ଭାରତ ଆସିବ ଟେସ୍ଲା
ନୂଆଦିଲ୍ଲୀ: ବିଶ୍ବର ସବୁଠୁ ଚର୍ଚ୍ଚିତ ଇଲେକ୍ଟ୍ରିକ୍ ଯାନ ନିର୍ମାତା ଟେସ୍ଲା ଖୁବ୍ଶୀଘ୍ର ଭାରତ ଆସିବ। ଭାରତ ପାଇଁ କଂପାନି ଯେଉଁ ଯୋଜନା ପ୍ରସ୍ତୁତ କରିଛି ତାହା ଯଦି କାର୍ଯ୍ୟକାରୀ ହେବ ତେବେ ଇଭି ଦୃଶ୍ୟପଟ୍ଟରେ ଏକ ବଡ଼ ଧରଣର ପରିବର୍ତ୍ତନ ଦେଖିବାକୁ ମିଳିବ। ଭାରତୀୟ ଗ୍ରାହକଙ୍କ କ୍ରୟ ଶକ୍ତିକୁ ନଜରରେ ରଖି କଂପାନି ୨୦ ଲକ୍ଷ ଟଙ୍କିଆ ଟେସ୍ଲା ବଜାରକୁ ଆଣିବା ଯୋଜନା ରଖିଛି। କଂପାନି ଭାରତରେ ଏକ ବଡ଼ କାରଖାନା ବସାଇବା ଉପରେ ବିଚାର କରୁଛି। ସେହି କାରଖାନାରେ ବାର୍ଷିକ ୫ ଲକ୍ଷ ଗାଡ଼ି ତିଆରି ହୋଇପାରିବ। କିଛି ଦିନ ପୂର୍ବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆମେରିକା ଗସ୍ତ ବେଳେ ଟେସ୍ଲାର ମୁଖ୍ୟ ଏଲନ୍ ମସ୍କଙ୍କ ସହ ସାକ୍ଷାତ କରି ବିଭିନ୍ନ ପ୍ରସଙ୍ଗରେ ଆଲୋଚନା କରିଥିଲେ। ଏହାର କିଛି ଦିନ ପରେ କଂପାନିର ପ୍ରତିନିଧିମାନେ ପୁଣି ଥରେ ଭାରତ ସରକାରଙ୍କ ସହ ମୁଲଚାଲ ଆରମ୍ଭ କରିଛନ୍ତି। ଅଟୋ ଯନ୍ତ୍ରାଂଶ ପାଇଁ ସରକାର ଦେଉଥିବା ପ୍ରୋତ୍ସାହନ ଓ ସୁବିଧାସୁଯୋଗ ବିଷୟରେ କଂପାନି ବୁଝୁଛି। ଟିକସ ବିଷୟରେ ମଧ୍ୟ ଆଲୋଚନା ହୋଇଛି।କେବଳ ଭାରତ ସରକାର ନୁହେଁ ଶିଳ୍ପର ବିଭିନ୍ନ ପ୍ରତିନିଧିଙ୍କୁ ମଧ୍ୟ ଟେସ୍ଲାର ପ୍ରତିନିଧିମାନେ ସାକ୍ଷାତ କରି ସମ୍ଭାବ୍ୟ ସହଯୋଗିତା ବିଷୟରେ ଆଲୋଚନା କରୁଛନ୍ତି।
