ରାଜ୍ୟରେ ଅଂଶୁଘାତ ମୁକାବିଲା ପାଇଁ ମୁଖ୍ୟ ଶାସନ ସଚିବଙ୍କ ବୈଠକ
ଭୁବନେଶ୍ବର: ସଂପ୍ରତି ରାଜ୍ୟରେ ଗ୍ରୀଷ୍ଣ ପ୍ରବାହ ଜାରି ପରିପ୍ରେକ୍ଷୀରେ ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନା ଆଜି ରାଜ୍ୟର ସମସ୍ତ ଜିଲ୍ଲାପାଳମାନଙ୍କ ସହିତ ବିଭିନ୍ନ ଜିଲ୍ଲାର ସ୍ଥିତି ସମୀକ୍ଷା କରିଛନ୍ତି। ଏହି ବୈଠକରେ ଆଭାସୀ ମାଧ୍ୟମରେ ସମସ୍ତ ଜିଲ୍ଲାର ଜିଲ୍ଲାପାଳମାନେ ଯୋଗ ଦେଇଥିଲେ। ମୁଖ୍ୟ ଶାସନ ସଚିବ ରାଜ୍ୟରେ ଗ୍ରୀଷ୍ଣ ଲହରୀ ଜାରି ରହିଥିବାରୁ ସତର୍କତା ମୂଳକ ବିଭିନ୍ନ ପଦକ୍ଷେପ ନେବାକୁ ଜିଲ୍ଲାପାଳ ତଥା ସଂପୃକ୍ତ ବିଭିନ୍ନ ବିଭାଗମାନଙ୍କୁ ପରାମର୍ଶ ଦେଇଛନ୍ତି। ଅତ୍ୟନ୍ତ ଗ୍ରୀଷ୍ଣ ପ୍ରବାହ ଦୃଷ୍ଟିରୁ ଆଗାମୀ ସାଧାରଣ ନିର୍ବାଚନ ପରିପ୍ରେକ୍ଷୀରେ ବିଭିନ୍ନ ରାଜନୈତିକ ଦଳ ପକ୍ଷରୁ ହେଉଥିବା ଦୀର୍ଘ ସମୟ ଧରି ସାଧାରଣ ସଭା ଖୋଲା ସ୍ଥାନରେ ନକରିବାକୁ ପରାମର୍ଶ ଦେଇଛନ୍ତି।
ଦିନବେଳା ଅଧିକ ତାପମାତ୍ରା ଓ ଗୁଳୁଗୁଳି ହେଉଥିବାରୁ ରାଜନୈତିକ ଦଳ ମାନେ ସ୍ୱତନ୍ତ୍ର ରିଲିଫ୍ କମିଶନରଙ୍କ ମାର୍ଗଦର୍ଶିକା ସଠିକ୍ ଭାବେ ଅନୁପାଳନ କରନ୍ତୁ ବୋଲି ପରାମର୍ଶ ଦେଇଛନ୍ତି ମୁଖ୍ୟ ଶାସନ ସଚିବ। ଶ୍ରମ ବିଭାଗ ନିର୍ଦ୍ଦେଶନାମା ଅନୁସାରେ ପୂର୍ବାହ୍ଣ ୧୧ ଟାରୁ ଅପରାହ୍ନ ୩.୩୦ ମଧ୍ୟରେ ଯେପରି ଶ୍ରମିକମାନେ ଅତ୍ୟଧିକ ଖରାରେ କାର୍ୟ୍ୟ ନ କରନ୍ତି, ସେଥି ପ୍ରତି ବିଭିନ୍ନ ବ୍ୟବସ୍ଥାରେ ତଦାରଖ କରିବାକୁ ସେ ନିର୍ଦ୍ଦେଶ ଦେଇଛନ୍ତି। ଆବଶ୍ୟକ ସବୁ ସ୍ଥାନରେ ଜଳଛତ୍ର କାର୍ୟ୍ୟକ୍ଷମ ହେବା ନିଶ୍ଚିତ କରାଇବାକୁ କହିଛନ୍ତି। ଯାତ୍ରୀବାହୀ ବସ, ମୋ ବସ୍ ଆଦିରେ ଯାତ୍ରା କରୁଥିବା ବସରେ ପ୍ରାଥମିକ ଚିକିତ୍ସା ବାକ୍ସ ସହ ଆବଶ୍ୟକ ଜରୁରୀ କାଳୀନ ସ୍ଥିତି ପାଇଁ ପାନୀୟ ଜଳ, ଓଆରଏସ୍ ପ୍ୟାକେଟ୍ ରଖାଯାଉ। ବିଡିଓ, ତହସିଲଦାର, ଉପ-ଜିଲ୍ଲାପାଳ ଆଦି ଅଧିକାରୀମାନେ ବସରେ ଏସବୁ ଅଛିକି ନାହିଁ ଅଚାନକ ଯାଂଚ କରିବାକୁ ମୁଖ୍ୟଶାସନ ସଚିବ ନିର୍ଦ୍ଦେଶ ଦେଇଛନ୍ତି। ବିଭିନ୍ନ ଡାକ୍ତରଖାନାରେ ଅଂଶୁଘାତ ମୁକାବିଲା ନିମନ୍ତେ ଶଯ୍ୟା ପ୍ରସ୍ତୁତି ଯାଂଚ କରି ଜିଲ୍ଲାପାଳମାନେ ପ୍ରସ୍ତୁତି ସଠିକ୍ ରହିଛି କି ନାହିଁ, ତାହା ଅନୁଧ୍ୟାନ କରିବେ। ହସ୍ପିଟାଲରେ ଜେନେରେଟର ସେଟ୍ ରଖାଯିବାକୁ ନିର୍ଦ୍ଦେଶ ଦିଆଯାଇଛି। ସ୍କୁଲ ମାନଙ୍କରେ ନିର୍ଘଣ୍ଟ କରାଯାଇଥିବା ସମୟ ଅନୁସାରେ ଛାତ୍ରଛାତ୍ରୀମାନେ ପାଣି ପିଇବା, ବିଦ୍ୟାଳୟରେ ଓଆରଏସ୍ ପ୍ୟାକେଟ୍ ଉପଲବ୍ଧ ହେବା ସହ ଜିଲ୍ଲା ଶିକ୍ଷା ଅଧିକାରୀମାନଙ୍କ ସହିତ ନିୟମିତ ସ୍ଥିତି ଯାଂଚ କରିବାକୁ ଜିଲ୍ଲାପାଳମାନଙ୍କୁ ପରାମର୍ଶ ଦିଆଯାଇଛି। ସେହିପରି ଗୃହପାଳିତ ପଶୁ ଓ ପକ୍ଷୀମାନଙ୍କ ପାଇଁ ପାଣିର ବ୍ୟବସ୍ଥା କରିବାକୁ ବ୍ୟବସ୍ଥା ଉନ୍ନୟନ କମିଶନର ଶ୍ରୀମତୀ ଅନୁ ଗର୍ଗ ପରାମର୍ଶ ଦେଇଥିଲେ। ପାନୀୟ ଜଳ ଯୋଗାଣ ପାଇଁ ବିଦ୍ୟୁତ୍ ସରବରାହ ଯେପରି ବ୍ୟାଘାତ ନଘଟେ, ସେଥିପାଇଁ ବିଦ୍ୟୁତ୍ ବିତରଣ କମ୍ପାନୀ ଡିସକମ ସହିତ ନିୟମିତ ବୈଠକ କରି ସମସ୍ୟାର ସମାଧାନ କରାଯାଉଥିବା ସଂପର୍କରେ ଶକ୍ତି ବିଭାଗ ପ୍ରମୁଖ ଶାସନ ସଚିବ ଶ୍ରୀ ବିଶାଳ କୁମାର ଦେବ ପ୍ରକାଶ କରିଥିଲେ। ସେହିପରି ଗ୍ରୀଷ୍ଣ ପ୍ରବାହ ଦୃଷ୍ଟିରୁ ଆଗାମୀ ନିର୍ବାଚନ ପରିପ୍ରେକ୍ଷୀରେ ମତଦାନ ଗଣନା କେନ୍ଦ୍ର ପ୍ରକୋଷ୍ଠରେ ଶତାଧିକ ଅଧିକାରୀ, ପୋଲିଂ ଏଜେଣ୍ଟମାନେ ନିୟୋଜିତ ହେବାକୁ ଥିବା ଦୃଷ୍ଟିରୁ ସେଠାରେ ଯେପରି ବିଦ୍ୟୁତ୍ ସରବରାହ ବ୍ୟାଘାତ ନଘଟେ, ସେଥିପ୍ରତି ଦୃଷ୍ଟି ଦେବା, ଡିଜି ସେଟ୍ ରଖାଯିବା, ଓଆରଏସ୍ ପ୍ୟାକେଟ୍ ଓ ଯଥେଷ୍ଟ ପାନୀୟ ଜଳ ରଖାଯିବା ପ୍ରତି ସେ ଗୁରୁତ୍ୱାରୋପ କରିଛନ୍ତି। ପ୍ରଚଣ୍ଡ ରୌଦ୍ରତାପରେ ବିଭିନ୍ନ ଜଙ୍ଗଲରେ ନିଆଁ ଲାଗିବାର ସମ୍ଭାବନା ଦୃଷ୍ଟିରୁ ସ୍ଥାନୀୟ ସ୍ୱେଚ୍ଛାସେବୀଙ୍କ ସହାୟତାରେ ସମ୍ଭାବ୍ୟ ମୁକାବିଲା ପାଇଁ ପ୍ରସ୍ତୁତି ରହିବାକୁ ସେ ପରାମର୍ଶ ଦେଇଛନ୍ତି। ଯେଉଁସ୍ଥାନରେ ଜଳ ଉତ୍ସରେ ପାଣିର ଅଭାବ ରହିଛି, ସେସବୁ ଅଂଚଳର ଲୋକଙ୍କୁ ଟ୍ୟାଙ୍କର ଯୋଗେ ପାନୀୟ ଜଳ ଯୋଗାଇଦେବାକୁ ସେ ନିର୍ଦ୍ଦେଶ ଦେଇଛନ୍ତି। ଯେଉଁ ବିଦ୍ୟାଳୟରେ ଅଦ୍ୟାବଧି ନଳକୁପଗୁଡିକର ମରାମତି ଆବଶ୍ୟକତା ରହିଛି, ତାହାକୁ ପଂଚାୟତିରାଜ ବିଭାଗ ସହାୟତାରେ ତ୍ୱରିତ ସଚଳ କରାଯିବା ଆଦି ସଂପର୍କରେ ବୈଠକରେ ଆଲୋଚନା କରାଯାଇଥିଲା।
