ଖୋଲୁନି ମାର୍କେଟ ବିଲ୍ଡିଂ
ଭୁବନେଶ୍ୱର,୨୧।୭(ବନ୍ଦନା ସେଠୀ): ଭୁବନେଶ୍ୱରର ପ୍ରମୁଖ ମାର୍କେଟ ୟୁନିଟ-୨ ମାର୍କେଟ ବିଲ୍ଡିଂ ଲଗାତର ୫ଦିନ ଧରି ବନ୍ଦ ରହିଛି। ଉଠାଦୋକାନୀଙ୍କୁ ଉଚ୍ଛେଦ କରିବା ଦାବିରେ ସେଣ୍ଟ୍ରାଲ ମାର୍କେଟ ଆସୋସିଏଶନ ଜିଦ୍ ଧରି ବସିଥିବାବେଳେ ବିଏମ୍ସି କିନ୍ତୁ ହାତ ଟେକି ଦେଇଛି। ବିଏମ୍ସି କର୍ତ୍ତୃପକ୍ଷ କୌଣସି ନିଷ୍ପତ୍ତି ନେବା ତ ଦୂରର କଥା ଆସୋସିଏଶନ ସହିତ ଆଲୋଚନା କରୁ ନ ଥିବାରୁ ବ୍ୟବସାୟୀଙ୍କ ମଧ୍ୟରେ ଅସନ୍ତୋଷ ଦେଖା ଦେଇଛି। ଅପରପକ୍ଷେ ମାର୍କେଟ ବନ୍ଦ ଥିବାରୁ ଇତି ମଧ୍ୟରେ ବ୍ୟବସାୟୀମାନେ ଲକ୍ଷଲକ୍ଷ ଟଙ୍କାର କ୍ଷତି ସହିଥିବା ଆସୋସିଏଶନ ପକ୍ଷରୁ କୁହାଯାଇଛି। ବିଏମ୍ସିକୁ ସ୍ଥାୟୀ ଦୋକାନୀମାନେ ଟିକସ ଦେବା ସହ ମାର୍କେଟର ସମସ୍ତ ରକ୍ଷଣାବେକ୍ଷଣ ଦାୟିତ୍ୱ ବୁଝୁଛନ୍ତି। ମାତ୍ର ବିଏମ୍ସି ସେମାନଙ୍କ ଅସୁବିଧାକୁ ବୁଝିବା ପରିବର୍ତ୍ତେ ପରୋକ୍ଷରେ ଅସ୍ଥାୟୀ ବ୍ୟବସାୟୀଙ୍କୁ ସମର୍ଥନ କରୁଥିବା ଅଭିଯୋଗ ହୋଇଛି। ତେବେ ଶୁକ୍ରବାର ଭୁବନେଶ୍ୱରର ଅନ୍ୟ ମାର୍କେଟ ଆସୋସିଏଶନର ପ୍ରମୁଖ କର୍ମକର୍ତ୍ତାମାନଙ୍କୁ ଡକାଯାଇଛି। ସେମାନଙ୍କ ସହ ଆଲୋଚନା ପରେ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ଆସୋସିଏଶନ ସମ୍ପାଦକ ରଞ୍ଜିତ ମହାନ୍ତି କହିଛନ୍ତି। ଅପରପକ୍ଷେ ଆସୋସିଏଶନର ଏଭଳି ମନମୁଖି କାର୍ଯ୍ୟ ପାଇଁ ଉଠାଦୋକାନୀମାନେ ହଇରାଣ ହେଉଛନ୍ତି। ହାଇକୋର୍ଟଙ୍କ ଅର୍ଡର ସତ୍ତ୍ୱେ ସେମାନଙ୍କୁ ବେପାର କରିବାକୁ ଦିଆଯାଉ ନାହିଁ। ଏହା ଆଇନ ଅନୁଯାୟୀ ଅନୁଚିତ। ଅସ୍ଥାୟୀ ବ୍ୟବସାୟୀମାନେ ଶାନ୍ତି ଶୃଙ୍ଖଳାର ସହ ଅପେକ୍ଷା କରିଛନ୍ତି। ଯେବେ ଆସୋସିଏଶନ ମାକେର୍ଟ ଖୋଲିବ ସେବେ ବ୍ୟବସାୟୀମାନେ ପୁଣି ନିଜ ସ୍ଥାନରେ ବେପାର କରିବେ ବୋଲି ଉଠା ଦୋକାନୀଙ୍କ ଓକିଲ ସୁମନ୍ତ କୁମାର ସ୍ବାଇଁ କହିଛନ୍ତି। ସୂଚନାଯୋଗ୍ୟ, ପୂର୍ବରୁ ମଧ୍ୟ ୨ଥର ମାର୍କେଟ ଆସୋସିଏଶନ ସମାନ ଦାବି ନେଇ ମାର୍କେଟ ବନ୍ଦ କରିଥିଲା। କେବେ ୨ଦିନ ତ କେବେ ୪ଦିନ ମଧ୍ୟରେ ବିଏମ୍ସି କର୍ତ୍ତୃପକ୍ଷ ସେମାନଙ୍କୁ ବୁଝାଇ ସୁଝାଇ ପୁଣି ମାର୍କେଟ ଖୋଲିବାରେ ସଫଳ ହୋଇଥିଲେ। ମାତ୍ର ବାରମ୍ବାର ଉଠାଦୋକାନୀମାନେ ମାର୍କେଟକୁ କବ୍ଜା କରୁଥିବାବେଳେ ବିଭିନ୍ନ ସମସ୍ୟା ସୃଷ୍ଟି କରୁଛନ୍ତି। ସେହିପରି ବିଏମ୍ସି କେବଳ ପ୍ରତିଶ୍ରୁତି ଦେଇ ଦେଖଣାହାରି ସାଜୁଛି। ତେଣୁ ଏଥର ଆସୋସିଏଶନ ପକ୍ଷରୁ ଚରମ ନିଷ୍ପତ୍ତି ନିଆଯାଇଛି। ଦାବି ପୂରଣ ନ ହେବା ପର୍ଯ୍ୟନ୍ତ ଆସୋସିଏଶନ ମାର୍କେଟ ଖୋଲିବ ନାହିଁ ବୋଲି କହିଛି। ଏଥିସହ ମାର୍କେଟର ମୁଖ୍ୟ ଗେଟ୍ରେ ତାଲା ମଧ୍ୟ ପକାଇ ଦେଇଛି। ସବୁଠାରୁ ବଡ କଥା ହେଲା, ଆସୋସିଏଶନର ଏଭଳି କାମକୁ ବିଏମ୍ସି ନାପସନ୍ଦ କରିଛି। ବାରମ୍ବାର ମାର୍କେଟ ବନ୍ଦ କରିବା ଦ୍ୱାରା ଜନସାଧାରଣଙ୍କ ପାଖକୁ ଖରାପ ସନ୍ଦେଶ ଯାଉଛି। ତେଣୁ ଏଯାବତ୍ ଆସୋସିଏଶନକୁ ମନାଇବାକୁ ବିଏମ୍ସି ଆଦୌ ପ୍ରୟାସ କରିନାହିଁ। ଆସୋସିଏଶନ, ଅସ୍ଥାୟୀ ବ୍ୟବସାୟୀ ନା ବିଏମ୍ସି କେହି କାହା ଆଗରେ ମୁଣ୍ଡ ନୁଆଁଇବାକୁ ରାଜି ନାହାନ୍ତି। ତେବେ ଏସବୁ ଭିତରେ ସାଧାରଣ ଲୋକ ବହୁ ଅସୁବିଧାର ସମ୍ମୁଖୀନ ହେଉଥିବା ଦେଖିବାକୁ ମିଳୁଛି।
