ଦାରୁଠେଙ୍ଗ ଡମ୍ପିଂୟାର୍ଡ଼ ବିବାଦ

ଭୁବନେଶ୍ୱର: ଦାରୁଠେଙ୍ଗ ଡମ୍ପିଂୟାର୍ଡ ବିବାଦକୁ ଶନିବାର ଭୁବନେଶ୍ୱ୍ୱର ମହାନଗର ନିଗମ(ବିଏମ୍‌ସି) ମୁଖ୍ୟାଳୟରେ ଏକ ଦ୍ୱିପାକ୍ଷିକ ବୈଠକ ଅନୁଷ୍ଠିତ ହୋଇଯାଇଛି । ତେବେ ବୈଠକରେ କୌଣସି ଆଶାନୁରୂପ ନିଷ୍କର୍ସ ବାହାରିପାରି ନାହିଁ । ମେୟର ସୁଲୋଚନା ଦାସଙ୍କ ଅଧ୍ୟକ୍ଷତାରେ ଦୀର୍ଘ ଦେଢଘଣ୍ଟା ଧରି ଆଲୋଚନା ହୋଇଥିଲା । ଦାରୁଠେଙ୍ଗ ଗ୍ରାମର ୩୦ ଜଣିଆ ପ୍ରତିନିଧି ଓ ବିଏମ୍‌ସି ତଥା ପୁଲିସ୍ ଅଧିକାରୀଙ୍କ ଉପସ୍ଥିତିରେ ଅନୁଷ୍ଠିତ ବୈଠକରେ ଡମ୍ପିଂୟାର୍ଡ ଅଚଳାବସ୍ଥା ନେଇ କୌଣସି ନିଷ୍ପତ୍ତି ବାହାରିପାରିନାହିଁ । ଅନ୍ୟପଟେ ଗ୍ରାମସଭାରେ ନିଷ୍ପତ୍ତି ପରେ ଯାହା କିଛି ସୂଚନା ଦେବେ ବୋଲି ଗ୍ରାମବାସୀ ରୋକଠୋକ୍ କହିଛନ୍ତି । ଏଥିପାଇଁ ଦାରୁଠେଙ୍ଗବାସୀ ଦୁଇଦିନ ସମୟ ନେଇଛନ୍ତି । ଫଳରେ ଗ୍ରାମବାସୀ ନିଷ୍ପତ୍ତି ନଜଣାଇବା ପର୍ଯ୍ୟନ୍ତ ସହରର ଅଳିଆ ଦାରୁଠେଙ୍ଗ ଯିବ ନାହିଁ । ଅନ୍ୟପକ୍ଷରେ ମେୟର ଶ୍ରୀମତୀ ଦାସ କହିଛନ୍ତି ଯେ, ଖୋଲାହୃଦୟରେ ଗ୍ରାମବାସୀଙ୍କ ସହ ଆଲୋଚନା ହୋଇଛି । ସମସ୍ୟାର ସମାଧାନ ଖୁବ୍ ଶୀଘ୍ର ଫିଟିବ ।’
ସୂଚନା ଥାଉକି ଆଜିର ବୈଠକରେ ବିଏମ୍‌ସି କମିଶନର ଭର୍ଚୁଆଲ ମାଧ୍ୟମରେ ଯୋଗ ଦେଇଥିବାବେଳେ ଜଟଣୀ ବିଧାୟକ ସୁରେଶ ରାଉତରାୟ, ବିଏମ୍‌ସିର ଡେପୁଟି କମିଶନର, ଡିସିିପି ପ୍ରତୀକ୍ ସିଂ, ଏସିିପି, ଆଇଆଇସି, ଦାରୁଠେଙ୍ଗ ସରପଞ୍ଚ ତପନ କୁମାର ଚକ୍ରବର୍ତ୍ତୀ ଓ କିଛି ଗ୍ରାମବାସୀ ଉପସ୍ଥିତ ଥିଲେ । ପ୍ରାୟ ଦେଢଘଣ୍ଟା ଧରି ଚାଲିଥିଲା ଆଲୋଚନା । ଆଲୋନା ସମୟରେ ସରପଞ୍ଚ ଓ ଗ୍ରାମବାସୀ ଅଳିଆ ନକାଇବାକୁ ଅଡ଼ି ବସିଥିଲେ । ମାତ୍ର ବହୁ ବୁଝାବୁଝି ପରେ ରାଜଧାନୀବାସୀଙ୍କୁ ସାହାଯ୍ୟ କରିବାକୁ ଅନୁରୋଧ କରାଯାଇଥିଲା । ଭୁବନେଶ୍ୱରବାସୀଙ୍କୁ ଆଉ ୯ମାସ ସହଯୋଗ କରିବା ପାଇଁ ବିଏମ୍‌ସି ପକ୍ଷରୁ ଅନୁରୋଧ କରାଯାଇଛି । ତେବେ ଆଉ ଦୁଇ ଦିନ ପରେ ଏନେଇ ଗ୍ରାମବାସୀ ନିଷ୍ପତ୍ତି ଜଣାଇବେ ବୋଲି କହିଛନ୍ତି ।
