ରାଜ୍ୟରେ ସ୍ବାସ୍ଥ୍ୟ ସେବା ବେମାରିଆ,ସରକାର ବେପରୁଆ, ସ୍ୱାସ୍ଥ୍ୟମନ୍ତ୍ରୀଙ୍କ ଇସ୍ଥଫା ଦାବି କଲା କଂଗ୍ରେସ

ଭୁବନେଶ୍ବର: ଓଡ଼ିଶା ପିସିସି ସଭାପତି ଭକ୍ତ ଚରଣ ଦାସଙ୍କ ନିର୍ଦ୍ଦେଶରେ ରାଜ୍ଯରେ ବ୍ୟାପିଥିବା ହଇଜା ଅନୁଧ୍ୟାନ ପାଇଁ ଏକ ତଥ୍ୟ ଅନୁସନ୍ଧାନ କମିଟି ଗଠନ କରିଥିଲେ। ପ୍ରଦେଶ କଂଗ୍ରେସ କାର୍ଯ୍ଯାଳୟରେ ତଥ୍ୟ ଅନୁସନ୍ଧାନ କମିଟିର ଅଧ୍ୟକ୍ଷ ତଥା କଂଗ୍ରେସ ବିଧାୟକ ଡାକ୍ତର ସି ଏସ୍ ରାଜେନ୍ ଏକ୍କା ସାମ୍ବାଦିକ ସମ୍ମିଳନୀରେ ପ୍ରାରମ୍ଭିକ ସୂଚନା ପ୍ରଦାନ କରି କହିଥିଲେ ଯେ ରାଜ୍ୟର ୧୧ ଉର୍ଦ୍ଧ ଜିଲ୍ଲାରେ ହଇଜା ମହାମାରୀ ବ୍ୟାପିଛି। ରାଜ୍ୟ ସରକାର ଯେଉଁ ତଥ୍ୟ ଦେଉଛନ୍ତି ତା ଠାରୁ ଢ଼େର ଅଧିକ ସଂଖ୍ୟାର ରୋଗୀ ଏହି ମହାମାରୀରେ ଆକ୍ରାନ୍ତ ହୋଇଛନ୍ତି।ପାଖାପାଖି ୧୨ ହାଜର ରୁ ଅଧିକ ରୋଗୀ ଆକ୍ରାନ୍ତ ହୋଇଛନ୍ତି ।ପିଇବା ପାଣି କାରଣରୁ ଏହି ମହାମାରୀ ବ୍ୟାପିଛି। ରାଜ୍ୟର ବିଭିନ୍ନ ଜିଲ୍ଲାରେ ଲୋକମାନେ ପୋଖରୀରୁ ପାଣି ପିଉଛନ୍ତି, ସରକାର ଜନତାଙ୍କୁ ପାନୀୟ ଜଳ ଯୋଗାଇବାରେ ବିଫଳ ହୋଇଛନ୍ତି ।

ଏହାସହ ବହୁ ହସ୍ପିଟାଲ ପାରାମେଡିକାଲ ଷ୍ଟାପ ନାହାନ୍ତି, ସରକାର ହସ୍ପିଟାଲରେ କର୍ମଚାରୀ ନିଯୁକ୍ତ କରିବାରେ ମଧ୍ୟ ବିଫଳ।ମହାମାରୀ ହଇଜା କାରଣରୁ ୨୦ କି ୩୦ ନୁହେଁ, ତାଠାରୁ ଅଧିକ ରୋଗୀ ମୁର୍ତ୍ତୃ ହୋଇଛି, ସରକାର ତଥ୍ୟ ଲୁଚାଉଛନ୍ତି।ରାଜ୍ୟରେ ୫୩ ହାଜର ଅଧିକ ଗାଁ ରହିଛି, ସରକାର ନିଜେ ମାନୁଛନ୍ତି କି ୨୪ ହାଜର ଗାଁ ପିଇବା ପାଣି ନାହିଁ।