ଫ୍ୟାସନରେ ପଞ୍ଜାବୀ ଜୋତା
ବିବାହ ଭୋଜିକୁ ଯାଆନ୍ତୁ କି କଲେଜ ଯାଆନ୍ତୁ, ଦେହକୁ ମାନିଲା ପରି ପୋଷାକ ସାଙ୍ଗକୁ ପଞ୍ଜାବୀ ଜୋତା ଥରେ ପିନ୍ଧନ୍ତୁ ଦେଖିବେ କେମିତି ଲାଗିବ । ଏକଦା ପଞ୍ଜାବ ରାଜ୍ୟରେ ସୀମିତ ଏହି ସ୍ୱତନ୍ତ୍ର ଜୋତା ଏବେ ସାରା ଭାରତବର୍ଷର ମହିଳା ଓ ଯୁବତୀମାନଙ୍କ ପସନ୍ଦଯୋଗ୍ୟ ହୋଇପାରିଛି । ଏପରିକି ବିଦେଶୀ ମହିଳା ଓ ଯୁବତୀମାନେ ପଞ୍ଜାବୀ ଜୋତା ପସନ୍ଦ କରୁଥିବା ଦେଖାଯାଉଛି । ବିଦେଶିନୀମାନେ ପର୍ଯ୍ୟଟନ ଲାଗି ଭାରତ ଆସିବା ବେଳେ ସାଙ୍ଗରେ ପଞ୍ଜାବୀ ଜୋତା କିଣିନେବାକୁ ଭୁଲିନଥାଆନ୍ତି । ଜୋତାରେ ଥିବା ବିଭିନ୍ନ ରଙ୍ଗବେରଙ୍ଗର ଚିତ୍ର ସାଙ୍ଗକୁ ପ୍ଲାଷ୍ଟିକ୍ ଝାଲର୍ ସମସ୍ତଙ୍କୁ ଆକର୍ଷିତ କରିଥାଏ । ଏହି ଜୋତାଗୁଡ଼ିକ ମଧ୍ୟରେ ରହିଛି ବନ୍ଦୁ, ବୈକ ଓପନ୍, ପଞ୍ଜାବୀ ନାଗରା ଭଳି ବିଭିନ୍ନ ଆକୃତିର ଜୋତା ।
ଏଗୁଡ଼ିକ ୧ଶହରୁ ୨ ଶହ ଟଙ୍କା ମଧ୍ୟରେ ଉପଲବ୍ଧ ହେଉଥିବାରୁ ଯୁବତୀ ଓ ମହିଳାମାନେ ବେଶ୍ ସୁବିଧାରେ କ୍ରୟ କରିପାରୁଛନ୍ତି । ଆପଣ ଯେ କୌଣସି ପ୍ରକାର ପୋଷାକ ପିନ୍ଧି ଏହାକୁ ପିନ୍ଧିଲେ ଏକ ନୂଆ ଲୁକ୍ ଦେଇଥାଏ । ତେଣୁ ଏହି ଜୋତାର ବିକ୍ରି ବର୍ଷତମାମ୍ ଚାଲିଥାଏ । କେବଳ ସେତିକି ନୁହେଁ, ଏହାକୁ ପିନ୍ଧି ଚଲାବୁଲା କଲେ ଜଣଙ୍କୁ କୌଣସି ପ୍ରକାର କଷ୍ଟ ହୋଇନଥାଏ । କାରଣ ଏହି ଜୋତା ଅନ୍ୟାନ୍ୟ ଜୋତା ତୁଳନା ବେଶ୍ ହାଲ୍କା, ନରମ ଓ କୋମଳ ।
ଏହା ସତ୍ତ୍ୱେ ପଟିଆଲା ସାଲୱାର ସୁଟ ଓ ସେରୱାନୀ ସାଙ୍ଗରେ ପଞ୍ଜାବୀ ଜୋତା ପିନ୍ଧିଲେ ଆପଣ ବେଶ୍ ଆକର୍ଷଣୀୟ ଦେଖାଯିବେ । ପ୍ରତ୍ୟେକ ସ୍ଥାନକୁ, ପ୍ରତ୍ୟେକ କାର୍ଯ୍ୟକ୍ରମକୁ ପଞ୍ଜାବୀ ଜୋତା ପିନ୍ଧି ଯାଇହେବ । ସବୁଠାରୁ ଉଲ୍ଲେଖନୀୟ କଥା ହେଲା-ଜୋତାର ସୌନ୍ଦର୍ଯ୍ୟତା, ନମନୀୟତା, ଆରାମ ପ୍ରଦାନକାରୀ ଓ ସୁଲଭ ମୂଲ୍ୟ କାରଣରୁ ଅଧୁନା ଯୁବତୀମାନେ ଏହାକୁ ପିନ୍ଧିବା ଲାଗି ଅଧିକ ପସନ୍ଦ କରୁଛନ୍ତି ।
