ଓଡ଼ିଶାରେ ହେବ ଏସ୍ଆଇଆର
ଭୁବନେଶ୍ୱର : ରାଜ୍ୟରେ ୨୪ ବର୍ଷ ପରେ ଭୋଟର ତାଲିକାର ସ୍ପେଶାଲ୍ ଇଣ୍ଟେନସିଭ୍ ରିଭିଜନ୍ (ଏସ୍ଆଇଆର) ପ୍ରକ୍ରିୟା ଆସନ୍ତା ସେପ୍ଟେମ୍ବର ମାସରୁ ଆରମ୍ଭ ହେବାକୁ ଯାଉଛି। ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ଆର.ଏସ୍. ଗୋପାଳନ ସୋମବାର ଗଣମାଧ୍ୟମ ପ୍ରତିନିଧିମାନଙ୍କୁ ଏହି ସୂଚନା ଦେଇଛନ୍ତି। ଏହା ପୂର୍ବରୁ ୨୦୦୨ ମସିହାରେ ରାଜ୍ୟରେ ଏଭଳି ଏକ ସ୍ୱତନ୍ତ୍ର ସଂଶୋଧନ ପ୍ରକ୍ରିୟା କରାଯାଇଥିଲା। ଏହି ସ୍ପେଶାଲ୍ ଇଣ୍ଟେନସିଭ୍ ରିଭିଜନ୍ ପ୍ରକ୍ରିୟାର ମୁଖ୍ୟ ଉଦ୍ଦେଶ୍ୟ ହେଉଛି ଭୋଟର ତାଲିକାକୁ ତ୍ରୁଟିମୁକ୍ତ କରିବା। ଏହା ମାଧ୍ୟମରେ ଭୋଟର ତାଲିକାରୁ ଅଯୋଗ୍ୟ, ମୃତ ବା ଅନୁପସ୍ଥିତ ଭୋଟରଙ୍କ ନାମ ବାଦ ଦିଆଯିବ ଏବଂ ନୂତନ ଭୋଟରଙ୍କୁ ତାଲିକାରେ ଅନ୍ତର୍ଭୁକ୍ତ କରାଯିବ। ଏହା ସହିତ ଭୋଟର ପରିଚୟ ପତ୍ରରେ ଥିବା ତ୍ରୁଟି ଯଥା ନାମ, ଠିକଣା ବା ଅନ୍ୟାନ୍ୟ ତଥ୍ୟରେ ସଂଶୋଧନ କରାଯିବ। ଆର.ଏସ୍. ଗୋପାଳନ କହିଛନ୍ତି ଯେ ଏହି ପ୍ରକ୍ରିୟା ନିର୍ବାଚନକୁ ଅଧିକ ସ୍ୱଚ୍ଛ ଓ ନିରପେକ୍ଷ କରିବାରେ ସହାୟକ ହେବ। ପ୍ରତ୍ୟେକ ଯୋଗ୍ୟ ଭୋଟରଙ୍କୁ ତାଲିକାରେ ଅନ୍ତର୍ଭୁକ୍ତ କରିବା ଏବଂ ଅଯୋଗ୍ୟ ନାମଗୁଡ଼ିକୁ ବାଦ ଦେବା ହେଉଛି ଆମର ଲକ୍ଷ୍ୟ ବୋଲି ସେ କହିଛନ୍ତି। ଏହି ଏସ୍ଆଇଆର ପ୍ରକ୍ରିୟା ୨୦୨୫ ସେପ୍ଟେମ୍ବରରୁ ଆରମ୍ଭ ହୋଇ ୨୦୨୬ ଜାନୁଆରୀ ୭ ସୁଦ୍ଧା ଚୂଡ଼ାନ୍ତ ଭେରିଫିକେସନ ସହିତ ସମାପ୍ତ ହେବ। ଏହି ସମୟରେ ରାଜ୍ୟର ସମସ୍ତ ୧୪୭ଟି ବିଧାନସଭା ନିର୍ବାଚନ ମଣ୍ଡଳୀ ଏବଂ ୨୧ଟି ଲୋକସଭା ନିର୍ବାଚନ ମଣ୍ଡଳୀରେ ଘରେ ଘରେ ଯାଇ ଭୋଟର ତାଲିକାର ଯାଞ୍ଚ କରାଯିବ। ଏଥିପାଇଁ ବୁଥ ଲେଭେଲ ଅଫିସର ଏବଂ ଅନ୍ୟାନ୍ୟ ନିର୍ବାଚନ ଅଧିକାରୀମାନେ ନିୟୋଜିତ ହେବେ। ଏହା ସହିତ, ଅନଲାଇନ୍ ପୋର୍ଟାଲ ଙ୍ଗଙ୍ଗଙ୍ଗ.ଦ୍ଭଙ୍ଖଗ୍ଦକ୍ଟ୍ର.