ବ୍ରିକ୍ସରେ ଯୋଡ଼ି ହେଲେ ଆଉ ୬ଟି ଦେଶ

ନୂଆଦିଲ୍ଲୀ: ୬ ଟି ଦେଶ – ଆର୍ଜେଣ୍ଟିନା, ଇଜିପ୍ଟ,, ଇଥିଓପିଆ, ଇରାନ, ସାଉଦି ଆରବ ଏବଂ ସଂଯୁକ୍ତ ଆରବ ଏମିରେଟ୍ସ ବ୍ରିକ୍ସ ଦେଶ ଗୋଷ୍ଠୀରେ ଯୋଗ ଦେଇଛନ୍ତି, ଯେଉଁ କାରଣରୁ ଏହାର ପରିବାର ବୃଦ୍ଧି ପାଇଛି। ଦକ୍ଷିଣ ଆଫ୍ରିକାର ରାଷ୍ଟ୍ରପତି ସିରିଲ ରାମାଫୋସା ଗୁରୁବାର ଦିନ କହିଛନ୍ତି ଯେ, ଆର୍ଜେଣ୍ଟିନା, ଇଜିପ୍ଟ, ଇଥିଓପିଆ, ଇରାନ, ସାଉଦି ଆରବ ଏବଂ ସଂଯୁକ୍ତ ଆରବ ଏମିରେଟ୍ସକୁ ବ୍ରିକ୍ସର ସମ୍ପୂର୍ଣ୍ଣ ସଦସ୍ୟ ହେବାକୁ ଆମନ୍ତ୍ରଣ କରିବାକୁ ନିଷ୍ପତ୍ତି ନେଇଛୁ।

ସେ କହିଛନ୍ତି ଯେ, ନୂତନ ସଦସ୍ୟମାନେ ଜାନୁଆରୀ ୧ ତାରିଖ ୨୦୨୪ରୁ ବ୍ରିକ୍ସର ଅଂଶ ହେବେ। ରାମଫୋସା କହିଛନ୍ତି ଯେ, ବ୍ରିକ୍ସ ସହ ସହଭାଗିତା ଗଢିବାରେ ଆମେ ଅନ୍ୟ ଦେଶର ସ୍ୱାର୍ଥକୁ ଗୁରୁତ୍ୱ ଦେଉଛୁ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଚୀନ୍ ରାଷ୍ଟ୍ରପତି ସି ଜିନପିଙ୍ଗ ଏବଂ ବ୍ରାଜିଲର ରାଷ୍ଟ୍ରପତି ଲୁଇଜ୍ ଇନାସିଓ ଲୁଲା ଡା ସିଲଭାଙ୍କ ସହ ମିଳିତ ଗଣମାଧ୍ୟମରେ ସୂଚନା ଦେଇ ଦକ୍ଷିଣ ଆଫ୍ରିକାର ରାଷ୍ଟ୍ରପତି ଏହି ନିଷ୍ପତ୍ତି ଘୋଷଣା କରିଛନ୍ତି।

ପ୍ରଧାନମନ୍ତ୍ରୀ ମୋଦୀ କ’ଣ କହିଛନ୍ତି?:

ବ୍ରିକ୍ସରେ ସମ୍ପ୍ରସାରଣ ସଂପର୍କରେ ନୂତନ ସଦସ୍ୟ ଚୟନରେ ଭାରତ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି। ଆହୁରି ୬ ଟି ଦେଶର ଏହି ଗୋଷ୍ଠୀର ଅଂଶ ହେବା ବିଷୟରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, ତିନି ଦିନିଆ ବିଚାର ବିମର୍ଶରୁ ଅନେକ ସକାରାତ୍ମକ ଫଳାଫଳ ବାହାରିଥିବାରୁ ମୁଁ ଖୁସି ଅଟେ।”

ବ୍ରିକ୍ସର ନେତାଙ୍କ ଗଣମାଧ୍ୟମରେ ସୂଚନା ଦେଇ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ,ବ୍ରିକ୍ସର ସମ୍ପ୍ରସାରଣ ପାଇଁ ଆମେ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛୁ। ବ୍ରିକ୍ସ ବିସ୍ତାରକୁ ଭାରତ ସର୍ବଦା ସମର୍ଥନ କରିଆସୁଛି। ନୂତନ ସଦସ୍ୟ, ଗୋଷ୍ଠୀକୁ ଆହୁରି ମଜବୁତ କରାଯିବ।

ବ୍ରିକ୍ସର ସଂପ୍ରସାରଣ କିପରି ହେଲା?:

ବ୍ରିକ୍ସ ହେଉଛି ପାଞ୍ଚଟି ବିକାଶଶୀଳ ଦେଶର ବ୍ରାଜିଲ, ଋଷ, ଭାରତ, ଚୀନ୍ ଏବଂ ଦକ୍ଷିଣ ଆଫ୍ରିକା ଯାହାକି ବିଶ୍ଵର ୪୧% ଜନସଂଖ୍ୟା, ବୈଶିକ ଜିଡିପିର ୨୪% ଏବଂ ବୈଶିକ ବାଣିଜ୍ୟର ୧୬% ପ୍ରତିନିଧିତ୍ୱ କରୁଛି। ବର୍ତ୍ତମାନ ଯେହେତୁ ଆର୍ଜେଣ୍ଟିନା, ଇଜିପ୍ଟ, ଇଥିଓପିଆ, ଇରାନ, ସାଉଦି ଆରବ ଏବଂ ସଂଯୁକ୍ତ ଆରବ ଏମିରେଟ୍ସ ଜାନୁୟାରୀ ୧ ତାରିଖ ୨୦୨୪ରୁ ଆନୁଷ୍ଠାନିକ ଭାବରେ ଏହି ଗୋଷ୍ଠୀର ଅଂଶ ହେବେ, ଏହି ଦଳରେ ଅନ୍ତର୍ଭୁକ୍ତ ଦେଶ ସଂଖ୍ୟା ବୃଦ୍ଧି ପାଇବ। ଏହାର ଅର୍ଥ ହେଉଛି ବ୍ରିକ୍ସର ପରିବାର ବୃଦ୍ଧି ପାଇଛି।

BRICS ରେ ଯୋଗଦେବା ପାଇଁ ୨୩ ଟି ଦେଶ ଆବେଦନ କରିଥିଲେ:

ଏହାପୂର୍ବରୁ ସୋମବାର (ଅଗଷ୍ଟ ୨୧) ବୈଦେଶିକ ସଚିବ ବିନୟ କ୍ୱାତ୍ରା କହିଥିଲେ ଯେ, ବିଭିନ୍ନ ଦେଶ ଏହି ଦଳରେ ଯୋଗଦେବାକୁ ଇଚ୍ଛୁକ। ୨୩ ଟି ଦେଶ ବ୍ରିକ୍ସରେ ଯୋଗଦେବା ପାଇଁ ଆବେଦନ କରିଛନ୍ତି। ଏହି ଦଳର ସଦସ୍ୟତା ପାଇଁ ଇରାନ, ସାଉଦି ଆରବ, ସଂଯୁକ୍ତ ଆରବ ଏମିରେଟ୍ସ (ୟୁଏଇ) ଏବଂ ଆର୍ଜେଣ୍ଟିନା ମଜବୁତ ପ୍ରତିଯୋଗୀ ଭାବରେ ଉଭା ହୋଇଛନ୍ତି। ସୋମବାର ଦିନ ସେ ଦିଲ୍ଲୀର ଗଣମାଧ୍ୟମକୁ କହିଛନ୍ତି ଯେ, ବ୍ରିକ୍ସରେ ବିସ୍ତାର ଉପରେ ଆମର ମନୋଭାବ ସକରାତ୍ମକ ଅଟେ।

ଭାରତ କିପରି ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କଲା?:

ବ୍ରିକ୍ସରେ ସମ୍ପ୍ରସାରଣ ପ୍ରସଙ୍ଗରେ ମଙ୍ଗଳବାର (୨୨ଅଗଷ୍ଟ) ସନ୍ଧ୍ୟାରେ ‘ନେତାଙ୍କ ପଂଚାୟତ’ ସମୟରେ ବିସ୍ତୃତ ଭାବରେ ଆଲୋଚନା କରାଯାଇଥିଲା। ପ୍ରଧାନମନ୍ତ୍ରୀ ମୋଦୀ ଏବଂ ବ୍ରିକ୍ସ ଦେଶର ଅନ୍ୟ ନେତାମାନେ ‘ନେତାଙ୍କ ପଂଚାୟତ’ରେ ଯୋଗ ଦେଇଥିଲେ। ବାର୍ଷିକ ବ୍ରିକ୍ସ ଶିଖର ସମ୍ମିଳନୀରେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ଯୋଗ ଦେଇନାହାଁନ୍ତି। ଏହି ବାର୍ଷିକ କାର୍ଯ୍ୟକ୍ରମରେ ଋଷର ବୈଦେଶିକ ମନ୍ତ୍ରୀ ସସର୍ଗେଇ ଲାଭରୋଭ ଯୋଗ ଦେଇଛନ୍ତି।

ସୂତ୍ରରୁ ପ୍ରକାଶ ଯେ ‘ନେତାଙ୍କ ପଂଚାୟତ’ ସମୟରେ ବ୍ରିକ୍ସର ସମ୍ପ୍ରସାରଣକୁ ନେଇ ଗୁରୁତ୍ୱପୂର୍ଣ୍ଣ ଘଟଣାକ୍ରମ ଘଟିଥିଲା ​​ଏବଂ ନୂତନ ସଦସ୍ୟ ଚୟନରେ ସହମତି ଭିତ୍ତିରେ ଭାରତ ଏକ ପ୍ରମୁଖ ଭୂମିକା ଗ୍ରହଣ କରିଥିଲା। ସେ କହିଛନ୍ତି ଯେ, “ଆମର ପ୍ରୟାସ ଆମର ରଣନୈତିକ ଭାଗୀଦାରୀଙ୍କୁ ନୂତନ ସଦସ୍ୟ ଭାବରେ ଅନ୍ତର୍ଭୁକ୍ତ କରିବା ଆମର ଉଦ୍ଦେଶ୍ୟ ଉପରେ ଆଧାରିତ। ଚୀନ୍, ଦକ୍ଷିଣ ଆଫ୍ରିକା ଏବଂ ବ୍ରାଜିଲର ପ୍ରତିପକ୍ଷଙ୍କ ସହ ପ୍ରଧାନମନ୍ତ୍ରୀ ମୋଦୀ ‘ନେତାଙ୍କ ପଂଚାୟତ’ରେ ଯୋଗ ଦେଇଥିଲେ।