‘ଗୋଟିଏ ଦେଶ ଗୋଟିଏ ନିର୍ବାଚନ’ ସମ୍ବନ୍ଧରେ ହେଲା ବୈଠକ
ନୂଆଦିଲ୍ଲୀ: ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଅଧ୍ୟକ୍ଷତାରେ ଆଜି ଦେଶରେ ‘ଏକ ଦେଶ ଏକ ନିର୍ବାଚନ’ ସଂପର୍କରେ କମିଟିର ଦ୍ୱିତୀୟ ବୈଠକ ଅନୁଷ୍ଠିତ ହୋଇଯାଇଛି। ଏଥିରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା, ପୂର୍ବତନ ସଲିସିଟର ଜେନେରାଲ ହରିଶ ସାଲଭେ, ଜମ୍ମୁ-କଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ଗୁଲାମ ନବୀ ଆଜାଦଙ୍କ ବ୍ୟତୀତ ଆଇନ ଆୟୋଗର ଅଧ୍ୟକ୍ଷ ରିତୁ ରାଜ ଅୱସ୍ତି ଉପସ୍ଥିତ ଥିଲେ। ଏହି ସମୟରେ ଆଇନ ଆୟୋଗ ଦ୍ୱାରା ସମ୍ପୂର୍ଣ୍ଣ ରୋଡମ୍ୟାପ ଉପସ୍ଥାପନ କରାଯାଇଥିଲା। ସୂତ୍ରରୁ ପ୍ରକାଶ ଯେ, ଏହି ବୈଠକରେ ଆଇନ ଆୟୋଗ ସୂଚନା ଦେଇଛନ୍ତି ଯେ ଯଦି ଦେଶରେ ‘ଗୋଟିଏ ଦେଶ ଗୋଟିଏ ନିର୍ବାଚନ’ କାର୍ଯ୍ୟକାରୀ ହେବ, ତା’ହେଲେ ଆଇନ ତଥା ସମ୍ବିଧାନରେ କେଉଁ ସଂଶୋଧନ କରିବାକୁ ପଡ଼ିବ। ସୂଚନାନୁସାରେ, ଆୟୋଗ କମିଟିକୁ କହିଛନ୍ତି ଯେ, ବର୍ତ୍ତମାନ ୨୦୨୪ ନିର୍ବାଚନରେ ଗୋଟିଏ ଦେଶ ଗୋଟିଏ ନିର୍ବାଚନ କାର୍ଯ୍ୟକାରୀ କରିବା ସମ୍ଭବ ନୁହେଁ, କିନ୍ତୁ ଏହା ୨୦୨୯ରେ କାର୍ଯ୍ୟକାରୀ ହୋଇପାରିବ। ଏହା ପୂର୍ବରୁ ସମ୍ବିଧାନରେ ସଂଶୋଧନ କରିବାକୁ ପଡ଼ିବ। ଏଥର କମିଟି ଏହାର ଦ୍ୱିତୀୟ ବୈଠକରେ ଯୋଗଦେବାକୁ ଆଇନ ଆୟୋଗର ଅଧ୍ୟକ୍ଷଙ୍କୁ ମଧ୍ୟ ନିମନ୍ତ୍ରଣ କରିଥିଲା। ଦେଶରେ ଏକକାଳୀନ ନିର୍ବାଚନ କିପରି କରାଯାଇପାରିବ ସେନେଇ କମିଟି ଜାଣିବାକୁ ଚାହୁଁଛି। ତେଣୁ ଏହାର ପରାମର୍ଶ ଏବଂ ମତାମତ ଜାଣିବା ପାଇଁ ଆଇନ ଆୟୋଗଙ୍କୁ ଡକାଯାଇଥିଲା।
