ଶିମିଳିପାଳରେ ବାଘ ଗଣନା : ୨୦୨୬ରେ ଆସିବ ଗଣନା ରିପୋର୍ଟ
ମୟୁରଭଞ୍ଜ: ଆଜିଠାରୁ ସର୍ବଭାରତୀୟ ସ୍ତରରେ ବାଘ ଗଣନା ପ୍ରକ୍ରିୟା ଆରମ୍ଭ ହୋଇଛି। ମୟୁରଭଞ୍ଜ ଜିଲ୍ଲା ଶିମିଳିପାଳ ଅଭୟାରଣ୍ୟରେ ବନ ବିଭାଗ ପକ୍ଷରୁ ବାଘ ଗଣନା ପ୍ରକ୍ରିୟାରେ ୮ଟି ଦଳରେ ୮୫ ଜଣ କର୍ମଚାରୀଙ୍କୁ ନିୟୋଜିତ କରାଯାଇଛି । ଏଥିସହିତ ଗଛରେ ଲାଗିଛି ୩୫୦ରୁ ଅଧିକ ଟ୍ରାପ୍ କ୍ୟାମେରା । କ୍ୟାମେରା ଟ୍ରାପ୍, ଟ୍ରାନ୍ଜେକ୍ଟ ଲାଇନ ଓ ପଗ୍ ମାର୍କ ପାଦ ଚିହ୍ନ ଗଣନା ବ୍ୟତୀତ ଡିଜିଟାଲି ଏମ୍ସ୍ ଷ୍ଟ୍ରାଇପ୍ ପଦ୍ଧତ୍ତି ଗ୍ରହଣ କରିଛି ବନ ବିଭାଗ । ଯାହା ଦ୍ଵାରା ବାଘ ଗଣନା ସଠିକ ଭାବେ ହୋଇପାରିବ । ଏହି ପ୍ରକ୍ରିୟା ବିଭିନ୍ନ ପର୍ଯ୍ୟାୟ ଦେଇ ବର୍ଷତମାମ ଚାଲିବ । ଏହା ପରେ ଏନ୍ଟିସିଏକୁ ରିପୋର୍ଟ ଦିଆଯିବ ଏବଂ ୨୦୨୬ରେ ଗଣନା ରିପୋର୍ଟ ପ୍ରକାଶ ପାଇବ ବୋଲି ଶିମିଳିପାଳ ଟାଇଗର ରିଜର୍ଭ (ଏସ୍ଟିଆର୍) କର୍ତ୍ତୃପକ୍ଷ ସୂଚନା ଦେଇଛନ୍ତି । ପ୍ରତି ୪ ବର୍ଷରେ ଜାତୀୟ ବାଘ ଗଣନା ରିପୋର୍ଟ ପ୍ରକାଶ ପାଇଥାଏ । ଗତଥର ରିପୋର୍ଟ ଅନୁଯାୟୀ; ଶିମିଳିପାଳରେ ଏବେ ୨୪ଟି ବୟସ୍କ ମହାବଳ ଥିବାବେଳେ ୮ଟି ଶାବକ ରହିଛନ୍ତି । ଏହି ସଂଖ୍ୟାରେ ବୃଦ୍ଧି ଘଟିଛି ନା ବାଘବଂଶ ହ୍ରାସ ପାଉଛି, ତାହା ଗଣନା ରିପୋର୍ଟ ଆସିଲେ ଜଣାପଡ଼ିବ । ତେବେ ଅଭୟାରଣ୍ୟର କୋର୍ ଏରିଆରେ ଲାଗିଥିବା କ୍ୟାମେରା ଚିତ୍ରକୁ ଗ୍ରହଣ କଲେ ବାଘସଂଖ୍ୟା ବୃଦ୍ଧି ପାଇଛି ବୋଲି ଏସ୍ଟିଆର୍ କର୍ତ୍ତୃପକ୍ଷ ଜୋର୍ ଦେଉଛନ୍ତି ।
