ମାନବିକତାକୁ ପରିହାସ: ଇରାନୀ ନାବିକଙ୍କ ମୃତ୍ୟୁରେ ହସୁଛନ୍ତି ଟ୍ରମ୍ପ

ୱାଶିଂଟନ: ବିଶ୍ୱ ଶାନ୍ତି ଏବଂ ଆନ୍ତର୍ଜାତିକ ମର୍ଯ୍ୟାଦାକୁ ବେଖାତିର କରି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏକ ଅତ୍ୟନ୍ତ ସମ୍ବେଦନହୀନ ଓ ଲଜ୍ଜାଜନକ ମନ୍ତବ୍ୟ ଦେଇଛନ୍ତି। ଭାରତ ମହାସାଗରରେ ଇରାନୀ ଯୁଦ୍ଧଜାହାଜ ‘ଆଇରିସ୍ ଡେନା’ ଉପରେ ହୋଇଥିବା ଆକ୍ରମଣ ଏବଂ ସେଥିରେ ୧୦୪ ଜଣ ନିରୀହ ନାବିକଙ୍କ ପ୍ରାଣହାନିକୁ ନେଇ ଶୋକ ପ୍ରକାଶ କରିବା ପରିବର୍ତ୍ତେ, ଟ୍ରମ୍ପ ଏହାକୁ ଏକ ‘ମଜାଦାର ଘଟଣା’ ଭାବେ ବର୍ଣ୍ଣନା କରିଛନ୍ତି। ୱାଶିଂଟନରେ ଏକ ସାମ୍ବାଦିକ ସମ୍ମିଳନୀରେ ଟ୍ରମ୍ପ ଦାବି କରିଛନ୍ତି ଯେ, ଗତ ସାଢ଼େ ତିନି ଦିନ ମଧ୍ୟରେ ଆମେରିକୀୟ ନୌସେନା ପ୍ରାୟ ୪୬ଟି ଇରାନୀ ଜାହାଜକୁ ସମୁଦ୍ରରେ ବୁଡ଼ାଇ ଦେଇଛି। ଏହି ଘଟଣାକୁ ବର୍ଣ୍ଣନା କରିବା ସମୟରେ ଟ୍ରମ୍ପ କହିଛନ୍ତି ଯେ, ସେ ଯେତେବେଳେ ସାମରିକ ଅଧିକାରୀଙ୍କୁ ପଚାରିଲେ କାହିଁକି ଜାହାଜଗୁଡ଼ିକୁ ଜବତ ନକରି ବୁଡ଼ାଇ ଦିଆଗଲା, ସେତେବେଳେ ଅଧିକାରୀମାନେ ଉତ୍ତର ଦେଇଥିଲେ ଯେ “ଜାହାଜ ବୁଡ଼ାଇବା ଜବତ କରିବା ଅପେକ୍ଷା ଅଧିକ ମଜାଦାର ଏବଂ ସୁରକ୍ଷିତ”। ଏହା କହିବା ସମୟରେ ଟ୍ରମ୍ପ ନିର୍ଲଜ୍ଜ ଭାବେ ହସିଥିଲେ, ସତେ ଯେପରି ଶତାଧିକ ନାବିକଙ୍କ ମୃତ୍ୟୁକୁ ନେଇ ତାଙ୍କ ମନରେ କୌଣସି ଅନୁତାପ ନାହିଁ। ଆନ୍ତର୍ଜାତିକ ବିଶେଷଜ୍ଞ ଏବଂ ମାନବାଧିକାର କର୍ମୀମାନେ ଟ୍ରମ୍ପଙ୍କ ଏହି ମନ୍ତବ୍ୟକୁ “ଲଜ୍ଜାଜନକ ଏବଂ ଅହଂକାରୀ” ବୋଲି କହିଛନ୍ତି। ଜଣେ ରାଷ୍ଟ୍ରମୁଖ୍ୟ ଭାବରେ ମୃତ୍ୟୁ ଓ ବିନାଶକୁ ନେଇ ଏପରି ଉପହାସ କରିବା ଆମେରିକାର ସାମରିକ ଅହଙ୍କାରର ନଗ୍ନ ପ୍ରଦର୍ଶନ ବୋଲି ଚର୍ଚ୍ଚା ହେଉଛି। ବିଶେଷଜ୍ଞଙ୍କ ମତରେ, ଏପରି ବୟାନ ମଧ୍ୟପ୍ରାଚ୍ୟରେ ଚାଲିଥିବା ଉତ୍ତେଜନାକୁ ଆହୁରି ଭୟଙ୍କର କରିପାରେ। ଜଣେ ସୈନିକର ମୃତ୍ୟୁକୁ ‘ମଜା’ ବୋଲି କହିବା ସାମରିକ ନୈତିକତାର ଘୋର ଉଲ୍ଲଂଘନ। ଟ୍ରମ୍ପଙ୍କର ଏହି ନିର୍ଦ୍ଦୟ ମନ୍ତବ୍ୟ ସୂଚାଉଛି ଯେ ଆମେରିକା କୌଣସି ଶାନ୍ତିପୂର୍ଣ୍ଣ ସମାଧାନ ଅପେକ୍ଷା ଯୁଦ୍ଧକୁ ଅଧିକ ପ୍ରାଧାନ୍ୟ ଦେଉଛି। ଏବେ ଇରାନ ଏହି ଅପମାନର କିପରି ପ୍ରତିଶୋଧ ନେବ ଏବଂ ଏହା ବିଶ୍ୱ ସୁରକ୍ଷା ବ୍ୟବସ୍ଥା ଉପରେ କି ପ୍ରଭାବ ପକାଇବ, ତାହାକୁ ନେଇ ଆନ୍ତର୍ଜାତିକ ସ୍ତରରେ ଗଭୀର ଚିନ୍ତା ପ୍ରକାଶ ପାଇଛି।