ଅଗଷ୍ଟରେ ଜିଏସ୍ଟି ସଂଗ୍ରହ ୧୦% ବୃଦ୍ଧି ସହ ୧.୭୪ ଲକ୍ଷ କୋଟି ଛୁଇଁଲା
ନୂଆଦିଲ୍ଲୀ : ଅଗଷ୍ଟରେ ମୋଟ୍ ଜିଏସ୍ଟି ଆଦାୟ ୧୦% ବୃଦ୍ଧି ସହ ୧,୭୪,୯୬୨ କୋଟି (୧.୭୪ ଲକ୍ଷ କୋଟି) ଟଙ୍କାରେ ପହଞ୍ଚିଛି। କେନ୍ଦ୍ର ଅର୍ଥ ମନ୍ତ୍ରାଳୟ ପକ୍ଷରୁ ଜାରି ରିପୋର୍ଟ ଅନୁଯାୟୀ, ଅଗଷ୍ଟ ୩୦ ସୁଦ୍ଧା ଉଲ୍ଲେଖନୀୟ ଜିଏସ୍ଟି ଆଦାୟ ହୋଇଛି। ଜିଏସଟି ସଂଗ୍ରହର ଏହି ତଥ୍ୟ ଦେଶର ସମସ୍ତ ପ୍ରାନ୍ତରେ ସବୁ କ୍ଷେତ୍ରରେ ସାମଗ୍ରୀ ଓ ସେବା ଟିକସ କ୍ଷେତ୍ରରେ କ୍ରମାଗତ ବୃଦ୍ଧିକୁ ଦର୍ଶାଉଛି। ଗତବର୍ଷ ଏହି ସମାନ ସମୟ ଅର୍ଥାତ୍ ଅଗଷ୍ଟ ମାସରେ ୧,୫୯,୦୬୯ କୋଟି (୧.୫୯ କୋଟି) ଟଙ୍କାର ଜିଏସ୍ଟି ସଂଗୃହୀତ ହୋଇଥିଲା। ଅନ୍ୟପକ୍ଷେ ୨୦୨୪ ଅଗଷ୍ଟରେ ଆଦାୟ ହୋଇଥିବା ଜିଏସ୍ଟି ପରିମାଣକୁ ମିଶାଇ ଚଳିତ ବର୍ଷ ବର୍ତ୍ତମାନ ସୁଦ୍ଧା (ଜାନୁଆରୀ-ଅଗଷ୍ଟ ଅର୍ଥାତ୍ ଗତ ୮ମାସରେ) ସଂଗୃହୀତ ହୋଇଥିବା ମୋଟ୍ ଜିଏସ୍ଟି ରାଜସ୍ୱ ୯,୧୩,୮୫୫ କୋଟି ଟଙ୍କାରେ ପହଞ୍ôଚଛି। କିନ୍ତୁ ୨୦୨୩ରେ ଏହି ୮ମାସ ସୁଦ୍ଧା ମୋଟ୍ ୮,୨୯,୭୯୬ କୋଟି ଟଙ୍କା ଜିିଏସ୍ଟି ସଂଗ୍ରହ କରାଯାଇଥିଲା। ଅର୍ଥାତ୍ ପୂର୍ବବର୍ଷ (୮ମାସ) ତୁଳନାରେ ଚଳିତ ବର୍ଷ ସମାନ ସମୟ ସୁଦ୍ଧା ସଂଗୃହୀତ ଜିଏସ୍ଟି ରାଜସ୍ୱରେ ୧୦.୧% ବୃଦ୍ଧି ହୋଇଥିବା ସ୍ପଷ୍ଟ ହୋଇଛି। ପ୍ରକାଶ, ସଂଗୃହୀତ ଜିଏସ୍ଟି ପରିମାଣରେ କେନ୍ଦ୍ରୀୟ ଜିଏସ୍ଟି (ସିଜିଏସ୍ଟି), ରାଜ୍ୟ ଜିଏସ୍ଟି (ଏସ୍ଜିଏସ୍ଟି) ଏବଂ ସମନ୍ୱିତ ଜିଏସ୍ଟି (ଆଇଜିଏସ୍ଟି) ଅନ୍ତର୍ଭୁକ୍ତ ରହିଥାଏ।
