ଇନଷ୍ଟାଗ୍ରାମରେ ‘ପାକିସ୍ତାନ ଜିନ୍ଦାବାଦ’ ଲେଖି ୧୯ ବର୍ଷୀୟା ଯୁବତୀ ଗିରଫ

ନୂଆଦିଲ୍ଲୀ: ଇନ୍ ଷ୍ଟାଗ୍ରାମରେ ‘ପାକିସ୍ତାନ ଜିନ୍ଦାବାଦ’ ଲେଖିବା ପାଇଁ ପୋଲିସ ମହାରାଷ୍ଟ୍ରର ପୁଣେ ସହରର କୋଣ୍ଢୱା ଅଞ୍ଚଳର ଜଣେ ୧୯ ବର୍ଷୀୟା ଯୁବତୀଙ୍କୁ ଗିରଫ କରିଛି। ଏହି ଛାତ୍ରଜଣଙ୍କ ପୁଣେର ଏକ କଲେଜରେ ପଢ଼ୁଛନ୍ତି ଏବଂ କୋଣ୍ଢୱାର କୌସରବାଗ ଅଞ୍ଚଳରେ ରୁହନ୍ତି। ପୋଲିସ କନଷ୍ଟେବଳ ସୁଭାଷ ଜରାଣ୍ଡେଙ୍କ ଅଭିଯୋଗ କ୍ରମେ ଶୁକ୍ରବାର (୯ ମଇ) ଏହି କାର୍ଯ୍ୟାନୁଷ୍ଠାନ ନିଆଯାଇଛି। କୋଣ୍ଢୱା ପୋଲିସ ଷ୍ଟେସନରେ ଏକ ଏଫଆଇଆର ରୁଜୁ କରାଯାଇଛି। ମାମଲାକୁ ନିଶ୍ଚିତ କରି ପୋଲିସ ଡେପୁଟି କମିଶନର ରାଜକୁମାର ସିନ୍ଦେ କହିଛନ୍ତି ଯେ, ଅଭିଯୁକ୍ତ ଯୁବତୀଙ୍କୁ ଗିରଫ କରାଯାଇଛି ଏବଂ ଅଧିକ ତଦନ୍ତ ଚାଲିଛି। ଏଫଆଇଆର ଅନୁଯାୟୀ, ଭାରତୀୟ ସେନା ଦ୍ୱାରା ପାକିସ୍ତାନ ବିରୁଦ୍ଧରେ କରାଯାଇଥିବା ସାମ୍ପ୍ରତିକ କାର୍ଯ୍ୟାନୁଷ୍ଠାନ ସମୟରେ ପୋଲିସ ସୋସିଆଲ ମିଡିଆ ଉପରେ ନଜର ରଖିଥିଲା। ଏହି ସମୟରେ, ଅଭିଯୁକ୍ତ ଯୁବତୀଙ୍କ ଏକ ଆପତ୍ତିଜନକ ପୋଷ୍ଟ ଇନଷ୍ଟାଗ୍ରାମରେ ପ୍ରକାଶ ପାଇଥିଲା, ଯେଉଁଥିରେ ଶେଷରେ ‘ପାକିସ୍ତାନ ଜିନ୍ଦାବାଦ’ ଲେଖାଯାଇଥିଲା।