ପରିବେଶ ଇଞ୍ଜିନିୟର, ବୈଜ୍ଞାନିକଙ୍କୁ ମୁଖ୍ୟମନ୍ତ୍ରୀଙ୍କ ମନ୍ତ୍ର

ଭୁବନେଶ୍ୱର: କିଛି ବର୍ଷ ପୂର୍ବେ ଆମେ ବିଶ୍ୱ ତାପମାତ୍ରା ଓ ପ୍ରଦୂଷଣର ପ୍ରଭାବ ବିଷୟରେ ଆଲୋଚନା କରୁଥିଲୁ । ବର୍ତ୍ତମାନ ଆମେ ଜଳବାୟୁ ପରିବର୍ତ୍ତନ କଥା କହୁଛୁ । ତାହା ଏବେ ବିଶ୍ୱରେ ଲୋକଙ୍କ ଜୀବନକୁ କଷ୍ଟସାଧ୍ୟ କରିଦେଇଛି । ଚଳିତ ବର୍ଷ ୟୁରୋପ ଓ ଚାଇନାରେ ଭୟଙ୍କର ମରୁଡ଼ି ପରିସ୍ଥିତି ଦେଖାଦେଇଛି । ପାକିସ୍ତାନ ବହୁ ଦଶନ୍ଧି ମଧ୍ୟରେ ବନ୍ୟା ପରିସ୍ଥିତିର ସମ୍ମୁଖୀନ ହୋଇଛି । ଭାରତରେ ସର୍ବଦା ମରୁଡ଼ି କିମ୍ବା ବନ୍ୟା ପରିସ୍ଥିତି ଦେଖାଦେଉଛି । ତେଣୁ ନିଜକୁ ସଂଶୋଧନ କରିବାର ସମୟ ଆସିଛି । ଆମ ପାଇଁ ବିକାଶ ଏବଂ ପରିବେଶ ସୁରକ୍ଷା କରିବା ଜରୁରୀ । ଜଳବାୟୁ ଅନୁକୂଳ ସ୍ଥାୟୀ ବିକାଶ ଆବଶ୍ୟକ । ଏହି କଠିନ ପରିସ୍ଥିତିରେ ବିଜ୍ଞାନ ଓ ପ୍ରଯୁକ୍ତିବିଦ୍ୟା ଆମକୁ ସାହାଯ୍ୟ କରିପାରିବ । ରାଜ୍ୟ ସରକାର ଏନେଇ ବହୁ କାର୍ଯ୍ୟ ହାତକୁ ନେଇଛନ୍ତି । ତେଣୁ ନବନିଯୁକ୍ତ ସହକାରୀ ବୈଜ୍ଞାନିକମାନେ ଏକ ସ୍ୱଚ୍ଛ ଓ ସବୁଜ ଓଡ଼ିଶା ପାଇଁ ସମସ୍ତେ କାର୍ଯ୍ୟ କରିବାକୁ ହେବ । ସମସ୍ତେ କାର୍ଯ୍ୟରେ ସ୍ୱଚ୍ଛତା ବଜାୟ ରଖିବା ପାଇଁ ଦକ୍ଷ ଫଳାଫଳ ପାଇବା ପାଇଁ ୫-ଟି ନିୟମ ଅନୁସରଣ କରିବେ ।
ମଙ୍ଗଳବାର ଲୋକ ସେବା ଭବନରେ ପ୍ରଶୀକ୍ଷଣ କାର୍ଯ୍ୟକ୍ରମରେ ଭର୍ଚୁଆଲ୍ ପ୍ଲାଟଫର୍ମରେ ନୂତନ ୩୫ ସହକାରୀ ଇଞ୍ଜିନିୟର ଓ ବୈଜ୍ଞାନିକଙ୍କୁ ଏହି ଦିଗଦର୍ଶନ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେ ଅଭିନନ୍ଦନ ଜଣାଇ କହିଛନ୍ତି ଯେ ବର୍ତ୍ତମାନର ପରିବେଶ ଏବଂ ଜଳବାୟୁ ପରିବର୍ତ୍ତନ ହେଉଛି ବିଶ୍ୱର ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ । ଜଳବାୟୁ ପରିବର୍ତ୍ତନ କାର୍ଯ୍ୟ ଯୋଜନାରେ ଓଡ଼ିିଶା ଏକ ଆଗ ଧାଡି ରାଜ୍ୟ । ଜଳବାୟୁ ପରିବର୍ତ୍ତନ ସମସ୍ୟାର ସମାଧାନ ପାଇଁ ଆମେ ଏକ ବ୍ୟାପକ ନୀତି ପ୍ରସ୍ତୁତ କରିଛୁ । ପରିବେଶ ପ୍ରସଙ୍ଗରେ ସେମାନଙ୍କର ପାରଦର୍ଶୀତା ସହିତ ଇଞ୍ଜିନିୟର ଓ ବୈଜ୍ଞାନିକମାନେ ପ୍ରଦୂଷଣ ନିୟମକୁ କାର୍ଯ୍ୟକାରୀ କରିବା ତଥା ଆମର ପ୍ରୟାସରେ ଉନ୍ନତି ଆଣିବା ପାଇଁ ସେମାନଙ୍କର ପ୍ରମୁଖ ଭୂମିକା ଗ୍ରହଣ କରାଯାଇଛି । ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ମନ୍ତ୍ରୀ ପ୍ରଦୀପ କୁମାର ଅମାତ କହିଛନ୍ତି ଯେ, ପରିବେଶ ସମସ୍ୟାର ସମାଧାନ ପାଇଁ ଆମ ରାଜ୍ୟ ଭଲ କାମ କରୁଛି । ନିରନ୍ତର ବିକାଶ ଉପରେ ମୁଖ୍ୟମନ୍ତ୍ରୀ ସର୍ବଦା ଗୁରୁତ୍ୱାରୋପ କରିଛନ୍ତି । ରାଜ୍ୟ ପ୍ରଦ୍ୟୂଷଣ ନିୟନ୍ତ୍ରଣ ବୋର୍ଡ଼ ବର୍ତ୍ତମାନ ଦେଶର ସର୍ବୋତ୍ତମ ବୋର୍ଡ ମଧ୍ୟରୁ ଅନ୍ୟତମ । ଅନ୍ୟପକ୍ଷରେ ରାଜ୍ୟ ମୁଖ୍ୟ ଶାସନ ସଚିବ ତଥା ରାଜ୍ୟ ପ୍ରଦ୍ୟୂଷଣ ନିୟନ୍ତ୍ରଣ ବୋର୍ଡ଼ର ଅଧ୍ୟକ୍ଷ ସୁରେଶ ଚନ୍ଦ୍ର ମହାପାତ୍ର କହିଛନ୍ତି ଯେ, ଶିଳ୍ପ କାର୍ଯ୍ୟକଳାପରେ ବାଧା ନଦେଇ ପ୍ରଦ୍ୟୂଷଣ ଭାର ହ୍ରାସ ଦିଗରେ ୫-ଟି ମାନଦଣ୍ଡ କାର୍ଯ୍ୟ କରିବାକୁ ହେବ । ଏନେଇ ନୂତନ ଇଞ୍ଜିନିୟର୍ ଏବଂ ବୈଜ୍ଞାନିକମାନେ କାର୍ଯ୍ୟ କରିବେ । ଏହି ଅବସରରେ ତିନିଜଣ ନବନିଯୁକ୍ତ ବୈଜ୍ଞାନିକ ରାକେଶ ପଣ୍ଡା, ମୋନାଲିଶା ଦାଶ ଓ ବବି ବେହେରା ନିଯୁକ୍ତି ପ୍ରକ୍ରିୟାରେ ସେମାନଙ୍କ ଅଭିଜ୍ଞତା ବଖାଣିଥିଲେ । ଉଲ୍ଲେଖନୀୟ ଯେ ୩୫ ସହକାରୀ ପରିବେଶ ଇଞ୍ଜିନିୟର ଏବଂ ସହକାରୀ ପରିବେଶ ବୈଜ୍ଞାନିକ ରାଜ୍ୟ ପ୍ରଦ୍ୟୂଷଣ ନିୟନ୍ତ୍ରଣ ବୋର୍ଡ଼ରେ ଯୋଗ ଦେଇଛନ୍ତି । ସେମାନଙ୍କ ମଧ୍ୟରୁ ୧୩ ଜଣ ପରିବେଶ ଇଞ୍ଜିନିୟର ଏବଂ ୨୨ ଜଣ ପରିବେଶ ବୈଜ୍ଞାନିକ ।