ଚିଲିକାର ରଘୁ ସାହୁଙ୍କୁ ବହିଷ୍କାର ବଦଳରେ ମିଳିଲା ପୁରସ୍କାର, ଅଡୁଆରେ ବିଜେଡି କର୍ମୀ ଓ ନେତା

ଭୁବନେଶ୍ବର: ଚିଲିକାର ପୂର୍ବତନ ବିଧାୟକ ରଘୁନାଥ ସାହୁଙ୍କୁ ବିଜେଡି ବହିଷ୍କାର କରିବା ପରିବର୍ତ୍ତେ ପୁରସ୍କାର ଦେଇଛି। କାରଣ ନିକଟରେ ଶଙ୍ଖ ଭବନରେ ଆୟୋଜିତ ହୋଇଥିବା ଖୋର୍ଦ୍ଧା ଜିଲ୍ଲା ସଂଗଠନର ସମୀକ୍ଷା ବୈଠକରେ ସେ ସାମିଲ ହୋଇଛନ୍ତି। ବଡ ନେତାଙ୍କ ଗହଣରେ ତାଙ୍କୁ ସ୍ଥାନ ମିଳିଛି। ଯାହା ତାଙ୍କ ପାଇଁ ବିଜେଡିର ବଡ ପୁରସ୍କାର ବୋଲି କହିଲେ ଅତ୍ୟୁକ୍ତି ହେବ ନାହିଁ। କାରଣ ସେ ବିଗତ ଦିନରେ ବିଜେଡିର ବହୁ ନେତାଙ୍କୁ ଗାଳି କରିଥିଲେ, ପଞ୍ଚାୟତ ପୌର ନିର୍ବାଚନରେ ବିଜେଡି ପ୍ରାର୍ଥୀ ହାରିବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ସେଥିପାଇଁ ସମସ୍ତେ ଭାବି ଥିଲେ ତାଙ୍କ ବିରୋଧରେ ବିଜେଡି କାର୍ଯ୍ୟାନୁଷ୍ଠାନ ନେବ। ହେଲେ ତାହା ହେଲା ନାହିଁ । ବରଂ ତାଙ୍କୁ ନିମନ୍ତ୍ରଣ କରି ଶଙ୍ଖ ଭବନରେ ବସାଇଲେ। ଯାହାକୁ ନେଇ ବହୁ ବିଜେଡି କର୍ମି ଏବଂ ନିର୍ବାଚିତ ପ୍ରତିନିଧ ଦଳର ଏପରି ପଦକ୍ଷେପକୁ ନାମପସନ୍ଦ କରିଛନ୍ତି।ରଘୁନାଥ ଏକଦା ଏକ ସାମ୍ବାଦିକ ସମ୍ମିଳନୀ କରି ସାଂସଦ ପିନାକୀ ମିଶ୍ର, ବିଧାୟକ ପ୍ରଶାନ୍ତ ଜଗଦ୍ଦେବ ଏବଂ ଜିଲ୍ଲା ସଭାପତି ବିଭୂତି ବଳବନ୍ତରାୟଙ୍କୁ ଗାଳି କରିଥିଲେ।ପରୋକ୍ଷରେ ନୁହେଁ ସିଧା ସେମାନଙ୍କ ନାଁ ଧରି ସେମାନେ ଦୁର୍ନିତିଗସ୍ତ ନେତା ବୋଲି କହିଥିଲେ। ସେମାନେ ପିସି କାରବାର କରୁଛନ୍ତି ବୋଲି କହିଥିଲେ। ଏହାର ଉଚିତ ଜବାବ ଦିଆଯିବ ବୋଲି ଜିଲ୍ଲା ସଭାପତି ବିଭୂତି ବଳବନ୍ତରାୟ ବାଲୁଗାଁରେ ଆୟୋଜିତ ବିଜେଡି ବୈଠକରେ କହିଥିଲେ। ହେଲେ ସେଥିରେ ମଧ୍ୟ କିଛି କିଛି ହେଲା ନାହିଁ। ବିଜେଡିର ନେତାମାନଙ୍କୁ ଖୋଲମଖୁଲା ଗାଳି କରିବା, ସେମାନେ ଦୁର୍ନୀତିଗସ୍ତ ବୋଲି କହିବା, ସେହି ଦୁର୍ନୀତିଗସ୍ତ ନେତାଙ୍କ ପାଇଁ ଚିଲିକାରେ ବିଜେଡି ହାରିବ ବୋଲି କହିବା ପରେ ମଧ୍ୟ ରଘୁନାଥଙ୍କୁ ବିଜେଡି କୋଳରେ ବସାଇଲା। ଫଳରେ କର୍ମୀମାନେ ଭାବିଲେଣି ଯେ, ଦଳରେ ରହି ଦଳ ବିରୋଧୀ କାମ କଲେ ବୋଧହୁଏ ବିଜେଡି ଖୁସି ହେଉଛି। ବିଜେଡିକୁ ରଘୁନାଥ କି ପ୍ରକାରର ଗଦ ଶୁଙ୍ଘାଇଲେ ତାହା ସମସ୍ତଙ୍କ ମନରେ ପ୍ରଶ୍ନବାଚୀ ସୃଷ୍ଟି କରିଛି। ଯଦି ଚିଲିକାର ବିଜେଡି ରାଜନୀତିକୁ ନିରେଖି ଦେଖାଯାଏ ତେବେ ବିଜେଡିରୁ ବହିଷ୍କାର ହୋଇଥିଲେ ମଧ୍ୟ ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ସପକ୍ଷରେ ବହୁ କର୍ମୀ ଓ ନେତା ରହିଛନ୍ତି। ଏବେ ବି ସେମାନେ ବିଧାୟକଙ୍କୁ ସମର୍ଥନ କରୁଛନ୍ତି। ରଘୁନାଥଙ୍କୁ ବିରୋଧ କରୁଛନ୍ତି। ଯଦି ଆଗାମୀ ଦିନରେ ବିଜେଡି ରଘୁନାଥଙ୍କୁ ଟିକେଟ ଦିଏ, ତେବେ ବିରୋଧୀ ଗୋଷ୍ଠୀଙ୍କୁ ସେ କିପରି ସାଥୀରେ ନେବେ ଏବଂ ସେମାନେ ରଘୁନାଥଙ୍କୁ କିପରି ସାହାଯ୍ୟ କରିବେ ତାହା ସନ୍ଦେହଯୁକ୍ତ।