ତିନି ବର୍ଷରେ ୧୦ ଦେଶକୁ ୧୧୨ ବିଲିୟନ ଡଲାରର ରପ୍ତାନି କରିବ ଭାରତ

ନୂଆଦିଲ୍ଲୀ : ସରକାରୀ ସମର୍ଥନ ଏବଂ ଉପଯୁକ୍ତ ରଣନୀତି ତଥା ମାର୍କେଟିଂ କୌଶଳ ଆଧାରରେ ଭାରତ ତିନି ବର୍ଷ ମଧ୍ୟରେ ଆମେରିକା ସମେତ ୧୦ ଟି ଦେଶକୁ ୧୧୨ ବିଲିୟନ ଡ଼ଲାରର ରପ୍ତାନି କରିବ। ଏହି ଦେଶଗୁଡିକରେ ଭାରତୀୟ ମିଶନଗୁଡିକ ବଜାର ପ୍ରବେଶ ସମସ୍ୟା ଚିହ୍ନଟ କରିବା ଉଚିତ ଯାହା ଦ୍ୱାରା ଘରୋଇ ଦ୍ରବ୍ୟର ରପ୍ତାନିକୁ ପ୍ରୋତ୍ସାହିତ କରାଯିବ ବୋଲି ଭାରତୀୟ ରପ୍ତାନି ସଂଗଠନ ଏକ ଅଧ୍ୟୟନରେ କହିଛି। ଅଣ-ଶୁଳ୍କ ପ୍ରତିବନ୍ଧକ ରପ୍ତାନି ଉପରେ ପ୍ରଭାବ ପକାଇଥାଏ ଏବଂ ଏହି ସମସ୍ୟାର ସମାଧାନ ହେବା ଆବଶ୍ୟକ । ଏହି ମିଶନଗୁଡିକ ଶିଳ୍ପକୁ ପ୍ରମୁଖ ଆମଦାନୀକାରୀଙ୍କ ସହିତ ବୈଠକ ଆୟୋଜନ କରିବାରେ ସାହାଯ୍ୟ କରିବ। ଏହି ଦେଶରେ ଘରୋଇ ଉତ୍ପାଦନ କ୍ଷମତାର ଶକ୍ତି ପ୍ରଦର୍ଶନ କରିବାକୁ ସକ୍ରିୟ ପ୍ରିଣ୍ଟ ଏବଂ ଇଲେକ୍ଟ୍ରୋନିକ ମିଡିଆ ଅଭିଯାନକୁ ବିବେଚନା କରାଯିବ। ବିଭିନ୍ନ ଉତ୍ପାଦଗୁଡିକ ମଧ୍ୟରେ ଆମେରିକାକୁ ୩.୭ ବିଲିୟନ ଡଲାରର ହୀରା, ୨.୨ ବିଲିୟନ ଡଲାର ମୂଲ୍ୟର ଯାନ, ୧.୪ ବିଲିୟନ ଡଲାରର ଅଳଙ୍କାର, ୧.୩ ବିଲିୟନ ଡଲାର ମୂଲ୍ୟର ଟେଲିଫୋନ ସେଟ ଇତ୍ୟାଦି ରପ୍ତାନି କରାଯିବ। ସେହିପରି ଚାଇନାକୁ ଯାନ, ଅଳଙ୍କାର, ଚିଙ୍ଗୁଡ଼ି, ଲଙ୍କା, ମାନବ କେଶ ଏବଂ ଗ୍ରାନାଇଟ ଇତ୍ୟାଦ ରପ୍ତାନି କରାଯିବ। ୧୧୨ ବିଲିୟନ ଡଲାରର ରପ୍ତାନି ସମ୍ଭାବନାରେ ଆମେରିକା, ଚାଇନା ଏବଂ ଭିଏତନାମ ସର୍ବାଧିକ ଅଂଶୀଦାର ହୋଇପାରନ୍ତି। ଭାରତ ଆମେରିକାକୁ ୩୧ ବିଲିୟନ ଡଲାର ଏବଂ ଚାଇନାକୁ ୨୨ ବିଲିୟନ ଡଲାରର ରପ୍ତାନି କରିବ। ୟୁଏଇକୁ ୧୧ ବିଲିୟନ ଡଲାର, ଭିଏତନାମକୁ ୯.୩ ବିଲିୟନ ଡଲାର, ହଂକଂକୁ ୮.୫ ବିଲିୟନ ଡଲାର ଏବଂ ଜର୍ମାନୀକୁ ୭.୪ ବିଲିୟନ ଡଲାରର ରପ୍ତାନି କରାଯିବ। ସେହିପରି ଇଣ୍ଡୋନେସିଆକୁ ୬ ବିଲିୟନ ଡଲାର, ମାଲେସିଆକୁ ୫.୮ ବିଲିୟନ ଡ଼ଲାର, ବ୍ରିଟେନକୁ ୫.୪ ବିଲିୟନ ଡଲାର ଏବଂ ବାଂଲାଦେଶକୁ ୫ ବିଲିୟନ ଡଲାର ମୂଲ୍ୟର ଉତ୍ପାଦ ରପ୍ତାନି ହେବ।