୫ ରାଜ୍ୟର ଲୋକଙ୍କୁ ପୁରୀ ମନା

ଭୁବନେଶ୍ୱର : ସମ୍ପ୍ରତି ଦେଶରେ ହୁହୁ ହୋଇ କରୋନା ବଢ଼ିଚାଲିଛି  । କରୋନା କାୟା ବିସ୍ତାର କରୁଥିବାରୁ ପ୍ରଶାସନ ପକ୍ଷରୁ ସତର୍କତାମୂଳକ ପଦକ୍ଷେପ ଗ୍ରହଣ କରାଯାଇଛି । ଏକ ଗୁରୁତ୍ୱପୂର୍ଣ୍ଣ ନିଷ୍ପତି କ୍ରମେ ପୁରୀକୁ ୫ ରାଜ୍ୟର ପର୍ଯ୍ୟଟକଙ୍କ ଉପରେ କଟକଣା ଲାଗୁ କରାଯାଇଛି  । ସମୀକ୍ଷା ବୈଠକ ପରେ ଏନେଇ ସୂଚନା ଦେଇଛନ୍ତି ପୁରୀ ଜିଲ୍ଲାପାଳ ସମର୍ଥ ବର୍ମା  । ଜିଲ୍ଲାପାଳ କହିଛନ୍ତିଯେ, ମଧ୍ୟପ୍ରଦେଶ, ଛତିଶଗଡ଼, ମହାରାଷ୍ଟ୍ର, କେରଳ ଓ ପଞ୍ଜାବରୁ ଆସୁଥିବା ପର୍ଯ୍ୟଟକଙ୍କ ଉପରେ କଟକଣା ଲାଗୁ କରାଯାଇଛି  । ସେହିସବୁ ରାଜ୍ୟରେ କରୋନା ବୃଦ୍ଧି ପାଇଥିବାରୁ ଏଭଳି ପଦକ୍ଷେପ ନିଆଯାଇଛି  । ଏହି ସବୁ ରାଜ୍ୟରୁ ଆସୁଥିବା ଲୋକଙ୍କ ଉପରେ କଡ଼ା ନଜର ରଖାଯାଇଛି  । ରେଳ ଷ୍ଟେସନରେ ସ୍କ୍ରିନିଂ ବ୍ୟବସ୍ଥା କରାଯାଇଥିବାବେଳେ ଲକ୍ଷଣ ଥିଲେ ଟେଷ୍ଟ କରାଯିବ  । ତେବେ ସବୁ ପର୍ଯ୍ୟଟକଙ୍କ ପାଇଁ କଡ଼ା କଟକଣା ଲାଗୁ କରାଯିବ ନାହିଁ  । ଏଥିପାଇଁ ୨ଟି ଯୋଗ୍ୟତା ରଖାଯାଇଛି  । ୭୨ ଘଂଟା ମଧ୍ୟରେ ଯେଉଁ ପର୍ଯ୍ୟଟକମାନଙ୍କର ଆରଟିପିସିଆର ରିପୋର୍ଟ ନେଗେଟିଭ ଥିବ ସେମାନଙ୍କୁ ଅନୁମତି ମିଳିବ  । ଏହାଛଡ଼ା ଉଭୟ ଡୋଜ ଟିକା ନେଇଥିବା ପର୍ଯ୍ୟଟକଙ୍କୁ ପୁରୀ ଆସିବା ପାଇଁ ମଧ୍ୟ ଅନୁମତି ପ୍ରଦାନ କରାଯିବ ବୋଲି ଜିଲ୍ଲାପାଳ ସ୍ପଷ୍ଟ କରିଛନ୍ତି  ।