ମନ୍ତ୍ର ଉଚ୍ଚାରଣ ଭିତରେ ମୁଣ୍ଡିଆ ମାରି ଲୋକସେବା ଭବନରେ ପ୍ରବେଶ କଲେ ମୁଖ୍ୟମନ୍ତ୍ରୀ ମୋହନ ମାଝୀ

ଭୁବନେଶ୍ବର: ପୁରା 22 ଦିନ ପରେ ଆଜି ଲୋକସେବା ଭବନରେ ପ୍ରବେଶ କରି କାମ ଆରମ୍ଭ କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ। ଆଜି ସେ ଲୋକସେବା ଭବନରେ ପ୍ରବେଶ କରିବା ପରେ ପ୍ରଥମେ ଭିତରେ ଥିବା ପ୍ରବେଶ ଦ୍ବାର ପାଖରେ ମୁଣ୍ଡିଆ ମାରିଥିଲେ। ଏହାପରେ ସେ ତୃତୀୟ ମହଲାରେ ଥିବା ମୁଖ୍ୟମନ୍ତ୍ରୀ କାର୍ଯ୍ୟାଳୟକୁ ପ୍ରବେଶ କରିଥିଲେ। ସେଠାରେ ପଣ୍ଡିତମାନେ ମନ୍ତ୍ରୀପାଠ କରି ତାଙ୍କୁ ମୁଖ୍ୟମନ୍ତ୍ରୀଙ୍କ ପାଇଁ ଥିବା ଆସନରେ ବସାଇଥିଲେ। ଆଜି ପୁର୍ବାହ୍ମରେ ମୁଖ୍ୟମନ୍ତ୍ରୀ ମୋହନ ମାଝୀ ଲୋକସେବା ଭବନକୁ ପ୍ରବେଶ କରିଥିଲେ। ତା ପୂର୍ବରୁ ଉପମୁଖ୍ୟମନ୍ତ୍ରୀ କେ ଭି ସିଂହଦେଓ, ମନ୍ତ୍ରୀ କୃଷ୍ଣ ଚନ୍ଦ୍ର ମହାପାତ୍ର, ମନ୍ତ୍ରୀ ପୃଥୀରାଜ ହରିଚନ୍ଦନଙ୍କ ସହିତ ମୁଖ୍ୟଶାସନ ସଚିବ, ବିଭିନ୍ନ ବିଭାଗର ସଚିବ ଏବଂ ସଚିବାଳୟ କର୍ମଚାରୀ ତାଙ୍କୁ ଫୁଲତୋଡା ଦେଇ ସ୍ବାଗତ କରିଥିଲେ। ଏହାପରେ ସେ ମୁଖ୍ୟ ଫାଟକରେ ସେ ମୁଣ୍ଡିଆ ମାରି ଲିଫ୍ଟରେ ତୃତୀୟ ମହଲାକୁ ଯାଇଥିଲେ। ଆଜି ମୁଖ୍ୟମନ୍ତ୍ରୀ ଲୋକସେବା ଭବନକୁ ଆସିବେ ବୋଲି ଏହାର ମୁଖ୍ୟ ଫାଟକ, ତୃତୀୟ ମହଲା ଫାଟକରେ ଫୁଲର ତୋରଣରେ ସଜାଯାଇଥିଲା। ସେହିପରି ଗ୍ରାଉଣ୍ଡ ଫ୍ଲୋରରେ ଫୁଲର ଝୋଟି ପକାଯାଇ ମୁଖ୍ୟମନ୍ତ୍ରୀଙ୍କୁ ସ୍ବାଗତ କରାଯାଇଥିଲା। ସେଠାରେ ସଚିବାଳୟ କର୍ମଚାରୀମାନେ ତାଙ୍କୁ ଫୁଲତୋଡା ଦେଇ ତୃତୀୟ ମହଲାକୁ ନେଇଥିଲେ। ମୁଖ୍ୟମନ୍ତ୍ରୀ ଭାବେ ମୋହନ ମାଝି ଶପଥ ନେବା ପରଠାରୁ ସେ ରାଜ୍ୟ ଅତିଥୀ ଭବନରେ ନିଜର କାର୍ଯ୍ୟ କରୁଥିଲେ। ଶପଥ ଦିନ ସେ ଲୋକସେବା ଭବନ ଆସି ତୃତୀୟ ମହଲା କନଫ୍ରେସନ ହଲରେ କ୍ୟାବିନେଟ ବୈଠକ କରିଥିଲେ। ହେଲେ ସେ ତାଙ୍କ କାର୍ଯ୍ୟାଳୟକୁ ଯାଇ ନ ଥିଲେ। ସେହିଠାରୁ ସେ କ୍ୟାବିନେଟ ବୈଠକ ସାରି ଫେରିଆସିଥିଲେ। ହେଲେ ଆଜି ସେ ରଂଗାରଂଗ ପରିବେଶ ମଧ୍ୟରେ ଲୋକସେବା ଭବନ ପ୍ରବେଶ କରି ତାଙ୍କ କାମ ଆରମ୍ଭ କରିଛନ୍ତି।