‘ମୋ ବସ୍’ ହେବ ‘ଆମ ବସ୍’
ଭୁବନେଶ୍ୱର :‘ମୋ ବସ’ର ନାମ ପରିବର୍ତ୍ତନ କରାଯାଇ ‘ଆମ ବସ୍’ ହେବ ବୋଲି ଗୃହ ଓ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର ସୂଚନା ଦେଇଛନ୍ତି। ‘ମୋ ବସ୍’ ଏକ ଅହଂକାର ଶବ୍ଦ ବୋଲି ମନ୍ତ୍ରୀ ଶ୍ରୀ ମହାପାତ୍ର କହିଛନ୍ତି। ମୋହନ ସରକାର ଲୋକଙ୍କ ସରକାର, ଆମର କହିବା ଠିକ୍ ହେବ ବୋଲି ସେ କହିଛନ୍ତି।ଏହାଛଡ଼ା ସେ କହିଛନ୍ତି ଯେ ଦୁର୍ଘଟଣା ରୋକିବାକୁ ବସ୍ର ଆଗରେ ଓ ପଛରେ କ୍ୟାମେରା ଲାଗିବ। ଡ୍ରାଇଭର ଆଲର୍ଟ ରହିବା ପାଇଁ ବସ୍ରେ କ୍ୟାମେରା ସହ ସ୍ୱତନ୍ତ୍ର ଡିଭାଇସ୍ ଖଞ୍ଜା ଯିବ। ଫଳରେ ଯଦି କୌଣସି ଡ୍ରାଇଭରଙ୍କ ଆଖି ଲାଖିଯାଏ ତାହେଲେ ସାଇରନ ମଧ୍ୟ ବାଜିବ। ଏହାଦ୍ୱାରା ଦୁର୍ଘଟଣାକୁ ଏଡ଼ାଇବା ବେଶ ସହାୟକ ହେବ ବୋଲି ମନ୍ତ୍ରୀ ଶ୍ରୀ ମହାପାତ୍ର କହିଛନ୍ତି। ସୂଚନାଯୋଗ୍ୟ, ବିଭିନ୍ନ ସ୍ଥାନରେ ‘ମୋ ବସ୍’ ଦୁର୍ଘଟଣା ଘଟାଉଥିବା ଅଭିଯୋଗ ହେଉଥିବା ବେଳେ ଗତ ୪ ତାରିଖ ଦିନ ଭୁବନେଶ୍ୱରର କିଟ୍ ଛକରୁ ନନ୍ଦନକାନନ ଛକ ରାସ୍ତାର ରଘୁନାଥପୁର ପାଖରେ ‘ମୋ ବସ୍’ ଧକ୍କାରେ ଜଣେ ନାବାଳିକାର ମୁତ୍ୟୁ ହୋଇଥିଲା। ସମ୍ବଲପୁର ବରପାଲି ଥାନା ପତେଇପାଲିର ରାମଚନ୍ଦ୍ର ଜୁଆଡ଼ିଙ୍କ ଝିଅ ମୁନି ଜୁଆଡ଼ି (୧୨)ଙ୍କ ଉପରେ ମୋ ବସ୍ ଚଢ଼ିଯାଇଥିଲା। ଦୁର୍ଘଟଣା ପରେ ବସ୍ ଚାଳକ ଥାନାରେ ଆତ୍ମସମର୍ପଣ କରିଥିଲେ। କେବଳ ଏତିକି ନୁହେଁ ମୋ ବସ୍ ନାମରେ ଆହୁରି ଅନେକ ଅଭିଯୋଗ ମଧ୍ୟ ହେଉଛି।
