୨୬ରୁ ଶୀତକାଳୀନ ଅଧିବେଶନ; ୨୫ରେ ବାଚସ୍ପତି ଡାକିଲେ ସର୍ବଦଳୀୟ ବୈଠକ

ଭୁବନେଶ୍ୱର: ନଭେମ୍ବର ୨୬ରୁ ବିଧାନସଭାର ଶୀତକାଳୀନ ଅଧିବେଶନ ଆରମ୍ଭ ହେବ। ତାହା ଡିସେମ୍ବର ୩୧ ପର୍ଯ୍ୟନ୍ତ ଚାଲିବ। ଏହାରି ମଧ୍ୟରେ ୩୦ଟି କାର୍ଯ୍ୟଦିବସ ରହିବ। ପ୍ରଥମ ଦିିବସରେ ଅତିରିକ୍ତ ବଜେଟ୍ ଉପସ୍ଥାପନ ହେବ। ଏହି ଶୀତ ଅଧିବେଶନକୁ କିଭଳି ସୁରୁଖୁରୁରେ ପରିଚାଳନା କରାଯିବ ସେଥିପାଇଁ ୨୫ରେ ବାଚସ୍ପତି ସୁରମା ପାଢ଼ୀ ସର୍ବଦଳୀୟ ବୈଠକ ଡାକିଛନ୍ତି। ବାଚସ୍ପତି ଶ୍ରୀମତୀ ପାଢ଼ୀ କହିଛନ୍ତି ଯେ ଶୀତ ଅଧିବେଶନ ବେଶ୍ ଗୁରୁତ୍ୱପୂର୍ଣ୍ଣ। ୩୦ କାର୍ଯ୍ୟକାରୀ ଦିବସ ମଧ୍ୟରୁ ନଭେମ୍ବରରେ ୫ଟି ଓ ଡିସେମ୍ବର ମାସରେ ୨୫ଟି କାର୍ଯ୍ୟ ଦିବସ ରହିବ। ପ୍ରଥମ ଦିବସରେ ଅର୍ଥ ବିଭାଗ ଦାୟିତ୍ୱରେ ଥିବା ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ୨୦୨୪-୨୫ର ତିନି ମାସ ପାଇଁ ଅତିରିକ୍ତ ବଜେଟ୍ ଉପସ୍ଥାପନ କରିବେ। ଏନେଇ ଡିସେମ୍ବର ୫ରେ ବିନିଯୋଗ ବିଲ୍ ଉପସ୍ଥାପନ ହେବ। ବଜେଟ୍ ଉପରେ ଡିସେମ୍ବର ୨, ୩ ଓ ୪ରେ ତିନି ଦିନ ଧରି ଆଲୋଚନା ହେବ। ଏହା ପରେ ଡିସେମ୍ବର ୫ରେ ବିନିଯୋଗ ବିଲ ପାରିତ ହେବ। ଲୋକଙ୍କ ହିତରେ ବିଭିନ୍ନ ବଜେଟ୍ ପାରିତ ହେବ। ତେବେ ସରକାରୀ କାର୍ଯ୍ୟ ପାଇଁ ଅତି କମରେ ୨୦ ଦିନ ଏବଂ ବିଲ୍ ଓ ସଂକଳ୍ପକୁ ମିଶାଇ ବେସରକାରୀ ସଦସ୍ୟ ବ୍ୟବସାୟ ପାଇଁ ୫ ଦିନ ସମୟ ରହିିଛି। ଗୃହ କିପରୀ ସୁରୁଖୁରୁରେ ଚାଲିବ ସେନେଇ ସବୁ ଦଳର ସହଯୋଗ ରହିବା ଜରୁରୀ। ୨୫ ତାରିଖ ବୈଠକରେ ଏବିଷୟରେ ବିସ୍ତୃତ ଆଲୋଚନା କରାଯିବ ବୋଲି ବାଚସ୍ପତି ଶ୍ରୀମତୀ ପାଢ଼ୀ ସ୍ପଷ୍ଟ କରିଛନ୍ତି।