସାମଗ୍ରିକ ବିକାଶ ନିମନ୍ତେ ‘ତୀର୍ଥଯାତ୍ରା କାର୍ୟ୍ୟକଳ୍ପ ଓ ଆଧ୍ୟାତ୍ମିକ, ଐତିହ୍ୟ ବିକାଶ ରାଷ୍ଟ୍ରୀୟ ଅଭିଯାନ(ପ୍ରସାଦ)’ ଅଧୀନରେ କେନ୍ଦ୍ର ସଂସ୍କୃତି ମନ୍ତ୍ରାଳୟ ପକ୍ଷରୁ ଆର୍ଥିକ ସହାୟତା ମଧ୍ୟ ଯୋଗାଇ ଦିଆଯାଉଛି । କେନ୍ଦ୍ର ସଂସ୍କୃତି ଓ ପର୍ୟ୍ୟଟନ ମନ୍ତ୍ରୀ ଜି କିଷନ ରେଡ୍ଡି ଗତକାଲି ରାଜ୍ୟସଭାରେ ଏହି ଉତ୍ତର ରଖିଥିଲେ। ସେ ଆହୁରି କହିଥିଲେ, ଦେଶର ପର୍ୟ୍ୟଟନ ଭିତ୍ତିଭୂମି ବିକାଶ ପାଇଁ ‘ସ୍ବଦେଶ ଦର୍ଶନ’ ଯୋଜନାରେ ମଧ୍ୟ ଆର୍ଥିକ ସହାୟତା ପ୍ରଦାନ କରାଯାଉଛି। ଏଥିସହ ଅଧିକ ମାତ୍ରାରେ ତଥା ବର୍ଷତମାମ୍ ପର୍ୟ୍ୟଟକ ଆସୁଥିବା ପର୍ୟ୍ୟଟନ ତଥା ତୀର୍ଥସ୍ଥଳଗୁଡ଼ିକର ବିକାଶ ପାଇଁ ସ୍ବଦେଶ ଦର୍ଶନ ଯୋଜନାକୁ ଏସ୍ଡି ୨.୦ ଭାବେ ନୂଆ ରୂପ ଦିଆଯାଇଛି। ଏହି ଯୋଜନାରେ ଏଥର ଦ୍ବାରକାକୁ ପୂର୍ଣ୍ଣ ରୂପରେ ବିକାଶ କରାଯିବାକୁ ମନୋନୀତ କରାଯାଇଛି ।
