‘ନିଜ ପାଇଁ ନୁହେଁ, ଅମିତ ଶାହାଙ୍କ ପାଇଁ ଭୋଟ୍ ମାଗୁଛନ୍ତି ମୋଦୀ’: ଅରବିନ୍ଦ କେଜ୍ରିୱାଲ
ନୂଆଦିଲ୍ଲୀ: ତିହାର ଜେଲରୁ ବାହାରିବା ପରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଆଜି ଜନତାଙ୍କ ସହ ଯୋଗ ଦେଇଛନ୍ତି। ଜେଲରୁ ବାହାରିବା ପରେ ଅରବିନ୍ଦ କେଜ୍ରିୱାଲ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିଷୟରେ ଏକ ବଡ଼ ଦାବି କରିଛନ୍ତି। ସର୍ବପ୍ରଥମେ ମୁଖ୍ୟମନ୍ତ୍ରୀ କେଜ୍ରିୱାଲ କହିଛନ୍ତି ଯେ, ଏହି ଲୋକସଭା ନିର୍ବାଚନରେ ସରକାର ବିଜେପି ଦ୍ୱାରା ନୁହେଁ ବରଂ ଇଣ୍ଡିଆ ଆଲାଇନ୍ସ ଦ୍ୱାରା ଗଠନ ହେବ। ତେବେ ସେ ଏକ ବଡ ଦାବି କରି କହିଛନ୍ତି ଯେ, ବିଜେପି ସରକାର ଗଠନ ହୋଇଥିଲେ ମଧ୍ୟ ନରେନ୍ଦ୍ର ମୋଦୀ ପରବର୍ତ୍ତୀ ପ୍ରଧାନମନ୍ତ୍ରୀ ହେବେ ନାହିଁ। ଅରବିନ୍ଦ କେଜ୍ରିୱାଲ କହିଛନ୍ତି ଯେ, “ଏହି ଲୋକମାନେ (ବିଜେପି) ଇଣ୍ଡିଆ ସହଯୋଗୀ ଦଳକୁ ପଚାରନ୍ତି ତୁମର ପ୍ରଧାନମନ୍ତ୍ରୀ କିଏ, ମୁଁ ବିଜେପିକୁ ପଚାରୁଛି କିଏ ତୁମର ପ୍ରଧାନମନ୍ତ୍ରୀ ହେବ? ଲୋକମାନେ ନିଶ୍ଚିତ ଭାବରେ ଚିନ୍ତା କରୁଛନ୍ତି ଯେ, ଏହା କି ପ୍ରକାର ପ୍ରଶ୍ନ? ନରେନ୍ଦ୍ର ମୋଦୀ ପ୍ରଧାନମନ୍ତ୍ରୀ ହେବେ, କିନ୍ତୁ ଏହା ହେବ ନାହିଁ। ଏହାର କାରଣ ଦର୍ଶାଇ ମୁଖ୍ୟମନ୍ତ୍ରୀ କେଜ୍ରିୱାଲ ଆହୁରି ମଧ୍ୟ କହିଛନ୍ତି ଯେ, “ଆସନ୍ତା ବର୍ଷ ସେପ୍ଟେମ୍ବର ୧୭ ତାରିଖରେ ପ୍ରଧାନମନ୍ତ୍ରୀ ମୋଦୀଙ୍କୁ ୭୫ ବର୍ଷ ବୟସ ହେଉଛି। ବିଜେପିରେ ପ୍ରଧାନମନ୍ତ୍ରୀ ନିଜେ ଏକ ନିୟମ କରିଛନ୍ତି ଯେ, ୭୫ ବର୍ଷରୁ ଅଧିକ ନେତାମାନେ ଅବସର ଗ୍ରହଣ କରିବେ।” ମୁଖ୍ୟମନ୍ତ୍ରୀ କହିଛନ୍ତି ଯେ, “ଲାଲ କୃଷ୍ଣ ଆଡଭାନୀ, ମୁରଲୀ ମନୋହର ଯୋଶୀ, ସୁମିତ୍ରା ମହାଜନ ସେମାନଙ୍କ ବୟସ ହେତୁ ଅବସର ନେଇଥିଲେ। ବର୍ତ୍ତମାନ ନରେନ୍ଦ୍ର ମୋଦୀଙ୍କୁ ୭୫ ବର୍ଷ ବୟସ ହେବାକୁ ଯାଉଛି। ବର୍ତ୍ତମାନ ମୁଁ ବିଜେପିକୁ ପଚାରୁଛି ସେମାନଙ୍କର ପ୍ରଧାନମନ୍ତ୍ରୀ ପ୍ରାର୍ଥୀ କିଏ? ଅମିତ ଶାହାଙ୍କୁ ମୋଦୀ ପରବର୍ତ୍ତୀ ପ୍ରଧାନମନ୍ତ୍ରୀ କରିବେ। ସେଥିପାଇଁ ସେ ନିଜ ପାଇଁ ଭୋଟ୍ ମାଗୁନାହାଁନ୍ତି, କିନ୍ତୁ ଅମିତ ଶାହାଙ୍କ ପାଇଁ ମାଗୁଛନ୍ତି। ମୁଖ୍ୟମନ୍ତ୍ରୀ କେଜ୍ରିୱାଲ କହିଛନ୍ତି ଯେ, ଯେତେବେଳେ ଆପଣ ବିଜେପିକୁ ଭୋଟ୍ ଦେବାକୁ ଯାଆନ୍ତି, ମନେରଖନ୍ତୁ ଯେ ଆପଣ ପ୍ରଧାନମନ୍ତ୍ରୀ ମୋଦୀଙ୍କ ନାମରେ ନୁହେଁ ବରଂ ଅମିତ ଶାହାଙ୍କ ନାମରେ ଭୋଟ୍ ଦେଉଛନ୍ତି। ଏଥି ସହ ସେ ଆହୁରି ମଧ୍ୟ ପଚାରିଛନ୍ତି ଯେ, ଯଦି ପ୍ରଧାନମନ୍ତ୍ରୀ ଅବସର ନିଅନ୍ତି, ତେବେ ମୋଦୀଙ୍କ ଗ୍ୟାରେଣ୍ଟି କିଏ ପୂରଣ କରିବ? ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଅଭିଯୋଗ କରିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଜ ଦଳର ବରିଷ୍ଠ ନେତାଙ୍କ ରାଜନୀତି ଶେଷ କରିଛନ୍ତି। ସେ କହିଛନ୍ତି ଯେ, “ମଧ୍ୟପ୍ରଦେଶ ବିଧାନସଭା ନିର୍ବାଚନରେ ବିଜେପିର ବିଜୟ ପରେ ମଧ୍ୟ ଶିବରାଜ ସିଂ ଚୌହାନଙ୍କୁ ମୁଖ୍ୟମନ୍ତ୍ରୀ କରାଯାଇ ନାହିଁ ଏବଂ ତାଙ୍କ ରାଜନୀତି ଶେଷ ହୋଇଛି। ବସୁନ୍ଧରା ରାଜେ, ମନୋହର ଲାଲ ଖଟ୍ଟର ଏବଂ ରମଣ ସିଂଙ୍କ ଭଳି ନେତାଙ୍କ ସହ ମଧ୍ୟ ସମାନ କାର୍ଯ୍ୟ କରାଯାଇଛି।”
