ଅଠର ତମ ପ୍ରବାସୀ ଭାରତୀୟ ଦିବସ-୨୦୨୫, ବ୍ୟଞ୍ଜନ ହିଁ ଗୋଟିଏ ଦେଶର ସଂସ୍କୃତିର ପରିଚୟ: ଶେଖାୱତ
ଭୁବନେଶ୍ୱର: ‘ବ୍ୟଞ୍ଜନ ହିଁ ଗୋଟିଏ ଦେଶର ସଂସ୍କୃତିର ପରିଚୟ। ନିଜ ଘରୋଇ ଖାଦ୍ୟକୁ ପ୍ରଭାବଶାଳୀ ଭାବରେ ପ୍ରସାର ଓ ପ୍ରଚାର କରିବା ପାଇଁ ନିଜ ସଂସ୍କୃତି ବିଷୟରେ କୌଣସି ସଂକୋଚ ପ୍ରକାଶ ନ କରିବା ଉଚିତ।’ ଅଠର ତମ ପ୍ରବାସୀ ଭାରତୀୟ ଦିବସ ସମ୍ମିଳନୀର ଉଦ୍ଯାପନୀ ଦିବସରେ ଅନୁଷ୍ଠିତ ‘ପ୍ରବାସୀ ବିତର୍କ: ସଂସ୍କୃତି, ସଂଯୋଗ ଏବଂ ସମ୍ପର୍କ’ ଶୀର୍ଷକ ଆଲୋଚନାଚକ୍ରରେ ଯୋଗଦେଇ ଏହା କହିଛନ୍ତି ସଂସ୍କୃତି ଏବଂ ପର୍ଯ୍ୟଟନ ମନ୍ତ୍ରୀ ଗଜେନ୍ଦ୍ର ସିଂହ ଶେଖାୱତ୍। ସେ କହିଛନ୍ତି ଯେ ପ୍ରବାସୀ ଭାରତୀୟମାନେ ବିଦେଶରେ ଭାରତର ସମୃଦ୍ଧ ଐତିହ୍ୟର ବାହକ। ଅନେକ ପ୍ରବାସୀ ଭାରତୀୟ ବିଦେଶରେ ଭାରତୀୟ ଖାଦ୍ୟ ଓ ପରମ୍ପରାକୁ ଲୋକପ୍ରିୟ କରିବାରେ ପ୍ରମୁଖ ଭୂମିକା ତୁଲାଉଛନ୍ତି। ଯୋଗ, ସଙ୍ଗୀତ, ଖାଦ୍ୟ ଓ କଳା ଭଳି ସୂକ୍ଷ୍ମ ଶକ୍ତି ବିଶ୍ୱବ୍ୟାପୀ ପ୍ରଶଂସା ଭାଜନ ବି ହୋଇପାରିଛି। ନ୍ୟୁୟର୍କର ଖାଦ୍ୟ ଟ୍ରକ୍ରୁ ଲଣ୍ଡନର ମିସେଲିନ୍-ତାରକା ପ୍ରତିଷ୍ଠାନ ପର୍ଯ୍ୟନ୍ତ ଭାରତୀୟ ଖାଦ୍ୟର ଚାହିଦା ଆମର ରାନ୍ଧଣା ଐତିହ୍ୟ ଏକ ଉଲ୍ଲେଖନୀୟ ପରିବର୍ତ୍ତନ ଆଣିଛି। ଟାଇମ୍ସ ସ୍କୋୟାରରେ ଦୀପାବଳି ପୋଷ୍ଟର ଓ ବିଦେଶର ବିଭିନ୍ନ ସ୍ଥାନରେ ଦୀପାବଳି ଚିତ୍ରକଳା ଦେଖିବା ସମୟରେ ଆମକୁ ଗର୍ବ ଅନୁଭବ ହୁଏ। ଆମର ସହଭାଗୀ ଐତିହ୍ୟର ଅବଦାନ ଭାବରେ ଭାରତର ପର୍ଯ୍ୟଟନ କ୍ଷେତ୍ରରେ ପ୍ରବାସୀ ଭାରତୀୟଙ୍କ ନିବେଶ କରିବା ଜରୁରୀ ବୋଲି କେନ୍ଦ୍ର ମନ୍ତ୍ରୀ ଶ୍ରୀ ଶେଖାୱତ ଆହ୍ୱାନ ଦେଇଛନ୍ତି। ଆନ୍ତର୍ଜତୀକ ସ୍ତରରେ ଖୁବ୍ ସୂନାମ ଅର୍ଜିଥିବା ସେଫ୍ ରଣବୀର ବ୍ରାର କହିଛନ୍ତି ଯେ ଗତ କିଛି ବର୍ଷ ଧରି ଭାରତୀୟ ଖାଦ୍ୟ ଏହାର ସ୍ୱାଦ ପାଇଁ ନୁହେଁ ବରଂ ଭାରତୀୟ ସଂସ୍କୃତି ଓ ପରମ୍ପରା ବିଶ୍ୱ ମଞ୍ଚରେ ସମ୍ମାନ ଅର୍ଜନ କରିଛି। ପୂର୍ବରୁ ବିଦେଶରେ ରେଷ୍ଟୁରାଣ୍ଟ ସ୍ଥାପନ କରିବାବେଳେ, ମୁଁ ମଡର୍ଣ୍ଣ ଇଣ୍ଡିଆନ୍ ରେଷ୍ଟୁରାଣ୍ଟ ଭଳି ହାଇଫେନେ ଫୁଡ୍ ଶବ୍ଦ ବ୍ୟବହାର କରୁଥିଲି। କିନ୍ତୁ ଏବେ କେବଳ ଭାରତୀୟ ରେଷ୍ଟୁରାଣ୍ଟ ନାମ ଯଥେଷ୍ଟ। ଗ୍ରାହକମାନଙ୍କୁ ଆପେ ଆପେ ଆକର୍ଷିତ ହୋଇ ଆସୁଛନ୍ତି। ଗତ ୨୫ ବର୍ଷ ମଧ୍ୟରେ ଲୋକମାନେ ଖାଦ୍ୟ ଓ ସଂସ୍କୃତିକୁ ଏକାଠି ଦେଖିବା ଆରମ୍ଭ କରିଥିବାରୁ ଏହା ସମ୍ଭବ ହୋଇଛି ବୋଲି ବ୍ରାର ମତ ପ୍ରକାଶ କରିଛନ୍ତି। ଉକ୍ତ ଆଲୋଚନାଚକ୍ରର ମଞ୍ଚ ପରିଚାଳନା କରାଇଥିଲେ ଭାରତୀୟ ସାଂସ୍କୃତିକ ସମ୍ବନ୍ଧ ପରିଷଦର ଡିଜି କେ. ନନ୍ଦିନୀ ସିଙ୍ଗଲା। ମରିସସ୍ର କଳା ଓ ସଂସ୍କୃତି ମନ୍ତ୍ରୀ ମହେନ୍ଦ୍ର ଗୋଣ୍ଡିଆ, ଭୁଟାନର ଲେଖିକା, ଡିଜାଇନର ତଥା କଳାକାର ସୁଶ୍ରୀ ଚାର୍ମି ଛେଦା, ୟୁକ୍ରେନ୍ର ଅର୍ଣ୍ଣବ ରାୟଚୂଡ଼ାମଣି, ନ୍ୟୁଜିଲାଣ୍ଡର ସୁଶ୍ରୀ ବାଣିସା ଧୀରୁ, ଓମାନ୍ର ଐଶ୍ୱର୍ଯ୍ୟା ହେଗ୍ଡେ, ଉଗାଣ୍ଡାର ପ୍ରବେଶ କୁମାର ରତିଲାଲ ମେହେତା, ମଲେୟେସିଆର ଶଙ୍କର କଂଦସାମୀ, ଇଟାଲିର ସୁଶ୍ରୀ ଉର୍ମିଳା ଚକ୍ରବର୍ତ୍ତୀ ପ୍ରମୁଖ ବକ୍ତବ୍ୟ ରଖିଥିଲେ।