ଆଗକୁ ରଥଯାତ୍ରା ଆସୁଛି ସରକାର ଅଧିକ ଯତ୍ନବାନ ହେବାର ଆବଶ୍ୟକତା ରହିଛି ବୋଲି ଶ୍ରୀ ଏକ୍କା କହିଛନ୍ତି। ସେହିପରି ପୂର୍ବତନ ପିସିସି ସଭାପତି ପ୍ରସାଦ ହରିଚନ୍ଦନ ସମସ୍ତ ତଥ୍ୟ ଉପସ୍ଥାପନ କରି କହିଛନ୍ତି “ବାଡ଼ି ମାଡ଼ି ଆସିଲାଣି,ବାଡ଼ିରେ ମଡକ ପଡ଼ିଛି “। ସରକାର ଆକ୍ରାନ୍ତଙ୍କ ସଂଖ୍ୟା ବର୍ତ୍ତମାନ ସୁଦ୍ଧା କହିନାହାନ୍ତି। ଘରେ ଓ ଘରୋଇ ଡାକ୍ତରଖାନାରେ ଚିକିତ୍ସିତଙ୍କ ସଂଖ୍ୟା ହିସାବକୁ ନିଆଯାଉନାହିଁ। ମୋଟ୍ କେତେଜଣ ମଲେଣି, ସୂଚନା ନାହିଁ। ରାଜ୍ୟରେ ତିନିଭାଗରୁ ଭାଗେ ଡାକ୍ତର ପଦବି ଖାଲି। ୫୪ ହଜାର ଗାଁରୁ କୋଡିଏ ହଜାର ଗାଁରେ ସ୍ବଚ୍ଛ ପାନୀୟ ଜଳ ଯୋଗାଣ ଚିନ୍ତା ମଧ୍ୟ କରିନାହାନ୍ତି ସରକାର। କଂଗ୍ରେସ ଦାବି କରୁଛି କି ହଇଜାରେ ଚିକିତ୍ସା ପାଇଁ ସରକାର ରୋଗୀଙ୍କ ଖର୍ଚ୍ଚ ବହନ କରନ୍ତୁ। ଯେଉଁ ରୋଗୀ କରଜ କରି ସୁସ୍ଥ ହୋଇଛନ୍ତି, ସେମାନଙ୍କୁ କ୍ଷତି ପୂରଣ ପ୍ରଦାନ କରନ୍ତୁ।ଯେଉଁ ପରିବାରର ରୋଗୀ ମୃତ୍ୟୁ ବରଣ କରିଛନ୍ତି ସେମାନଙ୍କୁ ୨୫ ଲକ୍ଷ ଟଙ୍କାର କ୍ଷତିପୂରଣ ଦିଅନ୍ତୁ।ପିଇବା ପାଣିର ଉତ୍ସକୁ ପରୀକ୍ଷା କରାଯାଉ।ହଇଜା ପାଇଁ ତୁରନ୍ତ ଭ୍ୟାକସିନ ବ୍ୟବସ୍ତା କରିବାକୁ କଂଗ୍ରେସ ଦାବି କରୁଛି ବୋଲି ଶ୍ରୀ ହରିଚନ୍ଦନ କହିଥିଲେ। ପିସିସି ଉପସଭାପତି ସନ୍ତୋଷ ସିଂ ସାଲୁଜା ଲୋକେ ହଇଜାରେ ମରୁଛନ୍ତି, ଆତ୍ମବିଭୋର ସ୍ବାସ୍ଥ୍ୟମନ୍ତ୍ରୀ କିନ୍ତୁ ନାଚରେ ମସଗୁଲ ବୋଲି କହିବା ସହ ସ୍ବାସ୍ଥ୍ୟମନ୍ତ୍ରୀଙ୍କ ଇସ୍ତଫା ଦାବି କରିଥିଲେ। ସୂଚନାଯୋଗ୍ୟ ଯେ ଏହି ତଥ୍ୟ ଅନୁସନ୍ଧାନକାରୀ କମିଟି ରାଜଗାଙ୍ଗପୁର ବିଧାୟକ ଡାକ୍ତର ସି. ଏସ୍. ରାଜନ ଏକ୍କାଙ୍କ ଅଧ୍ୟକ୍ଷତାରେ ଯାଜପୁର ଓ କଟକ ଜିଲ୍ଲାରେ ବ୍ୟାପୁଥିବା ହଇଜା ସଂକ୍ରମଣ ବିଭିନ୍ନ ପିଏସସି, ସିଏଚସି ଜିଲ୍ଲା ମୁଖ୍ୟ ହସ୍ପିଟାଲ ମାନ ଗ୍ରସ୍ତକରି ଏକ ବିସୃତ ରିପୋର୍ଟ ପ୍ରସ୍ତୁତ କରିଥିଲେ।