ଭୂମିହୀନ ଏବଂ ଗରିବ ଲୋକଙ୍କ ପାଇଁ ସମବାୟ କ୍ଷେତ୍ର ସମୃଦ୍ଧିର ମାର୍ଗ ପ୍ରଶସ୍ତ କରୁଛି: ଅମିତ ଶାହ

ନୂଆଦିଲ୍ଲୀ: କେନ୍ଦ୍ର ସ୍ୱରାଷ୍ଟ୍ର ତଥା ସମବାୟ ମନ୍ତ୍ରୀ ଅମିତ ଶାହ ଆଜି ନୂଆଦିଲ୍ଲୀଠାରେ ସମବାୟ କ୍ଷେତ୍ରକୁ ସୁଦୃଢ଼ କରିବା ଲାଗି ସମବାୟ ମନ୍ତ୍ରଣାଳୟର ପରାମର୍ଶ କମିଟିର ଦ୍ୱିତୀୟ ବୈଠକରେ ଅଧ୍ୟକ୍ଷତା କରିଛନ୍ତି। ଏହି ବୈଠକରେ କେନ୍ଦ୍ର ସମବାୟ ରାଷ୍ଟ୍ରମନ୍ତ୍ରୀ କ୍ରିଷନ ପାଲ ଏବଂ ମୁରଲୀଧର ମୋହୋଲ, କମିଟିର ସଦସ୍ୟ, ସମବାୟ ମନ୍ତ୍ରଣାଳୟର ସଚିବ ଏବଂ ମନ୍ତ୍ରଣାଳୟର ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ। ଏହି ବୈଠକକୁ ସମ୍ବୋଧିତ କରି କେନ୍ଦ୍ର ସ୍ୱରାଷ୍ଟ୍ର ତଥା ସମବାୟ ମନ୍ତ୍ରୀ ଅମିତ ଶାହ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ସମବାୟ ମନ୍ତ୍ରଣାଳୟ ସମବାୟ ସମିତିକୁ ଜୀବନ୍ତ ଏବଂ ସଫଳ ବ୍ୟବସାୟିକ ୟୁନିଟରେ ପରିଣତ କରିବାକୁ ପ୍ରତିଶ୍ରୁତିବଦ୍ଧ। ସେ କହିଥିଲେ ଯେ ୫ ବର୍ଷ ମଧ୍ୟରେ ଦେଶରେ ୨ ଲକ୍ଷ ବହୁମୁଖୀ ସମବାୟ ସମିତି ପ୍ରତିଷ୍ଠା କରିବାର ସେମାନଙ୍କ ମହତ୍ବାକାଂକ୍ଷୀ ଲକ୍ଷ୍ୟରେ ଏ ପର୍ଯ୍ୟନ୍ତ ୩୫,୩୯୫ଟି ନୂତନ ସମବାୟ ସମିତି ଗଠନ କରାଯାଇଛି, ଯେଉଁଥିରେ ୬୧୮୨ଟି ବହୁମୁଖୀ ପ୍ରାଥମିକ କୃଷି ଋଣ ସମିତି (ଏମପାକସ୍‍),୨୭,୫୬୨ଟି ଦୁଗ୍ଧ ସମିତି ଏବଂ ୧୬୫୧ଟି ମତ୍ସ୍ୟ ସମବାୟ ସମିତି ରହିଛି। ଅମିତ ଶାହ କହିଥିଲେ ଯେ ସମବାୟ କ୍ଷେତ୍ର ଭୂମିହୀନ ଏବଂ ଗରିବ ଲୋକଙ୍କ ପାଇଁ ସମୃଦ୍ଧିର ମାର୍ଗ ଉନ୍ମୁକ୍ତ କରିପାରିବ। ସେ କହିଥିଲେ ଯେ ସମବାୟ କ୍ଷେତ୍ର, କୃଷି ଏବଂ କୃଷକମାନଙ୍କ ସମୃଦ୍ଧି ପାଇଁ ତିନୋଟି ଜାତୀୟ ସ୍ତରୀୟ ସମବାୟ ସମିତି ଗଠନ କରାଯାଇଛି। ସେ କହିଥିଲେ ଯେ ନ୍ୟାସନାଲ କୋଅପରେଟିଭ୍ ଅର୍ଗାନିକ୍ ଲିମିଟେଡ୍ (ଏନସିଓଏଲ୍) କୃଷକମାନଙ୍କ ଜୈବିକ ଉତ୍ପାଦଗୁଡ଼ିକର ପ୍ରମାଣୀକରଣ, ବ୍ରାଣ୍ଡିଂ, ପ୍ୟାକେଜିଂ ଏବଂ ବିପଣନ ସୁନିଶ୍ଚିତ କରିଥାଏ, ଯାହାଦ୍ୱାରା କୃଷକମାନେ ସେମାନଙ୍କ ଉତ୍ପାଦ ପାଇଁ ଭଲ ମୂଲ୍ୟ ପାଇପାରିବେ। ସେ କହିଥିଲେ ଯେ ଜାତୀୟ ସମବାୟ ରପ୍ତାନୀ ଲିମିଟେଡ (ଏନସିଇଏଲ) କୃଷକମାନଙ୍କ ଉତ୍ପାଦକୁ ଅନ୍ତର୍ଜାତୀୟ ବଜାରକୁ ରପ୍ତାନୀ କରିବା ସମ୍ବନ୍ଧୀୟ ସମସ୍ତ ସୁବିଧା ପ୍ରଦାନ କରିଥାଏ, ଯେଉଁଥିରେ ସମ୍ପୂର୍ଣ୍ଣ ଲାଭ କୃଷକମାନଙ୍କୁ ମିଳିଥାଏ। ଶ୍ରୀ ଶାହା କହିଥିଲେ ଯେ ଭାରତୀୟ ବୀଜ ସହକାରୀ ସମିତି ଲିମିଟେଡ (ବିବିଏସ୍ଏସ୍ଏଲ୍) ଭାରତର ପାରମ୍ପରିକ ବିହନଗୁଡ଼ିକର ସଂରକ୍ଷଣ, ମହଜୁଦ ଏବଂ ଉତ୍ପାଦନ ଦିଗରେ କାର୍ଯ୍ୟ କରୁଛି। କେନ୍ଦ୍ର ସମବାୟ ମନ୍ତ୍ରୀ କହିଥିଲେ ଯେ ମୋଦୀ ସରକାର ପାରମ୍ପରିକ ବିହନ ପାଇଁ କ୍ଷୁଦ୍ର ଚାଷୀମାନଙ୍କ ସହ ଚୁକ୍ତି କରିବେ, ଯାହାଦ୍ୱାରା ସେମାନେ ମଧ୍ୟ ଏଥିରୁ ଉପକୃତ ହୋଇପାରିବେ।