ଏଟିଏମ୍ ଅପେକ୍ଷା ୟୁପିଆଇର ଅଧିକ ଚାହିଦା: କମୁଛି ନଗଦ କାରବାର
ଭୁବନେଶ୍ୱର: ଏଟିଏମ୍କୁ ଶେଷ କରୁଛି ୟୁନିଫାଏଡ୍ ପେମେଣ୍ଟ୍ସ ଇଣ୍ଟର୍ଫେସ୍ (ୟୁପିଆଇ) । ସାମାନ୍ୟ ଜିନିଷଟିଏ କିଣିବାକୁ ଗଲେ ଲୋକେ ଫୋନ୍ପେ’, ଗୁଗୁଲ୍ ପେ’, ପେଟିଏମ୍ ଏବଂ ଆମାଜନ୍ ପେ’ ଆଦି ବ୍ୟବହାର କରୁଛନ୍ତି । ଏଟିଏମ୍ ଯାଇ ଟଙ୍କା ଉଠାଇବାର ଆବଶ୍ୟକତା ଆଉ ପଡୁନାହିଁ । ୟୁପିଆଇର ପ୍ରସାର ଫଳରେ ବର୍ତ୍ତମାନ ଏଟିଏମ୍ ସଂଖ୍ୟା ହ୍ରାସ ପାଉଛି । ତେବେ ୫ ବର୍ଷରେ ପ୍ରଥମ ଥର ଦେଶରେ ଏଟିଏମ୍ ସଂଖ୍ୟା କମିଥିବା ଜଣାପଡ଼ିଛି । କେନ୍ଦ୍ର ସରକାର ସଂସଦରେ ଏ ସମ୍ପର୍କରେ ସୂଚନା ଦେଇଛନ୍ତି । ଆଶ୍ଚର୍ଯ୍ୟର ବିଷୟ ହେଉଛି ମହାନଗର ଏବଂ ସହର ସହିତ ଗ୍ରାମାଞ୍ଚଳରେ ବି ଏଟିଏମ୍ ସଂଖ୍ୟାରେ ହ୍ରାସ ଘଟିଛି । ୨୦୨୪ ସେପ୍ଟେମ୍ବର ଶେଷରେ ଦେଶରେ ଏଟିଏମ୍ ସଂଖ୍ୟା ୨,୫୫,୦୭୮ ରହିଛି, ଯାହାକି ବର୍ଷେ ତଳେ ୨,୫୭,୯୪୦ ଥିଲା । ଏଭଳି ଭାବେ ଏ ସଂଖ୍ୟାରେ ୧%ରୁ ସାମାନ୍ୟ ଅଧିକ ହ୍ରାସ ଦେଖିବାକୁ ମିଳିଛି । ସବୁଠୁ ଅଧିକ ୨.୨% ହ୍ରାସ ଗ୍ରାମାଞ୍ଚଳରେ ଦେଖିବାକୁ ମିଳିଛି । ସେପ୍ଟେମ୍ବର ଶେଷରେ ଗ୍ରାମାଞ୍ଚଳରେ ଏଟିଏମ୍ ସଂଖ୍ୟା ହ୍ରାସ ପାଇ ୫୪,୧୮୬କୁ ଖସିଆସିଛି । ସଂସଦରେ ଜାରି ଆର୍ବିଆଇ ତଥ୍ୟରୁ ଜଣାପଡ଼ିଛି ଯେ, ଏହି ଅବଧିରେ ମହାନଗରରେ ଏଟିଏମ୍ ସଂଖ୍ୟାରେ ୧.୬% ହ୍ରାସ ଘଟି ୬୭,୨୨୪କୁ ଖସିଆସିଛି । ଅର୍ଥ ରାଷ୍ଟ୍ରମନ୍ତ୍ରୀ ପଙ୍କଜ ଚୌଧୁରୀ ଲୋକସଭାରେ ଏହାକୁ ନେଇ ସୂଚନା ଦେଇଛନ୍ତି ।