ସଦ୍ଭ ଏବଂ ଭୋଟର ହେଲ୍ପଲାଇନ ଆପ୍ ମାଧ୍ୟମରେ ଜନସାଧାରଣ ନିଜର ନାମ ଯାଞ୍ଚ କରିପାରିବେ ଏବଂ ଆବଶ୍ୟକ ହେଲେ ସଂଶୋଧନ କିମ୍ବା ନୂତନ ପଞ୍ଜୀକରଣ ପାଇଁ ଆବେଦନ କରିପାରିବେ। ଅଫଲାଇନ୍ ମାଧ୍ୟମରେ ମଧ୍ୟ ସଂଶୋଧନ ପାଇଁ ଫର୍ମ-୬, ଫର୍ମ-୭ ଓ ଫର୍ମ-୮ ଉପଲବ୍ଧ ରହିଛି।ଏସ୍ଆଇଆର ପ୍ରକ୍ରିୟା ଘୋଷଣା ପୂର୍ବରୁ ବିଜେଡି ଏବଂ କଂଗ୍ରେସ ଏହାକୁ ରାଜନୈତିକ ପ୍ରଭାବ ସୃଷ୍ଟି କରିବାର ଏକ ଉଦ୍ୟମ ବୋଲି ଅଭିଯୋଗ କରିଥିଲେ। ତେବେ ମୁଖ୍ୟ ନିର୍ବାଚନ ଅଧିକାରୀ ଶ୍ରୀ ଗୋପାଳନ ଏହି ଅଭିଯୋଗକୁ ଖଣ୍ଡନ କରି କହିଛନ୍ତି, “ଏହି ପ୍ରକ୍ରିୟା ସମ୍ପୂର୍ଣ୍ଣ ନିରପେକ୍ଷ ଓ ସ୍ୱଚ୍ଛ ହେବ। ଏହାର ଉଦ୍ଦେଶ୍ୟ କେବଳ ନିର୍ବାଚନ ପ୍ରକ୍ରିୟାକୁ ସୁଦୃଢ଼ କରିବା ଏବଂ ଭୋଟର ତାଲିକାରେ ସଠିକତା ଆଣିବା।” ସେ ସମସ୍ତ ରାଜନୈତିକ ଦଳଙ୍କୁ ଏହି ପ୍ରକ୍ରିୟାରେ ସହଯୋଗ କରିବାକୁ ମଧ୍ୟ ଅନୁରୋଧ କରିଛନ୍ତି। ଏହି ପ୍ରକ୍ରିୟା ଜନସାଧାରଣଙ୍କୁ ନିଜର ଭୋଟର ତାଲିକା ଯାଞ୍ଚ କରିବାର ଏକ ସୁଯୋଗ ପ୍ରଦାନ କରୁଛି। ଯେଉଁମାନେ ୧୮ ବର୍ଷ ବୟସ ପୂର୍ଣ୍ଣ କରିଛନ୍ତି, ସେମାନେ ନୂତନ ଭାବେ ପଞ୍ଜୀକରଣ କରିପାରିବେ। ଏହା ସହିତ, ଭୋଟର ପରିଚୟ ପତ୍ରରେ ନାମ, ଠିକଣା, ଫଟୋ ବା ଅନ୍ୟାନ୍ୟ ତ୍ରୁଟି ସଂଶୋଧନ କରିବାର ସୁଯୋଗ ମିଳିବ। ଜନସାଧାରଣ ସ୍ଥାନୀୟ ବୁଥ ଲେଭେଲ ଅଫିସରଙ୍କ ସହ ଯୋଗାଯୋଗ କରନ୍ତୁ କିମ୍ବା ନିର୍ବାଚନ କମିଶନର ଅଫିସିଆଲ ୱେବସାଇଟ୍ ମାଧ୍ୟମରେ ନିଜର ତଥ୍ୟ ଯାଞ୍ଚ କରନ୍ତୁ ବୋଲି ଶ୍ରୀ ଗୋପାଳନ ଅନୁରୋଧ କରିଛନ୍ତି। ଏହି ପ୍ରକ୍ରିୟା ମାଧ୍ୟମରେ ଓଡ଼ିଶାରେ ଥିବା ପ୍ରାୟ ୩.୫୧ କୋଟି ଭୋଟରଙ୍କ ତାଲିକାକୁ ସାମିଲ କରାଯିବ। ଶ୍ରୀ ଗୋପାଳନଙ୍କ ଅନୁଯାୟୀ ଏହା ଆଗାମୀ ନିର୍ବାଚନଗୁଡ଼ିକୁ ଅଧିକ ନିର୍ଭୁଲ ଓ ନ୍ୟାୟପୂର୍ଣ୍ଣ କରିବ। ଏହା ସହିତ, ଡିଜିଟାଲ ପ୍ଲାଟଫର୍ମର ବ୍ୟବହାର ଏହି ପ୍ରକ୍ରିୟାକୁ ଆହୁରି ସହଜ ଓ ଜନସାଧାରଣଙ୍କ ପାଇଁ ସୁଗମ କରିବ।