ସୂଚନା ଥାଉ କି, ପରିମଳ ଜନିତ ପ୍ରଦୂଷଣ ସମସ୍ୟାକୁ ନେଇ ଦାରୁଠେଙ୍ଗ ପଞ୍ଚାୟତବାସୀ ଅଳିଆ ପକାଇବାକୁ ବିରୋଧ କରୁଛନ୍ତି । ପରିମଳ ସମସ୍ୟାର ସମାଧାନ ପାଇଁ ଭୁଆଶୁଣି ଡମ୍ପିଂୟାର୍ଡରେ ବିଏମ୍‌ସି ପକ୍ଷରୁ ବାୟୋ ମାଇନିଂ ପ୍ଲାଣ୍ଟ ସ୍ଥାପନ ପାଇଁ ରାଜ୍ୟ ସରକାରଙ୍କ ପକ୍ଷରୁ ୧୦୩କୋଟି ଟଙ୍କାର ଅନୁଦାନ ମିଳିଥିଲେ ମଧ୍ୟ ପ୍ଲାଣ୍ଟ ପ୍ରତିଷ୍ଠାରେ ବିଳମ୍ୱ ହେଉଛି । ସମସ୍ୟାର ସମାଧାନ ପାଇଁ ବିଏମ୍‌ସି କର୍ତ୍ତୃପକ୍ଷ ଓ ଦାରୁଠେଙ୍ଗ ପଞ୍ଚାୟତବାସୀଙ୍କ ସହ ଆଲୋଚନା ହେଉଥିଲେ ମଧ୍ୟ କୌଣସି ନିଷ୍କର୍ଷ ବାହାରି ପାରୁନାହିଁ । ଆସନ୍ତା ଜାନୁଆରୀ ସୁଦ୍ଧା ମଧ୍ୟରେ ବାୟୋମାଇନିଂ ପ୍ରକଳ୍ପ ଆରମ୍ଭ ହେବ ବୋଲି ବିଏମ୍‌ସି ପକ୍ଷରୁ କୁହାଯାଉଛି । ଅନ୍ୟପଟେ ଟ୍ରିଟ୍‌ମେଣ୍ଟ ପ୍ଳାଣ୍ଟ ଯେ ପର୍ଯ୍ୟନ୍ତ ନ ବସିଛି ସେତେ ପର୍ଯ୍ୟନ୍ତ ଅଳିଆ ପକେଇ ଦେବୁନି ନାହିଁ ବୋଲି ଦାରୁଠେଙ୍ଗବାସୀ ରୋକଠାକ୍ କହିଛନ୍ତି । ଅନ୍ୟପଟେ ରାଜଧାନୀ ପରିମଳ ବ୍ୟବସ୍ଥା ବିଗିଡ଼ି ଥିବାବେଳେ ଏହାଦ୍ୱାରା ସ୍ମାର୍ଟସିଟିର ଛବି ମଳିନ ହେଉଛି । ସେପଟେ ସୈନିକ ସ୍କୁଲ୍ ନିକଟସ୍ଥ ଟିଟିଏସ୍ ଆବର୍ଜନାରେ ଭର୍ତ୍ତି ହୋଇଥିବାବେଳେ ସେଠାକୁ ଅଳିଆ ଗାଡ଼ି ଯାଇପାରୁ ନାହିଁ । ଫଳରେ ସହରସାରା ଖାଲି କୁଢ଼ କୁଢ଼ ଅଳିଆ ଆବର୍ଜନା ଜମା ହୋଇ ରହିଛି । ଦାରୁଠେଙ୍ଗକୁ ଗାଡି ଯାଉନଥିବାରୁ ସୈନିକ ସ୍କୁଲ ନିକଟସ୍ଥ ଟିଟିଏସରେ ଅଳିଆ ପକାଇବା ପାଇଁ ଗାଡିଗୁଡିକର ଲମ୍ୱା ଲାଇନ ଲାଗୁଛି । ସହରର ସମସ୍ତ ଅଳିଆ ସେଠାରେ ପଡୁଥିବାରୁ ଆବର୍ଜନାର ପାହାଡ଼ ସୃଷ୍ଟି ହୋଇଥିବା ଦେଖିବାକୁ ମିଳୁଛି ।