ଭାରତର ଘରୋଇ ଅନ୍ତର୍ଜାତୀୟ କାର୍ଯ୍ୟସୂଚୀ ଘୋଷିତ: ଡିସେମ୍ବର ୯ରେ ବାରବାଟୀରେ ଭାରତ-ସାଉଥ୍ ଆଫ୍ରିକା ଟି-୨୦
ମୁମ୍ବାଇ: ଭାରତୀୟ କ୍ରିକେଟ୍ କଣ୍ଟ୍ରୋଲ୍ ବୋର୍ଡ (ବିସିସିଆଇ) ବୁଧବାର ଟିମ୍ ଇଣ୍ଡିଆର ଘରୋଇ ଅନ୍ତର୍ଜାତୀୟ କ୍ରିକେଟ୍ କାର୍ଯ୍ୟସୂଚୀ ଘୋଷଣା କରିଛି। କାର୍ଯ୍ୟସୂଚୀ ଅନୁସାରେ ଡିସେମ୍ବର ୯ ତାରିଖରେ କଟକର ଐତିହାସିକ ବାରବାଟୀ ଷ୍ଟାଡିୟମ୍ରେ ଭାରତ ଓ ସାଉଥ୍ ଆଫ୍ରିକା ମଧ୍ୟରେ ଏକ ଟି-୨୦ ମ୍ୟାଚ୍ ଖେଳାଯିବ। ଚଳିତ ବର୍ଷରେ ଦ୍ୱିତୀୟ ଥର ପାଇଁ କଟକରେ ଅନ୍ତର୍ଜାତୀୟ ମ୍ୟାଚ୍ ଆୟୋଜିତ ହେବାକୁ ଯାଉଥିବାରୁ ରାଜ୍ୟ କ୍ରିକେଟ୍ପ୍ରେମୀଙ୍କ ମଧ୍ୟରେ ଉତ୍ସାହ ଦେଖାଦେଇଛି। ଏହା ପୂର୍ବରୁ ଫେବୃଆରୀ ୯ ତାରିଖରେ ଭାରତ ଓ ଇଂଲଣ୍ଡ ମଧ୍ୟରେ ଦିନିକିଆ ମ୍ୟାଚ୍ ଅନୁଷ୍ଠିତ ହୋଇଥିଲା। ଘୋଷିତ କାର୍ଯ୍ୟସୂଚୀ ଅନୁସାରେ ୱେଷ୍ଟଇଣ୍ଡିଜ୍ ଟିମ୍ ପ୍ରଥମେ ଭାରତ ଗସ୍ତରେ ଆସି ଦୁଇଟି ଟେଷ୍ଟ୍ ମ୍ୟାଚ୍ ଖେଳିବ। ପ୍ରଥମ ମ୍ୟାଚ୍ ଅକ୍ଟୋବର ୨ରୁ ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମ୍ରେ ଏବଂ ଦ୍ୱିତୀୟ ଟେଷ୍ଟ୍ ଅକ୍ଟୋବର ୧୦ରୁ କୋଲ୍କାତାର ଇଡେନ୍ ଗାର୍ଡେନ୍ରେ ଖେଳାଯିବ। ଏହାପରେ ସାଉଥ୍ ଆଫ୍ରିକା ଟିମ୍ ଆସି ଟିମ୍ ଇଣ୍ଡିଆ ବିପକ୍ଷରେ ନଭେମ୍ବର-ଡିସେମ୍ବରରେ ଦୁଇଟି ଟେଷ୍ଟ୍, ତିନିଟି ଦିନିକିଆ ଏବଂ ପାଞ୍ଚ ଟି-୨୦ ମ୍ୟାଚ୍ର ସିରିଜ୍ ଖେଳିବ। ଟେଷ୍ଟ୍ ସିରିଜ୍ରୁ ସାଉଥ୍ ଆଫ୍ରିକାର ଗସ୍ତ କାର୍ଯ୍ୟକ୍ରମ ଆରମ୍ଭ ହେବ। ପ୍ରଥମ ଟେଷ୍ଟ୍ ଦିଲ୍ଲୀରେ ନଭେମ୍ବର ୧୪ରୁ ୧୮ ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବ। ଏହାପରେ ଦ୍ୱିତୀୟ ଟେଷ୍ଟ୍ ମ୍ୟାଚ୍ ନଭେମ୍ବର ୨୨ରୁ ୨୬ ପର୍ଯ୍ୟନ୍ତ ଗୁଆହାଟୀର ବରସାପାରା ଷ୍ଟାଡିୟମ୍ରେ ଖେଳାଯିବ। ସୂଚନାଯୋଗ୍ୟ, ପ୍ରଥମ ଥର ପାଇଁ ଗୁଆହାଟୀରେ ଟେଷ୍ଟ୍ ମ୍ୟାଚ୍ ଆୟୋଜିତ ହେବ। ଟେଷ୍ଟ ସିରିଜ୍ ପରେ ଦୁଇଟି ଟିମ୍ ମଧ୍ୟରେ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ନଭେମ୍ବର ୩୦ରୁ ଆରମ୍ଭ ହେବ। ପ୍ରଥମ ମ୍ୟାଚ୍ ରାଞ୍ଚିରେ ଖେଳାଯିବାକୁ ଥିବାବେଳେ ଦ୍ୱିତୀୟ ମ୍ୟାଚ୍ (ଡିସେମ୍ବର ୩) ରାୟପୁର ଏବଂ ତୃତୀୟ ମ୍ୟାଚ୍ (ଡିସେମ୍ବର ୬) ବିଶାଖାପାଟଣାରେ ଆୟୋଜିତ ହେବ। ଏହାପରେ ୫ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ଖେଳାଯିବ। ଏହି ମ୍ୟାଚ୍ଗୁଡ଼ିକ ଯଥାକ୍ରମେ କଟକ (ଡିସେମ୍ବର ୯), ଚଣ୍ଡିଗଡ଼ର ମଲ୍ଲାନ୍ପୁର (ଡିସେମ୍ବର ୧୧), ଧର୍ମଶାଳା (ଡିସେମ୍ବର ୧୪), ଲକ୍ଷ୍ନୌ (ଡିସେମ୍ବର ୧୭) ଏବଂ ଅହମ୍ମଦାବାଦ (ଡିସେମ୍ବର ୧୯)ରେ ଖେଳାଯିବ।
