ଯୁଦ୍ଧରୁ ଦୂରେଇ ରୁହ ଭାରତ-ପାକିସ୍ତାନ: ଜାତିସଂଘ

ନୂଆଦିଲ୍ଲୀ: ଭାରତ-ପାକିସ୍ତାନ ଉତ୍ତେଜନା ମଧ୍ୟରେ, ଜାତିସଂଘର ମହାସଚିବ ଆଣ୍ଟୋନିଓ ଗୁଟେରେସ ଏକ ବଡ଼ ବୟାନ ଦେଇଛନ୍ତି। ସେ ଉଭୟ ଦେଶକୁ ସଂଯମତା ଅବଲମ୍ବନ କରିବାକୁ ଆହ୍ବାନ କରିଛନ୍ତି। ଗୁଟେରେସ କହିଛନ୍ତି ଯେ ଭାରତ ଏବଂ ପାକିସ୍ତାନ ସେନା ମୁହାଁମୁହିଁ ହେବାଠାରୁ ଦୂରେଇ ରହିବା ଉଚିତ। କାରଣ ଏହା କୌଣସି ସମାଧାନର ରାସ୍ତା ବାହାରିବ ନାହିଁ। ମୁଁ ପୁଣି ଥରେ ପହଲଗାମ ଆକ୍ରମଣକୁ ନିନ୍ଦା କରୁଛି। ସାଧାରଣ ନାଗରିକଙ୍କୁ ଟାର୍ଗେଟ କରିବା ଗ୍ରହଣୀୟ ନୁହେଁ। ଆକ୍ରମଣର ଦୋଷୀମାନଙ୍କୁ କଠୋର ଦଣ୍ଡ ମିଳିବା ଉଚିତ ବୋଲି ସେ କହିଛନ୍ତି। ତେବେ ଉତ୍ତେଜନା ହ୍ରାସ କରିବା ଏବଂ କୂଟନୀତି ଏବଂ ଶାନ୍ତି ନବୀକରଣ ପାଇଁ କାମ କରୁଥିବା ଯେକୌଣସି ପଦକ୍ଷେପକୁ ସମର୍ଥନ କରିବାକୁ ଜାତିସଂଘ ପ୍ରସ୍ତୁତ। ଏହାଦ୍ୱାରା ଭାରତ ଏବଂ ପାକିସ୍ତାନ ଉଭୟ ମଧ୍ୟରେ ଶାନ୍ତି ପ୍ରତିଷ୍ଠା କରିବାକୁ ସେ ଆହ୍ବାନ କରିଛନ୍ତି। ଗୁଟେରେସ ପୂର୍ବରୁ ପହଲଗାମ ଆକ୍ରମଣ ଉପରେ ମଧ୍ୟ ଏକ ବୟାନ ଦେଇଥିଲେ। ସେ କହିଥିଲେ ଯେ ସାଧାରଣ ନାଗରିକଙ୍କ ଉପରେ ଆକ୍ରମଣ କୌଣସି ପରିସ୍ଥିତିରେ ଗ୍ରହଣୀୟ ନୁହେଁ। ସେ ପୀଡିତଙ୍କ ପରିବାର ପ୍ରତି ସମବେଦନା ପ୍ରକାଶ କରିଥିଲେ ଏବଂ କହିଥିଲେ ଯେ ଆକ୍ରମଣର ନିରପେକ୍ଷ ତଦନ୍ତ ହେବା ଉଚିତ। ସେ ଭାରତର ବୈଦେଶିକ ମନ୍ତ୍ରୀ ଏସ ଜୟଶଙ୍କର ଏବଂ ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫଙ୍କ ସହ ଟେଲିଫୋନରେ କଥାବାର୍ତ୍ତା କରିଥିଲେ, ଯେଉଁଥିରେ ଭାରତ-ପାକିସ୍ତାନ ଉତ୍ତେଜନା ହ୍ରାସ ଏବଂ ନ୍ୟାୟିକ ପ୍ରକ୍ରିୟା ଉପରେ ଆଲୋଚନା କରାଯାଇଥିଲା। ଜୟଶଙ୍କର ଗୁଟେରସଙ୍କ ନିନ୍ଦାକୁ ପ୍ରଶଂସା କରିଥିଲେ। କହିରଖୁଛୁ, ୨୨ ଏପ୍ରିଲରେ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣରେ ୨୬ ଜଣ ପ୍ରାଣ ହରାଇଥିଲେ। ଏହି ଆକ୍ରମଣରେ, ନିରସ୍ତ୍ର ଲୋକଙ୍କୁ ଆତଙ୍କବାଦୀମାନେ ଟାର୍ଗେଟ କରିଥିଲେ। ପର୍ଯ୍ୟଟକମାନଙ୍କୁ ସେମାନଙ୍କ ଧର୍ମ ବିଷୟରେ ପଚାରିବା ପରେ ସଶସ୍ତ୍ର ଆତଙ୍କବାଦୀମାନେ ସେମାନଙ୍କୁ ଗୁଳି କରି ହତ୍ୟା କରିଥିଲେ। ଏହି ଆତଙ୍କବାଦୀ ଆକ୍ରମଣ ପରେ ଭାରତ ପାକିସ୍ତାନ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା। ଭାରତ ଚେନାବ ନଦୀର ପାଣି ବନ୍ଦ କରିଦେଲା। ପାକିସ୍ତାନୀମାନଙ୍କ ଭିସା ବାତିଲ କରାଯାଇଥିଲା। ଭାରତ ଆକାଶପଥ ବନ୍ଦ କରିଦେଲା। ଏହା ବ୍ୟତୀତ ଆହୁରି ଅନେକ କାର୍ଯ୍ୟାନୁଷ୍ଠାନ ମଧ୍ୟ ନିଆଯାଇଥିଲା। ପ୍ରତିବଦଳରେ, ପାକିସ୍ତାନ ମଧ୍ୟ ଭାରତ ବିରୁଦ୍ଧରେ ଅନେକ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା।