ଓଡିଶାରେ ପୁଣି ଏକ ଭୟଙ୍କର ଦୁର୍ଘଟଣା, ଗୋଟିଏ ପରିବାରର ୭ ଜଣ ସହିତ ୧୨ ଜଣଙ୍କ ମୃତ୍ୟୁ

ଭୁବନେଶ୍ବର:  ଦିଗପହଣ୍ଡିରେ ଏକ ଭୟଙ୍କର ବସ ଦୁର୍ଘଟଣା ଘଟିଯାଇଛି। ଦୁଇଟି ବସ ମଧ୍ୟରେ ମୁହାଁମୁହିଁ ଦୁର୍ଘଟଣା ଯୋଗୁଁ ଗୋଟିଏ ପରିବାରର ୭ଜଣ ସହିତ ମୋଟ ୧୨ ଜଣଙ୍କର ମୃତ୍ୟୁ ହୋଇଛି। ଏଥିରେ ୬ ଜଣ ପୁରୁଷ, ୪ ମହିଳା ଓ ୨ଜଣ ପିଲା ରହିଛନ୍ତି। ଏହି ଦୁର୍ଘଟଣାରେ ୬ ଜଣ ଗୁରୁତର ଆହତ ହୋଇଛନ୍ତି। ଆହତଙ୍କୁ ବ୍ରହ୍ମପୁର ହସପିଟାଲରେ ଚିକିତ୍ସା କରାଯାଉଛି। ଗତକାଲି ବିଳମ୍ବିତ ରାତିରେ ଏହି ଦୁର୍ଘଟଣା ଘଟିଛି। ଘଟଣାରୁ ଜଣାପଡିଛି ଯେ ଓଏସଆରଟିସିର ଏକ ବସ କନ୍ୟାଯାତ୍ରୀଙ୍କ ବସ ସହିତ ଦିଗପହଣ୍ଡି ଖେମୁଣ୍ଡି କଲେଜ ନିକଟରେ ମୁହାଁମୁହିଁ ଧକ୍କା ହୋଇଛି। ସରକାରୀ ବସଟି ରାୟଗଡାରୁ ଭୁବନେଶ୍ବର ଆସୁଥିବା ବେଳେ କନ୍ୟାଯାତ୍ରୀ ବସଟି ବ୍ରହ୍ମପୁରରେ ଯାତ୍ରୀଙ୍କୁ ଛାଡି ଖଣ୍ଡଦେଉଳି ଯାଉଥିଲା।