ନବ ଦାସ କହିଲେ ‘ମୁଁ ସୁନା କଳସ ଦାନ କରିଛି’

ଭୁବନେଶ୍ୱର : ମୁମ୍ବାଇର ଶନି ମନ୍ଦିରକୁ ଜଣେ ଓଡ଼ିଆଙ୍କର ସୁନା କଳସ ଦାନ ନେଇ ଯେଉଁ ଚର୍ଚ୍ଚା ହୋଇ ଆସୁଥିଲା ସେହି ଚର୍ଚ୍ଚାର ଅନ୍ତ ଘଟିଛି । ସେ ସୁନା କଳସ ଦାନ କରିଛନ୍ତି ବୋଲି ସ୍ୱାସ୍ଥ୍ୟ ମନ୍ତ୍ରୀ ନବ କିଶୋର ଦାସ ସ୍ପଷ୍ଟ କରିଛନ୍ତି ।  ନବ ଦାସ କହିଛନ୍ତିଯେ, ପବିତ୍ର ତ୍ରିବେଣୀ ଅମାବାସ୍ୟାରେ ସେ ଶନିଦେବ ମନ୍ଦିରକୁ ଯାଇଥିଲେ  । ସେଠାରେ ସୋରିଷ ତେଲ ରଖିବା ପାଇଁ କଳସ ଦିଆଯାଇଥାଏ  । ସେ ମଧ୍ୟ ସୋରିଷ ତେଲ ରଖିବା ପାଇଁ ଏକ ଗଡ଼ୁ ଦେଇଥିଲେ  । ଏଥିପାଇଁ ସେ ୧୦ ଲକ୍ଷ ଟଙ୍କା ଦେଇଥିଲେ  । ସେହି କଳସର ଦାମ କୋଟିଏ ଟଙ୍କା ନୁହଁ ବୋଲି ଶ୍ରୀ ଦାସ କହିଛନ୍ତି  ।  ଓଡ଼ିଶାବାସୀ ଖୁସିରେ ରହିବା ଓ ଝାରସୁଗୁଡ଼ାବାସୀ ଖୁସିରେ ରହିବା ନିମନ୍ତେ ସେ ଶନିଦେବଙ୍କ ନିକଟରେ ପ୍ରାର୍ଥନା କରିଥିଲେ  । ଲୋକଙ୍କର ସେବା କରିବା ପାଇଁ ତାଙ୍କୁ ପ୍ରଭୁ ଶକ୍ତି ଦିଅନ୍ତୁ ବୋଲି ସେ କାମନା କରିଥିଲେ ବୋଲି ଶ୍ରୀ ଦାସ ପ୍ରକାଶ କରିଛନ୍ତି  । ସୂଚନାଯୋଗ୍ୟଯେ, ଗତ ଶନିବାର ଦିନ ଜଣେ ଓଡ଼ିଆ ଭକ୍ତ ୭୦୦ ଗ୍ରାମ ସୁନା ଓ ୫ କେଜି ରୂପାର ଏକ କଳସ ପ୍ରଦାନ କରିଥିବା ନେଇ ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଥିଲା । ସେତେବେଳେ ନବ ଦାସଙ୍କ ଫଟୋ ଓ ଭିଡ଼ିଓ ଭାଇରାଲ ହୋଇଥିଲା  ।